Melaloi Tulona
Luk 14:15 -24
22
Ar Jisu uttor dinei tulona hodaloi manuschunore aro holo, 2 “Sorgo rejjiogan olode edogkie: Ek jon rajai tar puobuottei mela-meitban gorer. 3 Ar senottei tar boleie gorbagun dagibartei, the tar dajigunore dipadelo. Hintu manuschunor ek jonoro ebar mone no holo. 4 Sebeden the aro oinnio jon daji dipadelo. The tharare holo, ‘mui boleiongge gorbagunore hogoi, “Suno, mui ikkie bhat sara gorsiong. Bor damara goru ar pokta-pokta poshugun habinei jugol gorsiong. Senottei meitbanot ejo.” ’ 5 Hintu thara hono jone hando no gorinei tharar nijor-nijor hamot gelak. Ek jone tar hedot gelo, ar ek dagie tharar bebaro jagat gelak. 6 Ar ek dagie siot elakke sigune dajigunore dhorinei thajei marinei morei pheleilak. 7 Jokkene rajai sien sunilo, the sei manuschunor ugure asarjio rak olo. Sebeden, tar sonniogunore sien gorsionde manuschunore nas gorinei tharar adamanio puri phelei dibartei the dipadelo. 8 Sebeden rajai tar dajigunore holo, ‘Bhat sara olo. Hintu mui boleiongge gorbagun ebar lak noi. 9 Senottei podo dojorot jo, manus jare degogoi tharare melat bhat hebartei dagi anogoi.’ 10 Ar sei dajigune podot jeinei jigun degkuondoi sigun gom bojong manus, thara mela ghoranot boron gori thubeilakki. Sigune bhat hebartei bojilakki.11 “Hintu jokkene melat bhat hebartei boi agonde sigunore sebartei rajai mela ghorot somilogi, mela pojak no ursie ek jon manus the degilo. 12 Ar rajai sei manuschuore holo, ‘Bhai, a hingori tui iot mela pojak no ursie gori sommoschi?’ Hintu sei manuschuoi madi no parilo. 13 Sebeden rajai dajigunore holo, ‘Tare adhot-thengot baninei barendi andhar jagat phelei duogoi. Siot the dad hamere-hamere hanibo.’ 14 Haronan olode edogkie, Itchiore dagkie manuschun olakke ektal. Hintu bei tullie manuschun olakke gulodok gori.”
Kaisarore Hajana Dena
Mak 12:13 -17; Luk 20:20 -26
15 Sebeden Pharisigune nigili jeinei Jisure tar hodat tare phajeibartei huobula gorilak. 16 Sebeden tharar sisjiogun ar Herodor manuschun somot Jisur sidu dipadenei, sigune Jisure holak, “Guruthagur, tui soittio manus ar jodepode gori Itchioro hoda tui sigkie dede harore no dhoraschie ami hobor pei.” Haron tui manjior barendi ien no sas. 17 Senottei, tui amare ho, tui ien henjan bujos? Niomor doge Kaisarore ami hajana diduong ne no diduong?” 18 Hintu Jisu tharar bojong monani hobor peinei tharare holo, “Oh phagaragun! A hittei more joga sor? 19 Manjie hajana duonde poijiebuoδ More degogi.” Sebeden thara ek denariδ tare dilakki 20 Jisu tharare holo, “Ibie har subhi, ar iot har nang legkie age?” 21 Sebeden thara uttor dinei holak, “Sibie daw Kaisaror.” Ar Jisu tharare holo, “Kaisaror jinijchani Kaisarore duo, ar Itchioror jinijchani Itchiorore duo.” 22 Jokkene thara sieni sunilak, thara amok oinei, tare phelei jeinei siottun gelakkoi.
Neg mog Oiparana Sombonde
Mak 12:18 -27; Luk 20:27 -39
23 Ei sei dinnie, Saddukigune, jiei uduonagan nei honde sigune Jisur idu einei tartun pujor gorinei, 24 Jisure holak, “Guruthagur, Mosi hoiede judi hono jone bongso no peie gori mori gele, sei manuschuor guro bheibuoi tar boschuore loinei tar bheibuottei bongso rokkie gori douk. 25 Amar loge sedogkie sat bhei elak. Begottun bor bheibuoi mog loinei mori jeie. Hintu the huno bongso no peie gori the tar guro bheibuore tar mogkuo phelei di gelo. 26 Sedogkie gorinei tar di lombor ar tin lombor guro bheibuo loinei ar eksottie gori tharar boschuore sat bheie lolak. 27 Sei sat bheie mori janar porendi, sei rani-miliebuoi bego jere mori gelo. 28 Senottei, jiei udibagke lokkene, sei sat bheior moiddiettun the har mog obo? Haron begkune tare loion.” 29 Jisu tharare uttor dinei holo, “Sastrogan ar Itchioro hemodagano no bujinei tomar bhul oie. 30 Haron jiei udibagke lokkene thara neg-mog thedak noi ar. Thara neg-mogo lodak noi ar hintu thara sorgot Itchioro sorgo-dudtuno dogkie obak. 31 Hintu moragun jiei uduonar sombonde Itchiore tomare hi hoie, tumi sien madei no sawh?
32 “Itchiore hoiede, ‘Mui Abrahamor Itchior, Isaakor Itchior, ar Jakobor Itchior.’ Itchiorbuo daw moragunor Itchior noi, hintu the olode jedagunor Itchior.”
33 Manuschune sei sigkiegan suninei thara asarjio amok olak.
Begottun Dangor Uguman
Mak 12:28 -34
34 Hintu jokkene Saddukigune Jisur mujungot juob dibar haidie no peinei olor oion bili Pharisigune sunilak, thara eksomare thubeilak. 35 Tharar moiddiettun ek jon Niom hobor peiei, Jisure joga sebartei pujor gorilo, 36 “Guruthagur, Niomor moiddiettun begottun dangor ar gunor siliebuo hubo?”
37 Jisu tare uttor dinei holo, “ ‘Tor PROBU Itchiorbuore tor goda ontorandoi, tor goda aptabuoloi ar goda tor monandoi, tui hos pei pebe.’ 38 Sibie olode polim begottun dangor ar gunor siliebuo. 39 Ar di lombor dangor uguman olode ien, ‘Tore tui hos paschie dogkie tor paralliegunoreio hos pa poribo.’ 40 Sei dibie siliet beg niom ar beg munigunor hodagani pureie.”
Kristo Har Puo
Mak 12:35 -37; Luk 20:41 -44
41 Jokkene Pharisigun eksomare thubeilak. Jisu tharattun pujor gorilo, 42 “Kristo sombonde tumi hi mone goro? The har Puo?” Thara Jisure uttor dinei holak, “The olode Davidor Puo.” 43 The tharare holo, “Sedogkie ole, Davide a hittei Apta darai hode seiet tare ‘Probu’ hoie? Haron Davide legkiede sieni mui pujor gorongor.
44 The hoie, ‘PROBUIE, mor Probure hoie, “Tor sottrugun jedogkon song, tor thengot tole no thong, sedogkon song mor denedi boji thak.” ’