Jisu Jerusalemot Somilogoi
Mak 11:1 -11; Luk 19:28 -40;
Jhn 12:12 -19
21
Thara Jerusalemot lungibar hadallie Bethphage ada-manot lungilakki. Sebeden Oliv Mounnuor hai hurettun Jisu tar di jon sisjio padeilo. 2 Jisu tharare holo, “Tomar mujungedi adamanot jo. Tumi jebaio ekkuo gadha ar ekkuo gadha shawh bannie gori debagoi. Sigun hueinei mor idu anogoi. 3 Ar judi huno jone tomare hon, tumi tharare hoio, ‘Probur igun lagodon,’ the aro jhadi gori idu thoidie bajei dibo.”4 Siendoi munibuor darai huo oiede hodagan puron olo.
5 “Zaion jhibore hogoi, ‘Sah, tor Rajabuo tor idu gadha ugure sorinei ejer. The olode nombro oinei dut heie gadha shawh ugure sorinei ejer.’ ”
6 Senottei, sisjiogune jeienei, Jisu tharare ugum dede doge gorilakkoi. 7 Thara gadhabuo ar gadha shawhbuo aninei tharar haborani sigunor ugure bijei dilak. Sebeden Jisure sienir ugure bojeilak. 8 Ar shagor manjie tharar haborani podot bijei dilak. Ar hoiek jone gajottun dhela habi aninei podot bijei dilakki. 9 Sebeden Jisur mujungedi jadonde sigune ar pijendittun ettonde sigune joi jogar pari-pari holak,
“Davidor Puobuore hosanna!
‘PROBUR nange eiebuo donniobad gori thok!’
Begottun ugure hosanna!”
10 Jisu Jerusalem sohorot somineigoi, beg manuschun joul bodilak. Thara pujor gorton, “Ibie honna?” 11 Manuschune holak, “The muni Jisu, Galili dejor Nazareth hullie.”
Mondirot Jisu
Mak 11:15 -18; Luk 19:45 -48
12 Sebeden Jisu Itchioror Mondirbuot sominei, siot beja-hine goronde sigunore dabei dilo. Tengaδ bodoli duonde sigunor tebilani ar hodor bejiegune bojonde jagagani the ullei phelei dilo. 13 Jisu tharare holo, “Sastrot lega age, ‘Mor ghoran bor magede ghor huo obo.’ Hintu tumi ienore ‘dagedor haath’ banei phellio.” 14 Sebeden han ar leng Mondirot tar idu elak, ar the tharare gom gori die. 15 Hintu rajguruthagurune ar dhormo niomor mastorune tar amok hamani deginei ar Mondirot gurogune, “Davidor Puobuore hosanna,” hode suninei, tharattun rak udilo. 16 Sebeden thara Jisure holak, “Ei gurogune hi hodon tui sunor ni?” Jisu tharare holo, “Sunongor daw! Sastroie hi hoie sien tumi madei no sawh?
‘Sigon guro ar hujhi guro muottun tumi puripunnuo baini peba.’ ”
17 Sei porendi, Jisu tharare phelei jei sohorottun nigili jei Bethani adamot jeinei bha roiegoi.
Dumur Gajchuo Shugei Gelo
Mak 11:12 -14; 20 -26
18 Tar hellie beinnie the sohoranot phiri jade lokkene Jisuttun ped puri udilo. 19 Podor hure the ekkuo dumur gaj deginei the gajchuor siot gelo. Hintu the bana padagani bade ar hitchu no deginei gajchuore holo, “Tor huno din gulo no dorto ar.” Ar jogon-togon dumur gajchuo shugei gelo. 20 Sisjiogune sien deginei thara amok oinei holak, “Dumur gajchuo edok jhadi a hingori shugei gelo?” 21 Sebeden Jisu tharare uttor dinei holo, “Mui tomare soittio hodagan hongor, tumi judi bischias goro ar tomar monot shiongshama no thai, salen, bana dumur gajchuore gori paribade noi, hintu ei murobuore judi tumi ho, ‘Uguri jeinei sagorot polloi.’ Salen, sien obo. 22 Ar tumi judi bischias gele, tumi jien bor mago sien peba.”
Jisur Odhiharo Sombonde
Mak 11:27 -33; Luk 20:1 -8
23 Jisu aro Mondirot somilogoi. The sigkie dede seiet, rajguru-thagurune ar borjonune einei tare holakki, “Ieni hi odhihare tui goror? Honna tore ei odhiharan die?”
24 Hintu Jisu tharare uttor dinei holo, “Muio tomare ekkan prosonno dorim. Tumi judi more uttor duo, ieni hi odhihare mui gorongor mui tomare hom. 25 Johonor baptismagan huttun? Sien hi sorgottun nahi, manjiortun?” Thara-thara huobula gorte holak, “Ami judi hoi, ‘Sorgottun’ salen, the hobo, ‘A hittei tumi tare bischias no goro?’ 26 Hintu judi ami hoi, ‘Manjiortun’ sio, ami jonogonore dorei. Haron beg manuschune Johonore ek jon muni bili mani loion.” 27 Senottei thara Jisure uttor dinei holak, “Ami hobor no pei.” Sebeden Jisu tharare holo, “Ieni hi odhihare mui gorong muio tomare no hom.”
Dibie Puor Tulona
28 “Hintu tumi hi mone goro? Ek jonottun dibie puo agon. The tar polim puobuo sidu jeinei holo, ‘Put, edchie tui mor angguro bagananot jeinei ham gorloi.’ 29 Puobuoi holo, ‘Mui no jeim.’ Hintu porendi the mon phireinei hamot gelo. 30 The a ekkuo puo sidu jeinei sei hodagan hologoi. puobuoi tare holo, ‘Oh ba, mui jeim.’ Hintu the no gelo. 31 Sei di jonottun honna tar babor hoda dorilo sei?” Thara Jisure uttor dilak, “Polimmuoi ai.” Jisu tharare holo, “Mui tomare soittio hodagan hongor, hajana-tulliegune ar beischie miliegune tomartun akke Itchioro rejjioganot somibag. 32 Haron Johone dharmio podtan degei dibartei tomar idu ejchie, ar tumi tare bischias no goro. Hintu hajana-tulliegune ar beischie miliegune tare bischias gorsion. Ien tumi deganar porendio tomar monani no phiro ar tare bischias no goro.
Giroj Ar Sagorsiegunor Hoda
Mak 12:1 -12; Luk 20:9 -19
33 “Aro ekkan tulona hoda suno. Ek jon giroje ekkan anggur bagan tulilo. The bagananor sero-hitte tengera beri dilo. The angguro ros perebartei ekkan ghani-hol bojeibartei ekkuo gat hurilo. Ar subi dibartei tong ekkan banilo. Sebeden the hoiek jon hed goriere tar anggur baganan daw-bhagi denar porendi the bi-dejot gelo. 34 Anggur sinibar okto oinei, the tar bhagkuo anibalottei tar sagorsiegunore hed goriegunor sidu padeilo. 35 Hed goriegune tar sagorsiegunore dhorinei dhori, ek jonore marsion, ek jon morei phellion ar ek dagire sil mela duon. 36 Girojchuoi polimmunottun bes aro tar sagorsie dipadelo. Hed goriegune tharareo siennie gorilak. 37 Sebeden bego jere tar puobuore thara sidu dipadelo. The holo, ‘Thara mor puobuore sorman goribak.’ 38 Hintu hed goriegune puobuore deginei thara-thara huobula gorton, ‘Ete daw porendi sompottir girojchuo obo. Jei, ami tare morei pheleioi. Sebeden ami ei bagananor giroj obong.’ 39 Sebeden thara tare dhorinei dhori baganor barendi phelei dinei morei pheleilak. 40 Salen Baganor girojchuo ele, sei hed goriegunore hi goribogi sei?” 41 Thara Jisure holak, “The sei dujto manuschunore, begkunore morei pheleibogi ar tar baganan oinnio hed goriegunore daw-bhagi dibogi. Sigune tare okto mozim phol bhag dibag.”
42 Jisu tharare holo, “Ien tumi Sastrot no mado ni na?
‘Ghor-tulliegunor monot no porede silluo, hunot begottun gunor silluo olo. Ien PROBUIE gori dilo, amar ien sade hodog shoba lage!’
43 “Senottei mui tomare hongor, Itchiore rejjiogan tomartun hari loinei phol utponno gori parede jadtuore die obo. 44 Ar je sei silluo ugure pore, the guri oi jebo. Ar sei silluo jar ugure pore, the phagu oi jebo.” 45 Rajguruthagurune ar Pharisigune tar tulona hodagan suninei buji parilakke the tharar sombonde hor. 46 Thara Jisure dhoribar selak. Hintu jonogone Jisure ek jon muni bili mani loion hinottei thara jonogonore dorelak.