Biji Shidiebuor Tulona Hoda
Mot 13:1 -23; Mak 4:1 -20
8
Sei porendi, Jisu adame-adame ar sohore-sohore bereinei Itchioro rejjior gom hoboran prosar gori-gori janei dilo. Baro jon sisjio tar somare elak. 2 Ar tar somare milieio hoiek jon elak. Sigunottun The dujto aptagun dabei die ar tharar aw-sugkani gom gori die. Meri Magdalini tartun sattuo bhud nigili jeion. Theo tar loge elo. 3 Chuzar mogkuo Joana, ar Susannaio tharar loge elak. Joanar negkuo Herod rajar sompotti rageidie elo. Sei miliegune ar onek jone tharar nijor horojchoi Jisure lobiot gorsion.4 Jhag-Jhag manus adam bagenettun tar idu einei thubeiondi. Sebeden Jisu ei tulona hodagan tharare hoi dilo: 5 “Ek jon biji shidiei tar bijigun shidibartei gelo. The biji sidi dede sittun, gulodok biji podo pazarat porilag. Manjie uri denar porendi, pheigkune hei phelliekki. 6 Ar gulodok biji madi padol sadara jagat porilag. Toj shuguno hinottei uthtie-uthtie sidie oi jeion. 7 Ar gulodok biji hada bonot porilag. Hada bonan somare ojol oinei bijigunore dagi rageilo. 8 Hintu gulodok biji gom madit porilag. Udinei, ojol oinei ek shot dunuo phol dorilak.” Sei hodagani the honar porendi, birat ro gori holo, “Jar sunibar han age, the sunok!” 9 Tar sisjiogune tartun pujor gorilak, “Ei tulona hodagano orthogan hi?” 10 Jisu holo, “Itchioror rejjior gubonan buji paribartei tomare gyen die oie. Hintu mui bagi manuschunore tulona dinei hongge jen.
‘Thara sebak hintu seinei buji loi partak noi. Sunde sunibak, hintu buji no paribak.’
11 Ien olode tulona hodagano orthogan: Bijibuo olode Itchioro hodagan. 12 Podo pazarat porsie bijigun bujoidie sunon sigun. Tare bischias gorineio mukti no pan para Diabolaδ einei tharar ontoranittun Itchioro hodagan nigilei nejai. 13 Sadara jagat porsie bijigun Itchioro hodagan suninei hujhi gori mani lon. Tharattun singor nei hinottei thara hanekkon gori bischias goron, ar lubbot poronde somoi thara phelei duon. 14 Hada bonot porsie bijigun bujoidie jigun sunir. Hintu thagke-thagke, ior halo sintiet dhon-sompot ar sugkanie dagi rageinei puripunnuo oi no paron. 15 Gom madit porsie bijigun bujoidie, jigun Itchioro hodagan ega mone ar gom mone suninei tharar ontorot dorjio dori ragan ar phola phol on.
Serag-danit Thona
Mot 5:15; Mak 4:21 -23;
Luk 11:33 -36
16 “Huno jone seragkuo dhoreinei leiloi dagi no thon. Huno jone subi tholeio no thon. Hintu je somegi, the phor dege para serag serag-dani ugure thon. 17 Haron jien lugei thuo oie, sien hulomela gori dega obo. Ar jien ghubei thuo oie sien phogodang gori die obo. 18 Senottei, tumi hingori sunor uijkar oio. Haron jar age, tare aro bes die obo. Ar jadtun nei, tar jien age bili mone gore, sien tartun hari luo obo.”
Jisur Mabuo ar Tar Bheiun
Mot 12:46 -50; Mak 3:31 -36
19 Sei lokke Jisur mabuo ar tar bheiun tare sebartei jeion. Manjior ghij hinottei thara tar hai jei no paron. 20 Sebeden ek jone tare holo, “Sah, tor mabuo ar tor bheiun tor loi hoda hobartei barendi thiei agondi.” 21 Jisu tharare holo, “Jigune Itchioro hoda sunon ar manon thara olakke mor ma ar bheiun.”
Jisu Borboh Thamei Dilo
Mot 8:23 -27; Mak 4:35 -41
22 Ar ek dine Jisu tar sisjiogun somot ekkan nawt udinei, ar tharare holo, “Billuo uhule jei.” Sebeden thara gelakkoi. 23 Ar thara nawdi jade, the ghum gelo. Sebeden billuot borboh bar. Tharar nawgan pani somer hinottei tar bipodot porilak. 24 Sisjiogune jeinei tare jageinei holak, “Guruthagur, guruthagur, ami dubir.” Ar the udinei boieranore ar tubol udette paniganore gubilo. Sebeden boieran thameilo ar billuoio olor olo. 25 Jisu tar sisjiogunore holo, “Tomar bischiaschan hudu?” Thara dore amok oinei thara-thara pujor goton, “Ibie henjannie Manus? Boierane ar paniganeo ugum de ar tar hoda manon.”
Jisu Bhude peiebuore
Gom Gorsie
Mot 8:28 -34; Mak 5:1 -20
26 Ar thara Galili dejor uhuledi Gadara manjio dejot lungilakkoi. 27 Thara hulo ugure udineigoi, ekkan sohorottun ek jon manus Jisur idu elo. Tare bhude peie baluk bilon olo. The habor-subor no ure no pine, the ghorot no theinei sojan holat thai. 28 The Jisure deginei, jogar parinei tar thengot salam gori porilo. Ar the birat ro gori holo, “Jisu begottun dangor Itchioror Puobuo, tui more hi gorte sas? Mui tore shokto gori hujoli gorongor, tui more hosto no dis.” 29 Jisu hajorchie aptabuore Manuschuottun nigili jebartei ugum die hinottei the sien holo. Bhudtuo manuschuore onek bar nejeie. Manjie tare shigolloi adhot-thengot bani rageibar seion. Hintu shigollani the sini phelei ar bhudtuoi tare jonosunnio jagat nejai. 30 Jisu tartun pujor gorilo, “Tor nangan hi?” Ar the holo, “Legionδ,” haron onek bhud tar bidirie sommon. 31 Tharare tolanei gattuot jebartei Jisu ugum no de para the Jisure hujoli gorer. 32 Muonnuot dangor ek pal sugor sorton. Sugoruno bidire jebartei onumoti de para bhudtune Jisure hujoli gorilak. Ar Jisu tharare onumoti dilo. 33 Bhudtune manuschuottun nigili jei sugoruno bidire somilakkoi. Sugoro palluo jhok porilo ar tarengodi porinei billuot dubinei mori gelak.
34 Jigune sei sugorun soradon, thara sien deginei daba-daba jeinei adamanit ar hai-hure jaganit hoboran holakkoi. 35 Hi olo manuschune sebartei elak. Thara Jisu idu lunginei, Jisu bhudtun dabei dede manuschuore degilakki. The habor urinei Jisur thengo hure lokki gori boi agede deginei thara dorelak. 36 Ei godhonagan jigune degkuon, sigune sei bhude peie manuschuore Jisu hingori gom gorsier janei dilak.
37 Thara shanggadik doreon hinottei, beg Gadara bamo manuschune Jisu thara siottun jaigoi para hujoli gorilak. Ar the nawganot udi gelogoi. 38 Hintu bhud dabei dede manuschuoi tar loge jebartei tare baari hujoli gorilo. Hintu tare dipadelo. 39 Jisu holo, “Tor ghorot phiri ja. Itchiore tortei hodog dangor ham gori dilo hogoi.” Sebeden manuschoi jeinei Jisu tartei hodog dangor ham gori die begkani goda sohoranot prosar gorilogoi.
Ridupirellie Milie ar
Mora Milie-Shawhbuo
Mot 9:18 -26; Mak 5:21 -43
40 Jisu phirineigoi, manuschune tare asha gori barsei agon hinottei hujhi gori tar loi dega olakkoi. 41 Ar sawh, Jaira nange ek jon synagog lobiot gorie siot einei the nije Jisur tengot dhorinei Jisure tar ghorot jebartei hujoli gorilo. 42 Haron tar ekkuo gori jhi, sibie morer. The perai baro bojor boios oie Jisu jade manuschune tare theli nedon. 43 Sei lokke, siot ekkuo baro bojorchie lo porede phirie bola milie elo. Tar jieni age begkani daktor dorte-dorte horoj gorsie, ar huno jone tare gom gori no paron. 44 The Jisur pijendi jeinei Jisur haboro hazat dhorinei jogon-togon lo poranagan bondo olo. 45 Jisu pujor gorilo, “More honna dhorsie?” Jogon huno jone haam no haan, Pitore holo, “Probu, manuschune Tore giere theli andon, a hittei, ‘More honna dhorsie?’ hor.” 46 Jisu holo, “Mortun hemodagan nigili jeie hinottei mui hoi parong more je the dhorsie.” 47 Miliebuoi sien dhora no porsie gori thei no paribo bili hoi parinei, the dore girgirei-girgirei einei the nije mujungot bukpari salam gori porilogi. The hittei tare dhorsie ar tare dhorinei hingori jogon-togon gom olo sien the beg manuschuno mujungot Jisure ho. 48 Sebeden Jisu tare holo, “Jhi, sahoj gor. Tor bischiaschane tore gom gorilo. Shantie jagoi.”
49 Jisu sei hodagan hode, synagog lobiot goriebuo ghorottun ek jon lunginei tare holo, “Tor jhibuo morsie. Probure hosto no lages ar.”
50 Sei hodagan suninei Jisu Jairare holo, “No dores. Bana bischias gor, mui tare gom goreim.” 51 The Jaire ghorot lunginei, Pitor, Jakob, Johon ar milie-shawhbuor bab-magun bade huno jon tar loge bidirie jebar no dilo. 52 Sei lokke thara begkune tartei buk pora oinei handon. Ar gujhi-gujhi handon ar Jisu holo, “No hannio. The no more, the ghum jar.” 53 Milie-shawhbuo morsiede thara hobor pan hinottei thara Jisure thatta gori azilak. 54 Begkunore the nigilei denar porendi, the tare adot dhorinei daginei holo, “Nagori, uth!” 55 Tar poranan aro phiri einei the jogon-togon udilo. Sebeden, the hebartei bhat tharare Jisu die bajei dilo. 56 Milie-shawhbuor bab-magune shanggadik amok olak. Hintu The hi goridie sien harore no hobartei tharare mana gorilo.