Jugor Sejo Sinnogani
Mak 13:1 -37; Luk 21:5 -36
24
Sebeden Jisu Mondirbuottun nigili jadte lokkene tar sisjiogune Mondirbuor dalanani tare degei dibartei elak. 2 Jisu tharare uttor dinei holo, “Tumi ieni begkani no degor? Mui tomare soittio hodagan hongor, tumi degotte sei soga-sok sillun ekkuoio soga-sok gori thedak noi. Thara beg soga-sok sillun lugimari phelei dibag.”3 Sei porendi, Oliv mounnuot Jisu boji thagke, tar sisjiogune nibirot tar sidu einei Tartun pujor gorilakki, “Homole sieni ghodi jebo, tui amare ho? Tui ebede lokkene hi sinno thebo ar jugor sejot hi sinno thebo?”
4 Sebeden, Jisu tharare uttor dinei holo, “Huno jone tomare thogei no paron para uijkare thagkuo. 5 Haron onek jone mor nange einei hobakki, ‘Mui deie Kristo.’ Ar thara onek jonore thogeibakki. 6 Ar tumi judduor hobor suniba, judduor hoda mue-mue gorte suniba. Hintu sieniloi tumi bhokkol no heio. Haron sieni begkani hamakkai ghodi ja poribo. Hintu tobuio jugor thuman edo noi. 7 Haron ek jade oinnio jador biruddie obak, ar ek rejjioi oinnio rejjior biruddie judduo goribak. Jagai-jagai bhadorad poribo, bhujol bebo ar aw-sin ruk biedi jormeibo. 8 Sieni begkani guro ode ped pirie gorede dogkie gori arambo obo. 9 Sokkene tomare dug-hosto dibartei manjiore dhora bajei dibag ar tomare morei pheleibak. Mor nanganottei beg jador manjie tomare hos no pebak. 10 Ar Sokkene onek jone bischiaschan phelei dinei, ek jone oinnio jonore dhora bajei diedi goribak, ar bis dega-degi obak. 11 Ar onek bhes dhorsie muni nigilinei, onek jonore thogeibak. 12 Niom saragan bari jebo hinottei, onek jonor hospanagan jurei jebo. 13 Hintu je thumsong thori thei paribo, tare uddhar gora obo. 14 Beg jadtuno sidu shakki ijebe ei Itchioro rejjior gom hoboran goda songsarot prosar gora obo. Sei porendi jugor thuman ebo.
15 “Senottei, muni Daniele hoi jeiede, ‘Itchiore bis degede nas goriebuoi’ pobitro jaganot thieibogi.” (Je ien madai the orthogan buji lok.) 16 “Sokkene Judea dejot agonde sigune moununot dhei jadok. 17 Je salo ugure thebo, ghoro bidiriettun hono poja nigilei anibartei the no lamokki. 18 Je hedot thebo, the tar haboran anibartei phiri no jok.
19 “Hintu sokkene pedoli miliegunor ar hujhi pormagunor hobal puribo! 20 Tumi dhei jei pebade dinnuo jarhallie bah, Jireni Dinnuot no oi para bor mago. 21 Haron, sokkene edogkie dongor uttiesar obo, jien pittimigan sristi oiede siottun dhori ejosong ekbaro lagot pa no oi, ar huno din sedogkie noio obo. 22 Sei dinnun judi Itchiore homei no diduo, huno jonor bajibar no thelun. Hintu Itchiore bei tulliede sigunottei, sei dinun homei die obo. 23 Sei lokkene, huno jone judi tomare hon, ‘Sawh, iot Kristo age,’ bah, ‘Siot age,’ sien bischias no gorsio. 24 Haron Sokkene nogoli kristo ar nogoli muni bar oinei, manjiore thogeibartei, thara dangor dangor sinno ham ar amok ham degebakki. Sombob ole, Itchiore bei tulliegunoreio thogeibak. 25 Suno, mui tomare akke dhori holung.
26 “Senottei, thara judi tomare hon, ‘Sawh, the moruobomit age,’ tumi sidu no jeio! Ar thara judi tomare hon, ‘Sawh, the bidirie gudhibuot age,’ sien tumi bischias no gorsio. 27 Haron pugendi debai jhimilele pojimendio phor oidie dogkie gori, Munischioro Puobuoi ebode lokkeneio sedogkie obo. 28 Haron, jiot poshu mora than, siot dhoba sillun eksomare thubon. 29 Sei lokkene, sei uttiesar dinun ghodi jebo io, belan andhar obo ar, junone jun phor no dibo. Taragun agajottun jhuri poribakki. Ar agajor hemodagani digdigie jebo. 30 Sebeden, Munischioro Puobuor sinnogan agajot dega dibogi. Sei lokkene, songsaro beg jador manjie abiles hebak. Munischioro Puobuore agajot hemodaloi ar birat oborug gori meg sagot gori ette thara degibak. 31 Ar birat begolo roloi the tar sorgo-dudtun padei dibo. Sorgo-dudtune sero hittettun, ar agajor ek hunottun dhori aro ek hunottun song tar bei tulliegun eksomare thubeibak.
32 “Ar dumur gajchuottun tulona hoda sigi lo. Jokke sigon dhelagunot hujhi dikh nigilinei pada phudo doribo, sale, gorom din ejer bili mone gorsio. 33 Ei sedogkie gori jokke ieni ghodi jade degiba, sokkene tumi buji paribade somoibuo hai ejchie, ar duorot agegi. 34 Mui tomare soittio hodagan hongor: Sieni begkani ghodi no gele, ei jugko lugi jedo noi. 35 Sorgo ar pittimigan lugi jebo, hintu mor hodagani huno din lugi jedo noi.
Jisu Adikkie gori Ebo
36 “Hintu sei dinnuor ar sei somoibuo huno jone hobor no pan. Sorgot sorgo-dudtuneio hobor no pan, hintu bana mor Babe hobor pai. 37 Noar amolot jeannie elo, Munischioro Puobuo ebode lokkeneio thik sedogkie obo. 38 Haron panibannuor agendi, Noa bor jahajchanot sommiegoidie lokkene song, manuschune haba-daba gorsion, bo annion ar bo diedi gorsion. 39 Panibannuo no eje song thara hobor no pan. Sebeden pani bane tharare begkunore bureie phellie. Munischioro Puobuoi ebode lokkeneio thik sedogkie obo. 40 Sei lokkene hedot di jone ham gorte, ek jonore tuli neja obo, ar ek jonore phelei ja obo.
41 “Dibie miliei dingit bara bande, ek jonore tuli neja obo ar ek jonore phelei ja obo.
42 “Tomar Probuie hon somoie ebo tumi hobor no po hinottei, shojage thago. 43 Hintu tumi ien hobor po daw. Ghoro girojchuoi judi surbuo ebode somoibuo hobor pedo, the subi theinei tar ghoran huno din sur obar no dilun. 44 Senottei, tumio jugol gori thei peba. Haron aza no gorode lokkene Munischioro Puobuoi ebo.
45 “Honna bischias-joggio ar gyeni banidaji sei? Sibiere tar girojchuoi tar ghoro daetto dibo, ar the tharare okto mojim hebar dibo. 46 Girojchuo ele tar dajibuor sedogkie gorte degilegi, sei dajibuo hoballie obo. 47 Mui tomare soittio hodagan hongor: The tare tar beg dhon-sompottiganir ugure odhiharibuo banebo. 48 Hintu sei bojong dajibuoi judi mone-mone hoi, ‘Mor girojchuo harai edo noi,’ 49 ar the tar somarsie sagorsiegunore mara arambo gore ar mod heiegundoi mod bhang hele, 50 sei dajibuor girojchuo the asha no gorede dinnuot ele, ar the aw-sedono oktot lungilegi, tar girojchuoi tare di hotta goribogi. 51 Ar the tare di hotta gorinei phagaraguno jagaganot phelei dibo. Siot the dad hamere-hamere hanibo.