Baptistma goridie
Johonor Moronan
Mak 6:14 -29; Luk 9:7 -9
14
Sei lokke Herod Tetrakoδ Jisur hobor sunilo. 2 The tar sagorsiegunore holo, “Sibie baptisma gori die Johone obode, the morattun jiei uttie. Senottei the ei amok hamani gore.”3 Herode tar bheibuo Philibor mogkuo Herodittei Johonore dhori, baninei jiel-hanat bhorei thoie. 4 Haron Johone tare hoie, “Tare loioschie ien tor niom noi.” 5 Herode Johonore morei pheleibar seie. Hintu jonogone Johonore muni bili mani loion hinottei dorelo. 6 Hintu Herodor jormo din utchob gorte Herodir jhibuoi tharar mujungot najinei Herodore mon hujhi gori dilo. 7 Senottei Herodir jhibuoi jien mage sien dibartei Herode tare sobot heinei soittio dilo. 8 Tar mai tare hu-sholla dede doge the holo, “Baptisma gori die Johonor siriebuo ekkuo bajonot gori more degi.” 9 Sebeden rajar monot dug olo. Tobuio tar sobottanottei ar tar loge bojchionde sigunor harone the tare dibartei ugum dilo. 10 Ar the manus dipadenei jiel-hanat Johonor siriebuo haba bajei dilo. 11 Thara Johonor siriebuo ekkuo bajonot gori aninei miliebuore dilakki. Sebeden miliebuoi siriebuo loinei tar mare dilogoi. 12 Johonor sisjiogune einei Johonor madalabuo ninei garelakkoi. Sebeden thara jeinei Jisure hobor holakkoi.
Pas Azar Manjiore Habana
Mak 6:31 -44; Luk 9:11 -17;
Jhn 6:1 -13
13 Johonor moronor hobor Jisu suninei, the siottun ekkan nawt gori gai-gai ekkan niribili jagat gelo. Hintu manuschune ien suninei, sohoranittun torbuo tar pije-pije gelak. 14 Jokke Jisu nawganottun udilogoi, the jhag-jhag manus degilo. Tharare tartun sit purinei tharar aw-sugkiegun the gom gori dilo. 15 Beillie-beillie oinei, tar sisjiogun tar idu einei holakki, “Ien olode jonosunnio jaga, ar belano jeiegoi. Adamanit jeinei tharattei hebar jinij hini loi parondoi para manuschunore tui ja bajei de.” 16 Hintu Jisu tharare holo, “Tharar ja no puribo. Tumi tharare hiju hebar jinij duo.” 17 Ar thara tare holak, “Amattun bana paschan pidie ar dibie maj agonde.” 18 Sebeden Jisu holo, “Sieni mor idu ano.” 19 Hero ugure bojibartei manuschunore the ugum dilo. Sebeden the paschan pidie ar dibie maj adot lolo. Agajo hitte muo gori Itchiorore Jisu donniobad dilo. Ar manuschunore dibartei pidiegani the hotta gorinei tar sisjiogunore dilo. 20 Sebeden begkune helak ar begkunor ped bhorilo. Manuschune hei-hai ugursie pidie ar maj sisjiogune tuli lolakke boron baro lei. 21 Pidie heiegun olakke miliegun ar gurogun badgori bana morod perai pas azar.
Pani Ugure Adi Jeie Hoda
Mak 6:45 -56; Jhn 6:16 -24
22 Manuschunore the bidei gorte sagoro uhule tartun akke jei paron para, Jisu tar sisjiogunore jebartei jogon-togon nawt uduo bajei dilo. 23 Manuschunore bidei denar porendi the bor magibartei ekkuo mouno pidit udilogoi. Reid oinei the siot gai-gai elo. 24 Hintu sei somoi nawgan sagorano song moiddie elo ar jadonde mokkietun boier baar hinottei nawganot tubol abor haar. 25 Poittie amollie Jisu tar sisjiogunor idu pani uguredi adi-adi elo. 26 Sisjiogune tare pani uguredi adi jade deginei, thara shanggadik dorelak. Thara holak, “Ibie debeda!” Ar thara dore hijiek hari uttuon. 27 Hintu Jisu tharare jogon-togon holo, “Sahoj goro. Sibie mui, no doreo.” 28 Sebeden Pitore tare uttor dinei holo, “Probu, judi tui ole mui tor idu pani uguredi ei parong para ugum de.” 29 Ar Jisu holo, “Ai, ai.” Sebeden Pitore nawganottun lami, pani uguredi adi-adi Jisur mokkie ja dorilo. 30 Hintu the boier bhade deginei dorelo. Ar the dubpie-dubpie jogar parinei holo, “Probu, more rokkie gor!” 31 Jogon-togon Jisu tar adtan babeinei tare dhorilo. Ar the tare holo, “Oh hom bischias-bolabuo, a hittei tor shiongshama oie?” 32 Thara nawganot udinei, boierano thameilo. 33 Ar nawganot elakke sigune Jisure tobona gorinei holak, “Tui hamakkai Itchioro Puo.”
34 Thara sagoran par oinei, Gennesaret bamot lungilakki. 35 Sei jaganor manuschune Jisure sininei, seropala beg jaganit thara hobor padeilak. Sebeden manuschune tharar beg aw-sugkiegun tar idu anilak. 36 Aw-sugkiegunore bana Jisur ursie haboro hazat dhoribar dibartei manuschune tare hujoli gorilak. Ar aw-sugkie manjie je tare dhore the puro gom oi.