Sinno Magon
Mak 8:11 -13
16
Sebeden hoiek jon Pharisi ar Sadduki Jisur idu elak ar tare joga sebartei sorgottun ekkan sinno tharare degebartei thara magilak. 2 Hintu Jisu tharare uttor dilo, “Sajonnie ole tumi ho, ‘Agas ranga oie, hellie dinnuo gom goribuo.’ 3 Ar beinnie ole tumi ho, ‘Agas ranga oie ar debabuo hala gorsie, edchie debabuoi gom no goribuo.’ Phagaragun! Debabuoi gom goribuo na gom no goribuo tumi hobor po, hintu somoior sinnoganir orthogan tumi hobor no po. 4 Ei jugor manuschun dujto ar shanda. Tharattun sinno sebar shanggadik mone hoi. Muni Jonar sinnogan bade tharare huno sinno dega no obo.”Sisjiogunore Uij Dilo
Mak 8:14 -21
5 Sisjiogune sagoro uhule par odegoi pidie nibar puri phellion. 6 Jisu tharare holo, “Seio! Phara-sigunor ar Saddukigunor moli pokke uijkare thagkuo.” 7 Sebeden thara-thara huobula gorinei holak, “Ami pidie no ani hinottei the ei hodagan hor.” 8 Hintu thara huobula gortonde sien Jisu hobor peinei tharare holo, “Oh hom bischiasigun! Pidie neidie sombonde a hittei huobula goror? 9 Ejosong no bujotte parapang? Pas azar manjiortei paschan pidie hodagan monot tulona? Hoi lei tumi tuli loiode? 10 Ser azar manjiortei sattan pidie hodagan monot tulona? Dongor hoi lei tumi tuli loiode? 11 Pidieganor sombonde mui tomare no hongor sien tumi a hittei no bojor? Hintu Pharisi ar Saddukigunor moli pokke uijkare thagkuo.” 12 Sebeden sisjiogune buji parilakke pidie banade hamot lagande moli pokke uijkare thebartei the no hoi. Hintu Pharisi ar Saddukigunor sigkie hoda pokke uijkare thebartei the tharare horte sien buji parilak.
Probu Jisu Olode Kristo
Mak 8:27 -30; Luk 9:18 -21
13 Sebeden Jisu Kaisarea Philippi bamot lunginei, the tar sisjiogunottun pujor gorilo, “Munischioro Puobuo more manjie honna bili hon?” 14 Thara holak, “Hoiek jone hon, the baptisma gori die Johone, ar ek dagie hon, the Elija, aro ek dagie hon, the munigunottun ek jon obode.” 15 Jisu tharare holo, “Hintu tumi more honna bili ho?” 16 Ar Simon Pitore uttor dilo, “Tui olede Kristo, jeda Itchioro Puobuo.”
17 Jisu holo, “Jonar puo Simon, tui bhaggottie. Haron lo ar eragane ien tore janei no die, hintu mor sorgo Babe tore ien janei die. 18 Ar mui ien tore hongor: Tui olede Pitor, ar ei Bor Silluor ugure mui mor mondoli tulim. Padalor girie duoraneio ienore joi gori no paribo. 19 Mui tore sorgo rejjior chabigani dim. Ei pittimit tui jien bon goros sien sorgotio bon gora obo. Ar pittimit tui jien huli dios sien sorgotio huli die obo.” 20 Sebeden the tar sisjiogunore the Kristo bili harore no hobartei shokto gori mana gorilo.
Jisur Moranar Hoboran
Mak 8:31 -9:1; Luk 9:22 -27
21 Sei somoiottun dhori Jisu tar sisjiogunore ei hodagani huo dorilode je, tartun Jerusalemot ja puribo. Borjonnune, rajguru-thagurune ar dhormo niomor mastorune tare dug-hosto lageibak ar tare morei pheleibak. Hintu tin dino madat the aro jeda obo. 22 Ar Pitore tare ek huredi ninei tare goba dorilo, “Probu, Itchiore tore rokkie gorog! Siennie tor huno din no ok.” 23 Hintu Jisu muo phireinei Pitorore holo, “Soitan, mor iottun jagoi! Tui olede mor podtan bondo goridiebuo. Haron tor bhabonagan Itchiorottun no eje, hintu manjiortun ejchie.”
24 Sebeden Jisu tar sisjiogunore holo, “Je mor loge judi edo sai, salen, tar nijor monjokka no gori tar kroschan buginei mor loge ejok. 25 Haron je tar poranan bajeibartei sai, the areibo. Hintu je mortei tar poranan arai, the tar poranan thogei pebo. 26 Haron ek jone goda songsaran peinei judi tar nijor poranan areile, sien tar hi lab obo? Bah tar porananor bodoli the hi dam di paribo? 27 Haron Munischioro Puobuo tar Babor mohimagandoi ar tar sorgo-dudtun somot ebo. Sokkene the prottiek manjiore tharar hamor doge poriskari dibogi. 28 Mui tomare soittio hodagan hongor, iot hoiek jon thiei agonde igunottun Munischioro Puobuore tar rejjioganot ette no degon song mortak noi.”