Biji Shidiebuor Hoda
Mak 4:1 -20; Luk 8:4 -15
13
Sei dinnie Jisu ghorottun nigilinei bilo parot bojilogoi. 2 Tar seropala shagor manus thubeion hinottei the ekkan nawt udinei bojilogoi. Ar beg manuschun bilo parot thiei thelak. 3 Sebeden Jisu tharare onek hoda tulona hodadi holo, “Sawh! Ek jon biji shidiei biji shidibartei gelo. 4 The biji shidi dede gulodok biji podo pazarat porilag. Sigun pheigkune einei hei phelliekki. 5 Ar gulodok biji madi padol sadara jagat porilag. Madi padol hinottei jhadi gejeilak. 6 Hintu jokke belan udinei rode shegilo, ar singor nei hinottei sidie oi gelak. 7 Ar gulodok biji hada bonot porilag. Hada bonan ojol oinei bijigunore dagi rageilo. 8 Hintu aro gulodok biji gom madit porinei phol dorilak. Hoiekkunottun ek shot dunuo, heit dunuo ar tiris dunuo gori phol dorilak. 9 Jar sunibar han age, the sunok!”10 Sisjiogune Jisur idu einei pujor gorilakki, “Tui a hittei manuschunore tulona hodadi hos?” 11 Sebeden Jisu tharare uttor dilo, “Haron sorgo rejjior gubonan buji paribartei tomare gyen die oie, hintu tharare die no oi. 12 Haron jar age tare aro bes die obo ar tar alajhala gori thebo. Hintu jar nei, tar jien age sieno tartun hari luo obo. 13 Ienottei mui tharare tulona hodadi hongge, haron, thara sade sebak, hintu buji loi partak noi. Sunde sunibak, hintu buji no paribak. 14 Muni Isaia agami hoidi jeiede hodagan puron olo.
‘Tumi sunde suniba, hintu shobai buji no pariba. Sade seba, hintu shobai buji loi no pariba.
15 Tharar monani horab oie hinottei tharar hanedi no sunon ar sogedio no degon. Siennie no ole, tharar sogedi degibak ar hanedi sunibak, sebeden tharar ontorot buji loi parinei phiribak. Sebeden mui tharare gom gori dim.’
16 “Hintu tomar sogedi tumi degor ar tomar hananiloi sunor hinottei tumi hoballie! 17 Mui tomare soittio hodagan hongor, balukjon munie ar dharmig manjie tumi jieni degor ar sunor, sieni tharaio sebar ar sunibar dab gorsion hintu thara sien no pan ar sunio no pan.
18 “Senottei biji shidiebuor tulona hodagano orthogan suno. 19 Jigune Itchioro rejjior hoboran suninei buji loi no paron sigunor obostani olode podo pazarat porsie bijigunor dogkie. Dujtobuo einei tharar ontorot shitte Itchioro hodagan nigilei nejeie. 20 Jigune Itchioro hodagan sunonar jogon-togon hujhi gori mani lon sigunor obostani olode sadara jagat porsie bijigunor dogkie. 21 Hintu tharar ontoro murot song singor nei hinottei bana hanekkon gori tigi thei paron. Jogon Itchioro hodaganottei hosto ele, ar manjie uttiesar gorilie, jogon-togon odot jhuri poron. 22 Ar hoiek jon manjior obostani olode sei hada bonot porsie bijigunor dogkie. Itchioro hodagan thara sunon, hintu thara ei halor sintiettei, dhon-sompottir lubbot baji, Itchioro hodaganore dagi ragai hinottei phola phol neie on. 23 Hintu hoiek jon manjior obostani olode sei gom madit porsie bijigunor dogkie. Itchioro hodagan sunilie buji loi paron hinottei thara phola phol on. Ek dagie ek shot dunuo, heit dunuo, ar tiris dunuo phol utponno goron.”
Dhan-hero Tulona Hoda
24 Jisu aro ekkan tulona hoda tharare hoi dilo, “Sorgo rejjiogan olode edogkie: Ek jon manjie tar hedot gom shidilogoi. 25 Hintu reidot manuschune ghum jade tar sottrubuo ei, ghomuno sere dhan-hero biji shidi di gelo. 26 Jokke ghomun udinei sijie nigililo, sebeden dhan-herani sini para gelo. 27 Sei girojchuor sagorsiegune tar idu einei tare holakki, ‘Babu, tor hedot gom shittoschie noi ni? Salen, dhan-hero bijigun huttun elak?’ 28 Ar the tharare holo, ‘Sottrubuoi shidi diegi obol ai.’ Sagorsiegune tare holak, ‘Salen, ami jeinei sieni ugure phelei didonggoi tui henjan mone goros?’ 29 Hintu malikkuoi holo, ‘Thok, thok. Dhan-herani ugurei dede adikkie tumi gomanio ugurei pheleiba. 30 Habibar okto song eksomare uttok. Sokkene mui habiegunore hom, “Akke dhan-herani hurei thoinei puri pheleibartei bona bano. Ar sebeden ghomun mor gola-ghorot bhorei thoiogoi.” ’ ”
Sorjio Biji Ar Molir Hoda
Mak 4:30 -32; Luk 13:18 -21
31 Jisu tharare aro ekkan oinnio tulona hoda hoi dilo, “Sorgo rejjiogan olode edogkie: Ek jon manjie ekkuo sorjio biji loinei tar hedot shidilogoi. 32 Sorjio bijibuo olode bijir moiddie begottun sigon. Hintu ibie dangor elo, beg shak pado gajottun bes dangor oinei jodepode gaj oi hinottei pheigkune einei dhelagunot bha gorondi.”
33 Jisu tharare aro ekkan tulona hoda hoi dilo, “Sorgo rejjiogan olode moli dogkie. Ekkuo miliei sei molibuo loinei tin leiδ moidie loi gulinei guli begkan jurebartei thoi para.” 34 Jisu sei hodagani bana tulona hodadi manuschunore holo. Tulona hoda sara tharare hitchu no hoi. 35 Sieniloi munibuor darai huo oiede hodagan puron olo,
“Tulona hoda hobartei mor muon hulim. Songsar sristi gora oiede siottun dhori gubonot thoie hodagani mui hom.”
Dhan-hero biji Tulona
36 Sebeden Jisu manuschunore dipadanar porendi the ghoro bidirie somilogoi. Ar tar sisjiogune tar idu einei holakki, “Hedot dhan-heranir tulona hodagan amare bhangi de.” 37 Ar the uttor dilo, “Biji shittede manuschuo olode Munischioro Puobuo. 38 Hedtan olode songsaran. Ghomun olakke sorgo rejjior manuschun. Dhan-herani olode soitanor manuschun. 39 Sottrubuo, dhan-hero biji shidi dede sibie olode Diabolaδ. Habibar oktogan olode jugor thuman. Habiegun olakke sorgo-dudtun. 40 Jeannie gori manjie dhan-herani thubeinei agunot puri pelan, jugor sejotio thik siennie gora obo. 41 Munischioro Puobuoi tar sorgo-dudtun dipadebo. Jienie manjiore pabot pelai, jigune pab goron ar oinnio jonoreio pabot pelan sigunore rejjioganottun eksomare tharare bhaar gori dibag. 42 Ar sorgo-dudtune tharare norogo agunot phelei dibag. Siot thara dad hamere-hamere hanibak. 43 Sebeden dharmig manuschun tharar Babo rejjiot belo dogkie jolibak. Jar sunibar han age the sunok!
Dhon Ar Mukto Hoda
44 “Sorgo rejjiogan olode edogkie: Ek jon manjie hedot lugei thoie dhon suph peinei, the aro lugei thologoi. Sebeden adik hujhie the jeinei ar tar jieni age begkani bejinei sei jagan hini lologi. 45 Sorgo rejjiogan olode aro edogkie: Ek jon bebarie doul muktuo togar. 46 Ekkuo moillioban muktuo the suph pelo. The jeinei tar jieni age begkani bejinei sei muktobuo hini lologi.
Bor Jalor Tulona Hoda
47 “Sorgo rejjiogan olode aro edogkie: Hoiek jon jalliei ekkan bor jal sagorot pheleinei nanan babottie maj bajiliek. 48 Jalan boron oinei, jalliegune jalan hulo ugure tani tulilak. Sebeden thara bojinei gom majchun harangot bhorei tholak ar bojong majchun phelei dilak. 49 Jugor sejot esannie gora obo. Sorgo-dudtune einei pabi manuschun dharmig manuschunottun pharok goribakki. 50 Sebeden sorgo-dudtune tharare norogo agunot phelei dibag. Siot thara dad hamere-hamere hanibak.”
51 Jisu pujor gorilo, “Ei hodagani tumi begkani buji parila ni?” Ar thara holak, “Oi, buji parilong, Probu.” 52 Sebeden Jisu tharare holo, “Senottei jei dhormo niomor mastorbuo sorgo rejjior sisjio oi, the olode ek jon ghoro giroje tar dhonor bhandarottun puron ar nuo jinij nigileidie sibie dogkie.”
Nazareth Adamot Jisu
53 Ar edogkie olo, Jisu sei tulona hodagan hoi phureinei the siottun gelogoi. 54 Tar nijor adamot lunginei, tharar synagogot the sigkie die arambo gorilo. Jisur hodagani suninei manuschune amok oinei holak, “Ei Manuschuoi ei gyenan ar amok ham goribar hemodagan huttun pelogoi? 55 Ei Manuschuo haligorsie ar Merir puobuo, noi ni? Jakobor, Josebor, Judar ar Simonor bheibuo, noi ni? 56 Amar loge agonde sigun tar beg bonun, noi ni? Ieni begkani the huttun pelogoi?” 57 Senottei thara Jisure bischias no gorilak. Hintu Jisu tharare holo, “Nijor adamot ar ghorot bade ek jon munie beg jagat sorman pai.” 58 Thara bischias no gorilak hinottei the siot bes amok ham no gore.