Jisu Jireni
Dinnuor Probu
Mak 2:23 -28; Luk 6:1 -5
12
Sei lokke Judaiunor Jireni Dinnuot Jisu tar sisjiogundoi pagana dhan-bhuiedi jar. Thara jade tar sisjiogune ped porai dhan sijier madagani shininei ha dorsion. 2 Pharisigune sien deginei Jisure holak, “Sah, amar Jireni Dinnuot jien no goribar mana age sien thara gorton.” 3 Hintu Jisu tharare holo, “Davide ar tar somarsiegune ped porai hi gorsion sien tumi madei no sawh? 4 The Itchioro ghoranot sominei, the ar tar somarsiegune utchorbo gorsie pidieganiδ heion. Niomo doge sei pidiegani bana dhormothagurune hei paron. 5 Ar dhormothagurune hi gorsion Mosir Niomot tumi madei seio ni? Jireni Dinnuot dhormothagurune Mondirot niom bhonggo goron. Tobuio thara ni-duji. 6 Mui tomare hongor: Mondirbuottun bes oborug ek jon iot age. 7 Hintu tumi judi ien hi hoie hobor peda, ‘Mui doyegan sang, dali no sang.’ Sebeden tumi ni-dujibuore duj badei no dilan. 8 Haron Munischioro Puobuo Jireni Dinnuoro Probu.”9 Ar Jisu siottun janar porendi tharar ekkan synagogot the somilogoi. 10 Ar sawh, siot ek jon sidie-ad manus age. Jisure dujot pheleibar pod togadon hinottei thara tartun pujor gorilak, “Jireni Dinnuot manus gom goribar niom age ni nei?” 11 Jisu tharare holo, “Tomar ekkuo bera-shagol judi Jireni Dinnuot gadot pole, honna sibiere dhorinei no tulibo? 12 Ek jon manus ekkuo bera-shagolottun bes moillio noi ni! Senottei, Jireni Dinnuot gom ham gorana osit.” 13 Sebeden Jisu manuschuore holo, “Tor adtan babei de.” Ar the tar adtan babei dilo. Jisu tar adtan oinnio gom adtano dogkie gom gori dilo. 14 Hintu Pharisigune nigili jei Jisure morei pheleibartei temmang gorilakkoi.
Itchiore Bei tullie Sagorsiebuo
15 Hintu Jisu sien hobor peinei the sei jaganottun jeiegoi. Sebeden jhag-jhag manus tar pune-pune gelak ar the begkunore gom gori dilo. 16 Ar tar hoda manjiore no hobartei Jisu tharare shokto gori mana gorilo. 17 Muni Isaiar darai huo oiede sien puron olo:
18 “Sawh, ibie olode mui bei tullie sagorsiebuo. The mor agojorbuo. Mor monan tar ugure baari hujhi. Mui tar ugure mor Aptabuo thom ar the Be-jadtunor sidu bijiero hodagan prosar goribo.
19 The torgo no goribo ar roio no saribo. Huno jone tar robuo podottun sundak noi.
20 Jedogkon song the niaiganore joi gora bajei no de, sedogkon song the ekkuo mojorsie nolhagara sini no pheleibo ar ekkan dhumoidie serago buddi morei no pheleibo.
21 Ar Be-jadtune tar nanganot asha rageibak.”
Jisu Ar Belzebula
Mak 3:20 -30; Luk 11:14 -26
22 Sebeden ek jon bhude peie manus Jisur idu anilak. Sei manuschuo hane-han ar bube-bub. Jisu tare gom gori dinei the hoda hoi parer ar deger. 23 Ar beg manuschune shanggadik amok oinei holak, “Ete Davidor Puo noi ni?”
24 Hintu Pharisigune ien suninei thara holak, “Bana Belzebulo darai the bhudtun dabei di pare.” 25 Hintu Jisu thara bhabodonde sieni hobor peinei holo, “Jei rejjiogan odosat di bhag oinei nijere-nije biruddie solilie, sei rejjiogan dongso obo. Ar jei sohoran odosat, bah, ghorbobuo odosat di bhag oinei nijore-nije biruddi solliede sei sohoran, bah, ghorbobuo bhangi jebo. 26 “Ar judi soitanore soitane dabei de, the nijore-nije biruddi obo. Salen, tar rejjiogan hingori tigi thebo? 27 Ar mui judi Belzebula darai bhud dabei duong, tomar puogune har darai bhud dabei duon? Senottei thara tomar bijier gorie odog. 28 Hintu mui judi Itchioro Aptabuo darai bhud dabei duong, salen, Itchioro rejjiogan hamakkai tomar hai ejchie. 29 “Judi ek jon boli manuschuore akke no banilie, the hingori tar ghorot somi tar pojabirie ludi loi paribo? Sebeden the tar ghorottun pojabirie ludi loi paribo.
30 “Je mor loge noi, the mor biruddie age. Ar je mor loge no thuboi the settera gore. 31 Senottei mui tomare hongor, Itchioro biruddie manjior beg pabpani ar sorjanagani mab die obo. Hintu je huno jone judi Aptabuore sorjai, salen, huno din mab die no obo. 32 Ar je Munischioro Puobuor biruddie hoda hoi, sien mab die obo. Hintu je Pobitro Aptabuor biruddie hoda hoi, sien tare ei jugkuot ar ebode jugkuoto mab die no obo.
33 “Gajchuo gome seresta gorilie guloguno gom obak, gajchuo gome seresta no gorilie guloguno gom no obak. Senottei, gulogundoi gajchuo henjannie sini para jai. 34 Bijollo sabor bongsogun! Tumi dujto hinottei a hingori gom hoda hoi pariba? Haron ontorot jien boron oi age sien muendi huo eje. 35 Gom manjie tar ontorot gom jinij thoiettun gom jinij nigilei. Bojong manjie tar ontorot bojong jinij thoiettun bojong jinij nigilei. 36 Hintu mui tomare hongor, manjie jedogkani bhainnie hoda hon, bijiero dinnuot sieni begkani thara ijeb di pebak. 37 Haron tomar hodaloi tumi ni-duji oba ar tomar hodaloi tumi duji obo.”
Sinno Sebar Magon
Luk 11:29 -32
38 Sebeden hoiek jon dhormo niomor mastor ar Pharisigune madi udilak, “Guruthagur, tui amare ekkan sinno degebartei amar mone hor.”
39 Hintu Jisu tharare uttor dilo, “Ei jugor dujto ar biebijier gorie manuschune sinno sebar magon! Hintu muni Jona sinnogan bade tharare huno sinno dega no obo. 40 Jona bor maschuor pedo bidirie tin din tin reid roiede dogkie gori Munischioro Puobuoio madi bidirie tin din tin reid thebo. 41 Bijiero dinnuot Ninevi sohoro manuschune ei jugo manuschuno loge udinei, tharare dujot doribakki. Haron, Jona prosar gorinei, thara monani phireion. Ar sawh, Jonattun bes dangor iot ek jon age. 42 Bijiero dinnout, Dokkino Ranibuoi ei jugo loge udinei tharare dujot doribogi. Haron, Solomon rajar gyeno hoda sunibartei pittimir thumortun the ejchie. Ar sawh, Solomon rajartun bes dangor iot ek jon age.
43 “Jokke hajorchie aptabuoi manjiortun nigili jai. Sokkene the jireibartei shuguno jaga hotta di jeinei jireibar jaga togeinei no pelo.
44 “Sebeden the holo, ‘Mui phelei ejchiongge ghoranot phiri jang.’ Bhudtuo einei, ghoran hali, suri phellie ar sajeie gori degilogi. 45 Sebeden the jeinei tartun bes bojong oinnio sattuo bhud tar loge anilogoi. Ar thara sominei siot bojotti gorilakki. Sei manuschuor polim dojaganottun jero dojagan bes horab olo. Ei jugor dujto manuschuoro siennie doja obo.”
Jisur Mabuo Ar Tar Bheiun
Mak 3:31 -35; Luk 8:19 -21
46 Jisu hoda horte lokke, sawh, tar mabuo ar tar bheiun tar loi hoda hobartei barendi thiei agondi. 47 Sebeden ek jone tare holo, “Sah, tor mabuo ar tor bheiun tor loi hoda hobartei barendi thiei agondi.” 48 Ar the sei manuschuore je tare hoiegi tare uttor dinei holo, “Honna mor ma ar hugun mor bheiun?” 49 Sebeden Jisu tar sisjioguno hittendi angul degei dinei holo, “Sawh, mor ma ar mor bheiun. 50 Haron je mor sorgo Babor ischie doge gore, the olode mor bhei, bon ar ma.”