Jisure Dhoribar Temmang
Mak 14:1 -2; Luk 22:1 -2
26
Ar edogkie olo, Jisu sieni begkani hoi puronar porendi, tar sisjiogunore holo, 2 “Tumi hobor po, di dino porendi Rokkie Utchobor dinnuo ejer. Ar Munischioro Puobuore krossot dibartei dhora bajei dibag.”3 Sebeden rajguruthagurune, dhormo niomor mastorune, ar manuschunor borjonnune, Kaiapha honde moharajguruthagurbuor ghoro udonot thubeilakki. 4 Jisure dujot phajeinei, dhorinei dhori tare morei phelebartei temmang gorilak. 5 Hintu thara holak, “Utchobo lokkene tare no dhorsio. Adikkie manuschune jagulug tulibak.”
Bethaniat Jisure
Telloi Sorman
Mak 14:3 -9; Jhn 12:1 -8
6 Sei lokkene Jisu Bethani adamot pharangi Simonor ghorot elo. 7 Ekkuo miliei baari mongga tumbas tel ekkuo alabasterδ sijirit gori loinei tar sidu elo. Jisu tebilot bhat haade tar siriebuot telan guli dilogi. 8 Hintu tar sisjiogune sien deginei rak gorinei thara holak, “Ar hittei ei telan borbat pelana olode? 9 Ei thumbas telan onek mongga gori bejinei, sei tengagunδ gorib dugkiere di para gelun.”
10 Hintu Jisu sien suninei tharare holo, “Miliebuore hittei bojong mone goror? Haron the daw mortei gom ham gori dilo. 11 Haron tomar loge goribpun daw onsur agon. Hintu mui daw tomar loge onsur no theim. 12 Ei thumbas telan the mor heyet guli dilode, more garebartei sien gora olo. 13 Mui tomare soittio hodagan hongor, goda songsarot ei gom hoboran jidu prosar gortak sat, ei miliebuoi gorilode hamanio thara hoi pebak, ar sengori tare monot rageibak.”
Judar Beiman
Mak 14:10 -11; Luk 22:3 -6
14 Sebeden baro jon sisjiottun ek jon, Juda Iskariod honde sibiei, rajguruthaguruno sidu gelo. 15 The hologoi, “Mui judi Jisure tomar adhot gojei dilegi, tumi more hi diba?” Sebeden thara tirischuo rubuor tengaδ tare goni dilak. 16 Senottei, sittun dhori the Jisure dhori dibartei sujuk togar.
Probur Bellie Haanabuo
Mak 14:12 -26; Luk 22:7 -23
17 Moli-guri agullie pidie Utchobor polim dinnuot sisjiogune Jisur idu einei, tare holakki, “Rokkie Utchobor haanabuo tui hebartei ami tortei hudu jugol gori didonggoi?” 18 Jisu tharare holo, “Sohoranot ek jono sidu jeinei tare hoiogoi, ‘Amar guruthagurbuoi horte, “Mor somoibuo hai ejchie. Senottei, mor sisjiogundoi tor ghorot mui Rokkie Utchobpan paleimbi.” ’ ” 19 Jisu hoiede doge-doge sisjiogune jeinei, Rokkie Utchobor haanabuo jugol gorsiondoi.
20 Jokkene sajonnie olo, baro jon sisjio somot Jisu bhat hebartei tebilot bojilo. 21 Thara hadonde lokkene, the holo, “Mui tomare soittio hodagan hongor, tomartun ek jone more dhora bajei dibo.” 22 Sebeden thara shanggadik shuduo mu oinei, prottiek jone pujor gora dorilak, “Probu, sibie mui ni na?” 23 Ar Jisu uttor dinei holo, “Je mor loge hodorabuot ad buror, the more dhora bajei dibo. 24 Munischioro Puobuor sombonde Sastrot lega agede doge ghodi jebo. Hintu Munischioro Puobuore dhora bajei dibode sibier ugure hobal puribo! The judi jormo no odogi, tartei gom olun.” 25 Sebeden, Juda tare dhora bajei dibode sibiei holo, “Robbi, sibie mui ni na?” Jisu tare uttor dinei holo, “Tui holede doge oi.”
26 Thara hadonde lokkene, Jisu pidiegan loinei donniobad dinei hotta dilo. Sebeden pidiegan tar sisjiogunore dinei holo, “Loinei ho. Ien mor heyegan.” 27 Sebeden the golojchuo adot loinei hujhi hoda hoinei the tharare dinei holo, “Tumi iottun begkune ho. 28 Haron ien olode mor loganor nuo nioman. Jei logan onek manjior pab hema obartei dali die oie. 29 Hintu mui tomare hongor: Ikkiettun dhori mui jedog din song mor Babor rejjiot tomarloi nuo gori ien no haanggoi, sedog din song ei angguro roschan mui hedung noi ar.” 30 Sebeden thara ekkuo Itchioro baini gid ganar porendi, thara Oliv Mounnuot gelak.
Pitoror Sombonde Jisur Agami Hoda
Mak 14:27 -31; Luk 22:31 -34;
Jhn 13: 31 -38
31 Sebeden Jisu tharare holo, “Edchie reidot mortei tomar begkunor bischiaschan jhuri poribo. Haron Sastrot ien lega age,
‘Mui bera-shagol Soreiebuore mugureim, sebeden palluor bera-shagolun settera obak.’
32 Hintu more jiei tulonar porendi, mui tomartun akke-akke Galili dejot jeim.” 33 Sebeden, Pitore Jisure uttor dinei holo, “Tor harone begkunor bischiaschani jhuri poleio, mor bischiaschan hono din jhuri porido noi.” 34 Jisu tare holo, “Mui tore soittio hodagan hongor, edchie reidot radai dag no harte, tui tin bar more bharebe.” 35 Pitore Jisure holo, “Judi tor loge mor mori ja porileio mui tore shobai no bharem.” Ar sedogkie gorinei beg sisjioguneo holak.
Gethsemane Bagananot Jisu
Mak 14: 32 -42; Luk 22:39 -46;
Jhn 18:1
36 Sei porendi, Jisu tar sisjio-gundoi Gethsemane honde jaganot lungilakki. Sebeden tar sisjioguno-re holo, “Ubuot mui bor magongoi, tumi iot boi thago.” 37 Ar the tar loge Pitorore, ar Zebedior puo di jon nejeilo. the monot duge, shanggadik sintiet pora dorilo. 38 Sebeden the tharare holo, “Mor aptabuo baari sintiet porinei, morana soman olo. Iot theinei mor loge shojage thago.”
39 Sebeden the huttur durot jeinei, bukpari porinei bor magilo. the holo, “Oh mor Ba, judi sombob ole, ei golojchuo mortun neja. Hintu mor ischie doge no oinei, tor ischie doge ok.”
40 Sebeden the tar sisjioguno idu phiri einei ghume jhurtonde deginei, the Pitorore holo, “Hi bepar? A hittei tumi ek ghontaio mor loge shojage thei no paror?. 41 Tumi jagi thago ar bor mago adikkie lubbot poriba. Aptabuor jodepode mone hor hintu heyegane no der.”
42 The aro di bar jeinei bor magilogoi. The holo, “Oh Ba, judi mui no heie bade ei golojchuo neja no oi, tor ischie doge gora ok.” 43 Ar jokkene the elo, thara aro ghume jhurtonde degilogi. Haron ghume tharar sogkun meli no parton. 44 Senottei, the tharare aro phelei jeinei tin barot sei ekkui boran magilogoi. 45 Sebeden the tar sisjioguno idu phiri einei tharare hologi, “Tumi hi ejosong arame ghum jor nahi? Sawh, somoibuo ejchie, Munischioro Puobuore dhorinei pabi manjior adot gojei die awr. 46 Uduo jei. Sawh, more dhoridiebuo lungiegi.”
Jisure Dhorilak
Mak 14:43 -51; Luk 22:47 -53;
Jhn 18:2 -11
47 Ar the horte lokkene, sawh, Juda, baro jonottun ek jon sisjio siot lungilogi. Ek jhag manus horgo ar mugor dhorinei tar loge elak. Rajguruthagurune ar manuschunor borjonnune tharare padeion. 48 Sei lokkene tare dhoridiebuo sigunore the ekkan sinno dinei holo, “Mui jare sumonggoi, the sibie sie. Tumi tare dhorsio.” 49 Ar the jogon-togon Jisur mokkie jeinei tare hologoi, “Robbi, salam.” Ar the tare sumilo. 50 Hintu Jisu tharare holo, “Bhai, a hittei ele?” Sebeden thara einei Jisure dhorinei banilak. 51 Ar jhimidot Jisur loge elakke siottun ek jone ad babeinei tar horgogan hueilo. Ar the moharajguruthagurbuor dajibuor hanan beja urei habi phelei dilo. 52 Sebeden Jisu tare holo, “Tor horgogan dappuot bhorei tho. Haron je horgo dhore the horgot moribo. 53 Baro azarottun bes sorgo-dud padei dibartei, mui Babare hujoli gori no parim bili tui mone goros ni na? 54 Edogkie gori godhi no gele, Sastrot hoiede sien hingori puron obo?” 55 Sei lokkene Jisu manjior jhagkuore holo, “Mui daget ni na, tumi more dhoribartei horgoloi ar mugorloi ejchiode? Din bagene mui tomar loge mondirbuot sigkie di di roiong, sokkene tumi more no dhoro. 56 Hintu ieni begkani godhi gelode jene Sastrot munigune hoi jeionde sieni puron oi para.” Sebeden beg sisjiogune tare phelei jeinei dhei gelak.
Jisu Rajgurubuo Mujungot
Mak 14:53 -65; Luk 22:54, 63 -65; Jhn 18:12 -14, 19 -24
57 Jisure dhorsionde sigune moharajguruthagur Kaiaphar ghorot nejeion. Siot dhormo niomo mastorun ar borjonnune thubei agondoi. 58 Hintu Pitore durot gori Jisur pune-pune jeinei, moharajguruthagurbuor udonanot somilogoi. Sebeden phola pholan sebartei mondiro polischuno loge bojilogoi. 59 Sei lokkene rajguruthagurune, borjonnune ar goda sanhedrinuor manuschune Jisure mijie shakki dinei morei pheleibartei haidie togadon. 60 Onek manjie mijie shakki dineio, tare morei phelei paron para ekkano thara duj badei di no paron. Ekkano duj badei di no paranar porendi, sejot di jon mijie shakki die elak. 61 Thara holakki, “Ei Manuschuoi hoiede, ‘Mui ei Itchioro mondirbuo bhangi pheleinei aro tin dine tuli parim.’ ” 62 Sebeden moharajgurutha-gurbuoi thieinei Jisure holo, “Tui ieni ekkanio uttor no dibe? Tor biruddie ei manuschune ieni hi shakki dedon?” 63 Hintu Jisu no madilo. moharajguruthagurbuoi tare holo, “Jeda Itchior shakki gorinei mui tore hongor, amare ho, tui hi hamakkai Itchioro Puobuo Kristo oi ni na?” 64 Jisu tare holo, “Tui holede doge mui oi. Hintu mui tomare hongor, ei porendi Munischioro Puobuore Hemoda-bolabuor denedi bojsie gori agajot megsagot gori ette tumi degiba.” 65 Sebeden moharajgurutha-gurbuoi tar ursie haborani phadi pheleinei holo, “The Itchiorore sorjar! Oinnio jon shakki die amar a hittei lagette ar? Sawh, ikkunuio Itchiorore sorjadte sien tumi sunila daw. 66 Tumi hi mone goro?” Sebeden thara uttor dilak, “Tar hamakkai morana dorkar.” 67 Sebeden thara tar muonot sep phelei denar porendi tare marilak. Ar ek dagie tare suoreilak. 68 Ar thara holak, “Tui Kristo ole, muni dogkie gori amare hodei, honna tore suoreilo?”
Pitore Jisure Bharelo
Mak 66 -72; Luk 22:54 -62;
Jhn 18:15 -18, 25 -27
69 Sei lokkene Pitore udonot ek huredi boji age. Ar ekkuo sagorsie miliei tar idu einei tare hologi, “Tuio Galili hullie Jisur loge elede noi? 70 Hintu the tharar begkuno mujungot bharenei holo, “Tui horte ien mui no bujongor.” 71 Sebeden the girier barendi jeinei, aro ekkuo sagorsie miliei tare deginei, siot elakke manuschunore holo, “Ei Manuschuoio Nazareth hullie Jisur loge elo.” 72 Hintu the aro sobot heinei bharenei holo, “Mui sei Manuschuore no sinong.” 73 Ar hanekkon porendi, siot thiei elakke sigune Pitora sidu einei holakki, “Hamakkai thara dolottun ek jon oi. Haron tor gascharabuoi tore proman der.” 74 Sebeden tare the obisab dinei sobot heinei holo, “Tumi horte Manuschuore mui no sinong.” Sebeden jogon-togon ekkuo radai dag harilo. 75 Ar Pitore Jisu tare hoiede hodagan monot tullie, “Radai dag no haribar age, tui more tin bar bharebe.” Senottei, Pitore barendi jeinei gujhi-gujhi hanilogoi.