Doschuo Gabur-Milier Tulona
25
“Sokkene sorgo rejjiogan doschuo shodi gabur-miliei lemboloi nuo-jamei barsei agondoidie siendoi tulona die obo. 2 Tharar moiddie pasjon gyeni ar paschuo olakke bhul. 3 Bhulune tharar lembogun loion, hintu lembogunor loge tel no lon. 4 Hintu gyenigune tharar lembogunor loge shijirit gori tel loion. 5 Hintu nuo-jameibuo ette diri oinei, thara begkune ghume dorinei ghum gelak. 6 Ar reid sombhagot ek jone jogar parinei hode suno gelo, ‘Sawh, nuo-jameibuo ejer, nigilinei tarloi egottor ogi!’ 7 Sebeden sei beg sodi gabur-miliegun ghumottun udinei, tharar lembogun jugol gorilak. 8 Bhulune sei gyenigunore holak, ‘Amar lembogun jadon hinottei tomartun amare ekka tel bhag duo.’ 9 Hintu gyenigune uttor dinei holak, ‘Adikkie tomartei ar amattei no hulebo hinottei, di no paribong. Senottei tel bejiettun tumi hini anogoi.’ 10 Hintu thara tel hine jeionde lokkene, nuo-jameibuo lungilogi. Sebeden sodi gabur-miliegun jugol gorsie gori elak sigune nuo-jameibuor loge meitbano ghoro bidirie somilakkoi. Sebeden duoran nadilak. 11 Sei porendi, oinnio sodi gabur-milieguneo einei holakki, ‘Oh Babu, Oh Babu, amare duoran huli de.’ 12 Hintu the uttor dinei holo, ‘Mui tomare soittio hodagan hongor, mui tomare no sinong.’ 13 Munischioro Puobuo ebode sei dinnuo ar ghontabuo tumi hobor no po hinottei, shojage thei peba.Dos Talenor Tulona
14 “Haron sorgo rejjiogan edogkie: Ek jon manjie porbhajot lambe tar nijor dajigunore daginei tar dhon-sompottigani dajigunore gojei dilo. 15 Ek jon dajire the paschuo talen dilo. Sedogkie gori, the di talenδ oinnio ek jon dajire dilo. Aro ek jon dajire the ek talenδ dilo. The tharare jon bagene tharar saddio doge dinei the jogon-togon porbhajot gelogoi. 16 Sebeden jei dajibuoi paschuo talenδ peie, the sigundoi bebar gorinei aro paschuo talen bareilo. 17 Sedogkie gori, di talenδ peiede sibieio aro di talen bareilo. 18 Hintu jei dajibuoi ek talenδ peie, the madit gat hurinei tar girojchuor talennuo lugei thologoi.
19 “Onek din porendi, sei dajigunor girojchuo phiri elo. The tar talennunδ gojei dede sigun tharattun ijeb lolo. 20 Jei dajibuoi paschuo talenδ peie, the aro paschuo talen somot tar girojchuo sidu einei hologi, ‘Babu, tui paschuo talenδ more di jeios. Sah, mui aro paschuo talen bareiong.’ 21 Sebeden tar girojchuoi tare holo, ‘Sabbas, tui gom ar bischiasi sagorsie. Tui gulodok gori jinijot bischiaschan rageile hinottei, mui tore onek jinijor ugure odhihar dim. Ar tor girojchuore hujhi uo bol de.’ 22 Ar di talenδ peiede sibieio einei hologi, ‘Babu, tui more di talen di jeios, sah, mui aro di talen bareiong.’ 23 Sebeden tar girojchuoi tare holo, ‘Sabbas, tui gom ar bischiasi sagorsie. Tui gulodok gori jinijot bischiaschan rageile hinottei, mui tore onek jinijor ugure odhihar dim. Ar tor girojchuore hujhi uo bol de.’
24 “Sebeden ek talenδ peiede sibiei einei hologi, ‘Babu, tui huttieri manus mui hobor pang. Tui no huschieguno dies. Tui no shitteguno tulos.’ 25 Senottei mui tore dore, tor talennuoδ madit garei thoionggoi. Sah, eie tor talennuo.
26 “Hintu tar girojchuoi tare holo, ‘Tui dujto ar alsi sagorsie. Tui hobor pas, mui no huschieguno dieng ar biji no shitteguno tulong. 27 Sedogkie ole, tui mor talennuoδ sudi tenga duonde sidu dena osit elo. Sebeden mui phiri einei shuttun somot phelungun. 28 Senottei, tartun talennuoδ hari loinei, dos talen-bolabuore duo. 29 Haron jadtun age, tare aro bes die obo, sebeden tar alajhala obo. Hintu jadtun nei, tar agede sibieio hari luo obo. 30 Ei aw-gunor dajibuore barendi andhar jagat phelei duogoi. Siot the hani-hani dad hamere-hamere thokkoi.’
Bera-shagol Ar Jeit-shagol
31 “Jokkene Munischioro Puobuoi tar oborugkandoi, ar tar beg pobitro sorgo-dudtundoi ebo, sokkene the tar oborug singasonot bojibogi. 32 Ar beg jador manuschun tar mujungot thubo bajei dibagki. Sebeden, shagol soreiebuoi tar jeit shagolunottun bera-shagolun pharok gorede dogkie gori the tharare tharattun pharok goribogi. 33 Bera-shagolun denedi the thobogi ar jeit shagolun bhangedi the thobogi. 34 Sebeden Rajabuoi denedi bojsiegunore hobo, ‘Mor Babe asirbad diegun ejo. Itchiore songsar sristi gorsiede lokke tomartei jugolei dede rejjiogan logi. 35 Haron mor ped purinei more hebar bhat tumi duo. Mui porbhajchie oinei tumi more gorba tullios. Mor pani saj gorinei tumi more pani duo. 36 Mui uttie langda elungge lokke tumi uribar habor more duo. Mui aw-sug oinei tumi more hobor dorsiogi. Mui jiel-hanat porinei tumi more hobor dorsiogi.’
37 “Sebeden dharmig manuschune tare uttor dibag, ‘Probu, homole ami tor ped purinei tore hebar bhat diei die? Ar homole tor pani saj gorinei ami tore hebar pani diei die?” 38 Homole tui porbhajchie oi thagke ami tore gorba tullie die? Ar homole tore uttie langda deginei uribar habor ami tore diei die? 39 Ar homole ami tore aw-sugot ar jiel-hanat deginei hobor dhorsieidie?’ 40 Ar Rajabuoi sokkene tharare hobo, ‘Mui tomare soittio hodagan hongor, mor ei bego niroit bheibuore je mor nange ieni goridide, the more gori didede dogkie obo.’
41 “Sebeden bhangedi igunoreio the hobo, ‘Obisab heiegun! Diabolatteiδ ar tar dudtunottei Itchiore jugolei dede ononto agunanot mor iottun jo. 42 Haron mor ped purinei hebar bhat tumi more no duo. Mor pani saj gorinei more hebar pani tumi no duo. 43 Mui porbhajchie oi thagke tumi more gorba no tulo. Mui uttie langda gori roinei tumi more uribar habor no duo. Mui aw-sug ar jiel-hanat thagke tumi more hobor no dorogoi.’
44 “Sokkene thara tare uttor dibag, ‘Probu, homole ami tore ped pora, pani saj, porbhaj gorte, uttie langda gorinei, aw-sug ar jiel-hanat deginei lobiot no goridie?’ 45 Sebeden the tharare uttor dinei hobo, ‘Mui tomare soittio hodagan hongor, mor ei bego niroit bheiunottun ek jonore tumi mor nange ieni gori no duo hinottei, ieni tumi more gori no duo.’ 46 Ar igune aw-phurondi sastiganot jebak, hintu dharmig manuschun ononto jibono jaganot jebak.”