Pharisiguno Sombonde
Mak 12:38 -40; Luk 20:45 -47
23
Sebeden Jisu manjior jhagkuore ar tar sisjiogunore holo, 2 “Dhormo niomor mastorunore ar Pharisigunore Mosir odhiharo jaganot bojon. 3 Senottei, thara jieni hon sieni begkani gorsio ar dorsio. Hintu thara jieni goron sieni tumi no gorsio. Haron thara hode hon, hintu thara hitchu ham no goron. 4 Haron thara nijore-nije guor bugi banenei, manjiore bugei duon. Hintu thara bugibar ole, tharar ekkuo angulo no laran. 5 Manjie tharare debartei thara beg hamani goron. Haron tharar tabittun dangor goron ar tharar haboro judogun birat-birat gori tangan. 6 Haana-meitbanot begottun gom jaga ar synagogot, tharattun bojibar begottun moillioban jaga porane mage. 7 Ar ade-bazare manjiortun tharar salam hebar mone hoi. Manjie jene tharare ‘Robbi, Robbi,’ hon para tharattun mone hoi. 8 Hintu tomare manjie ‘Robbi’ dagon para gori no thagkuo. Haron tomartun ek jon Guruthagur age, ar sibie olode Kristo. Ar tumi begkun olade bhei. 9 Ei pittimit harore ba no dagko. Haron tomar Bab olode ekkuo gori, sorgot agede sibie. 10 Ar manjie tomare mastor no hodok. Haron tomartun ek jon gori guruthagur age, sibie olode Kristo. 11 Hintu tomar moiddiettun bego dangorbuo obode tomar sagorsiebuo. 12 Je nijore-nije dangor holai, tare niroit gora obo, ar je nijore-nije niroit gore, tare dangor gora obo.
13 “Oh phagara dhormo niomor mastorun ar Pharisigun, tomar hobal puribo! Haron manjiortei sorgo rejjioganor duoran bondo goridio, ar tumi nijeio no somo. Ar manjie somodondoidie sigunoreo somibartei no duo. 14 Oh phagara dhormo niomor mastorun ar Pharisigun, tomar hobal puribo! Haron tumi rani-milieguno ghorani hari lo. Barendi degebartei lamba-lamba gori bor mago. Senottei tumi shanggadik sasti peba.”
15 “Oh phagara dhormo niomor mastorun ar Pharisigun, tomar hobal puribo! Haron, tumi ek jon jadot bhoreibartei, thogeibartei muro ar sagoro uguredi bero. Jokkene tumi jadot bhoreibaδ, sei manuschuore tomartun di dunuo norogor agunot tumi tare pelo.
16 “Oh han murubbigun, tomar hobal purok! Haron tumi hode, ‘Mondirbuo shakki gori sobot hele hitchu noi. Judi Mondirbuor sonagani dhorinei sobot hele, tar sobottanot the bana jebo.’ 17 Oh han behuppun! Hubon bes mollioban, sonagan bes mollio nahi, sonagan pobitro gori dede Mondirbuo bes mollioban? 18 Ar tumi hode, ‘Ek jone judi palliengan dhori sobot hele hitchu noi. Hintu ek jone judi palliegano ugure jinijchani dhorinei sobot hele tar sobottanot the bana jebo.’ 19 Oh han behuppun! Hubon bes mollioban, dali dibar jinijchani nahi, dalibuo pobitro gori dede palliengan? 20 Senottei, je palliengan dhorinei sobot hai, the palliengan, ar palliengano ugure beg jinijchani dhorinei sobot hai. 21 Ar je mondirbuo dhorinei sobot hai, the mondirbuo ar mondirbuot thaidie sibie dhorinei sobot hai. 22 Ar je sorgo shakki gorinei sobot hai, the Itchioro singasonan ar siot bojede sibiere dhorineio sobot hai.
23 “Oh phagara dhormo niomor mastorun ar Pharisigun, tomar hobal puribo! Haron tumi lungphul, pudina ar jirie dos bhagor ek bhag dan goro. Hintu tumi niomor dorkari hodagani jieni olode, soittio bijieran, doyegan ar bischiaschan bad duo. Oinnio hamani no gorsie gori phelei no jeinei ieni tomar gorana osit elo. 24 Oh han murubbigun! Tumi pugigun shaginei uttuon gilor.
25 “Oh phagara dhormo niomor mastorun ar Pharisigun, tomar hobal puribo! Haron tumi goloj ar bajon-hodora barendi shap goro. Hintu bidirendi ien olode lube ar aw-dharmigkoi boron. 26 Oh han Pharisigun! Bajon-hodoragun akke bidirendi dhoio na, barendio poriskar on para.
27 “Oh phagara dhormo niomor mastorun ar Pharisigun, tomar hobal puribo! Haron tumi olade gour dhub-dhub gori hos-sorei duonde dogkie barendi sele doul, hintu bidirendi sele, bana mora manjior aar, ar gin gore para. 28 Thik sedogkie gori, tumio manjior samne ugure-ugure degte dharmig, hintu bidirendi ole phagaraloi ar niom saraloi boron oi ago.
29 “Oh phagara dhormo niomor mastorun ar Pharisigun, tomar hobal puribo! Haron tumi munigunottei guor bano ar dharmig manjiortei sojanhola doul gorinei shajo. 30 Ar tumi horte, ‘Judi amar buro-burigunor amolot ami thedong, sei munigunore lo phelei denat ami no mijeilongun.’ 31 Senottei, munigun hun gorsionde sigunor puogun tumi bili tumi nijore-nije shakki ola. 32 Salen, tomar buro-burigune gorsionde sien purei duo. 33 Oh bijollo sabpun, ar bijollo sabor bongsogun! Norogo agunot poribagoidie bijieranor sastiganottun tumi hingori sari pariba? 34 Senottei suno, mui tomar idu muni-gyeni ar dhormo niomor mastorun dipadei dim. Tumi tharare ek dagire morei pheleiba ar ek dagire krosot diba. Ar tumi ek dagire synagogot mariba, ar ek dagire sohore-sohore uttiesar goriba. 35 Senottei pittimit beg dharmig manjior lo porsiede sienir beg dujchani tomar ugure poribo, dharmig manus Abelor lo phelei denattun dhori Barakor puobuo Zekariare lo phelei dena song, jare tumi mondir ar palliengano sere hun gorsio. 36 Mui tomare soittio hodagan hongor, begkani ikkie jugor manuschunor ugure lungibogi.
37 “Oh Jerusalem, Oh Jerusalem, munigun morei pheleiebuo, ar Itchiore tor idu dipadai die sigunore sil mela dinei morei pheleiebuo! Shorma huruoi shawhgun duot tole ragaidie dogkie gori aja gorinei rageibartei mui tor puogun onsur hodog rageibar seiong. Hintu sien tomar mone no hoi. 38 Sawh, tomar ghorani tomartei hali oi gelo. 39 Haron mui tomare hongor, jedogkon song no ho, ‘PROBUR nange ejchiede sibie baini oinei thok,’ sedogkon song tumi more no degiba.”