Jisu Ek Jon Adur Gom Gorilo
Mak 2:1 -12; Luk 5:17 -26
9
Senottei Jisu nawt udinei sagoran par oinei tar nijor adamot elo. 2 Ar sawh, manuschune sokkene ek jon ajorchie pirellie padi ugure palgit porei tar idu bhaar gori anilak. Ar Jisu sei manuschunor bischiaschani deginei, the ajorchie pirelliebuore holo, “Put, mon shanti gori thak. Mui tor pabpani mab dilung.” 3 Ar sawh, siot hoiek jon dhormo niomor mastorune thara mone-mone hodon, “Ei Manuschuoi Itchiore sorjar.” 4 Ar Jisu thara mone-mone hodonde ien buji parinei, tharare holo, “Tumi mone-mone a hittei bojong bhabor? 5 Hubon hode juit obo, ‘Mui tor pabpani mab dilung,’ bah ‘Udinei adi ja’? 6 Hintu Munischioro Puobuottun pabpani mab goribar pittimit odhihar age. Sien tumi hobor pebartei ien mor gora porer. Sebeden Jisu ajorchie pirelliebuore holo, “Uth, tor padibuo tulinei tor ghorot ja.” 7 Sebeden manuschuoi udi tar ghorot gelogoi. 8 Manuschune ien deginei amok olak ar esannie hemoda manjiore dede Itchiorbuore baini gorilak.Jisu Mothire Dagilo
Mak 2:13 -17; Luk 5:27 -32
9 Ar Jisu siottun jade Mothi nange the ek jon manus degilo. The hajana tulede ghoranot boi age. Jisu tare holo, “Mor loge ai!” Sebeden Mothi udi tar loge gelo.
10 Ar edogkie olo, Jisu ghoro bidirie bhat poiot boitsiede lokke, sawh, onek hajana-tullie ar pabi manus einei Jisur ar tar sisjiogunore loge hebartei bolakki. 11 Pharisigune ien deginei, thara Jisur sisjiogunore holak, “Tomar guruthagurbuoi hajana-tullie pabigunor somare a hittei bhat haar?” 12 Hintu Jisu sien suninei holo, “Ni-rugi manjiortei daktor no lage, hintu aw-sugkiettei daktor lage. 13 Tumi jeinei ei orthogan Sastrottun shigi logi, ‘Doyegan sang, dali no sang.’ Haron mui dharmig manuschun dagibartei no ejong, hintu pabottun mon phiran para, pabigun dagibartei mui ejchiong.”
Ubos Thanar Sigkie
Mak 2:18 -22; Luk 5:33 -39
14 Sebeden Baptisma gori die Johonor sisjiogun Jisur idu einei tare holak, “Ami ar pharasigune ubos thei. A hittei tor sisjiogune ubos no than?” 15 Ar Jisu tharare holo, “Nuo-jameior loge thele tar somarsiegune monot dugot thebak parapang? Hintu dinun ebag, sebeden nuo-jameibuore tharattun pharok gori neja obo, sokkene thara ubos thebak.
16 “Huno jone puron haborot mar no gallie nuo haborloi tali no duon. Haron nuo taligandoi puron haboran tana jei phadagan ojar obo. 17 Ar huno jone taza angguro ros puron samarar holliet no bhoran. Judi bhorele, taza angguro roschane puron samarar holliebuo phulei phadi phelebo. Angguro roschan nigili jebo ar samarar holliebuo borbat obo. Taza angguro ros nuo samarar holliet bhorana, sebeden duo pod gome gori thebo.”
Roga Milie Ar Mora
Milie-Shawhbuo
Mak 5:21 -43; Luk 8:40 -56
18 Jisu sei hodagani tharare horte lokke, sawh, ek jon synagog lobiot gorie tar idu einei the nije Jisur mujungot bhug pari salam gori porinei holo, “Mor jhibuo ikkie molode, hintu tui einei tor adtani tar ugure tuli dile, the aro jeda obo.” 19 Sebeden Jisu udi tar pune-pune gelo ar tar sisjioguneo tar loge gelak.
20 Ar sawh, siot ekkuo baro bojorchie ridupirie-bola milie elo. The Jisur pije-pije einei tar haboro hazat dhorsiegi. 21 The mone-mone holo, “Mui bana tar haboran dhorilieo gom om.” 22 Ar Jisu pijendi rini seinei tare deginei holo, “Jhi, sahoj gor, tor bischiaschane tore gom gorilo. Ar sei lokkettun dhori miliebuo gom olo.”
23 Ar jokke Jisu synagog lobiot-goriebuor ghoro bidirie somilogoi, the bashi-bajeiegunore ar joul gortonde manuschunore degilogoi. 24 The tharare holo, “Pod duo! Milie-shawhbuo daw no more the daw ghum jar.” Sebeden thara tare azilak. 25 Manuschunore the barendi nigilei denar porendi, milie-shawhbuoi agede gudhibuot Jisu sominei tare addot dhorinei sebeden milie-shawhbuoi udilo. 26 Ei hoboran sei bamot goda shidie gelo.
Jisu Ar Di Jon Sog Han
27 Ar Jisu siottun jadegoi dijon han manjie ro sari-sari, tare dagi-dagi tar pune-pune jadon, “Davidor puo, tui amare doye gor.” 28 Ar the ghoro bidirie sominei, han manuschune tar idu elak, sebeden Jisu tharare holo, “Ien mui gori parim bili tumi bischias goro ni?” Thara tare holak, “Bischias gori, Probu.” 29 Sebeden Jisu tharar sogkun dhori dinei holo, “Tumi bischias gorode doge-doge ok.” 30 Ar tharar sog gom olak. Sebeden Jisu tharare shokto gori uij dinei holo, “Seio, ien harore no hoio.” 31 Hintu thara siottun nigili jeinei tar sombonde hoboran sei bamot beg jaganit phogodang gori dilak.
Jisu Ar Ek Jon Bup
32 Sei dijon manus jadondoidie lokke, sawh, hoiek jon manjie ek jon bhude peinei madi no parsie manus Jisur idu anilak. 33 Ar Jisu bhudtuo dabei denar porendi, amad oi roiede manuschuoi hoda hoi parilo. Sebeden manuschune amok oinei holak, “Ami huno bar Israel dejot edogkie no degi.” 34 Hintu Pharisigune holak, “Bhudo rajar darai the bhud dabei de.”
Ham Gorie Hom
35 Jisu beg sohoranit ar adamanit jeinei synagogot sigkie dilo ar Itchioro rejjio gom hoboran prosar gorilo. Ar manuschunor beg biedigani ar beg aw-sugkani the gom gori dilo. 36 Ar the manjior jhagkun degile, tartun sit puri ude. Haron thara upai-sara oinei sintiet pori rakkoli sara bera-shagolo obostani dogkie oi agon. 37 Sebeden Jisu tar sisjiogunore holo, “Phojolani deibar jodepode shagor age, hintu ham gorie hom. 38 Senottei, phojol dieie jhumot dipadebartei phojolanir Girojchuore shokto gori hujoli goro.”