Dan-Dhormo Sombonde
6
“Hobotdar, manjiore degebar-tei tumi tharar mujungot dan-dhormo no gorsio. Judi goro, salen tomar sorgo Babottun tumi hitchu poriskari no peba. 2 “Senottei jokke tumi dan-dhormo goro, phagaragunor sannie no gorsio. Tharare manjie baini goribartei synagogot ar pode-ghade thara begol bajeinei dan-dhormo goron. Mui tomare soittio hodagan hongor, thara honatto tharar poriskarigan peion. 3 Hintu tui jokke dan-dhormo goros, Sokkene tor den adtane hi gorer tor bang adtane hobor no pok. 4 Ei sedogkie gori tor dan-dhormogan gubone die obo. Sebeden tor Babe, ghubone sei thaidie sibiei, hulomela gori tore poriskari dibo.Bor Maganar Sombonde
Luk 11:1 -4
5 “Ar tui jokke bor magos, phagaragunor sannie no goris. Manjie tharare degon para, thara synagogot ar podo dojorot thieinei bor magibar gom pan. Mui tomare soittio hodagan hongor, thara honatto tharar poriskarigan peion. 6 Hintu tui jokke bor magibie, tor gudhibuor bidirie somes. Tar porendi duoran nadinei ghubone thaidie tor Babottun bor magis. Sebeden tor Babe, ghubone sei thaidie sibiei, hulomela gori tore poriskari dibo. 7 Hintu tumi jokke bor mago, Be-jadtunor dogkie gori ortho sara hoda bar-bar hoinei bor no magkio. Haron thara mone goronde thara jokkene bar-bar hon, tharar Itchiorbuoi tharar bor maganagani sunibo. 8 Senottei tumi thara dogkie no gorsio. Tumi bor no magode tomar Babe tomar hi dorkar the hobor pai.
9 “Senottei, edogkie gori tumi bor magkio: Amar sorgo Bab, tor nangan pobitro ok.
10 “Tor rejjiogan ejok. Tor ischie sorgot jedogkie goron, ei pittimitio sedogkie gortok.
11 “Amare nitto hebar mojim bhat oi para dis.
12 “Amar ugure duj goronde sigunore mab didie dogkie, tuio amar dujchani mab goris.
13 “Amare hu-podedi no nis. Hintu bojongguottun amare rokkie goris. Haron rejjiogan, hemodagan ar mohimagan umore-umor tor. Amen.
14 “Judi tomar biruddie manjie duj goronde sieni mab duo, tomar sorgo Babeio tomar dujchani mab dibo. 15 Hintu judi tumi manjiore mab no duo, salen, tomar Babeio tomar niom bhonggogani mab no dibo.
Ubos Thanar Sombonde
16 “Tumi jokke ubos thago, phagaragunor dogkie suduo muo gori no thagkuo. Thara ubos agon gori manjie debartei tharar muoni dog-judo goron. Mui tomare soittio hodagan hongor, thara honatto tharar poriskarigan peion. 17 Hintu tui jokke ubos thas, tor muon dhoinei dhoi tel madat dis, 18 jene manjie tui ubos agos bili hobor no pan para. Hintu ghubone thaidie bana tor Babe dege para goris. Sebeden tor Babe ghubone sei thaidie sibiei hulomela gori tore poriskari dibo.
Sorgot Dhon Joma Sombonde
Luk 12:33 -34
19 “Tomar nijottei pittimit dhon joma no gorsio. Idu phuge haan, jangare dhore ar surune sominei sur goron. 20 Hintu tomar nijottei sorgot dhon joma goro. Sidu phuge no haan, jangare no dhore ar suruneio sominei sur no goribak. 21 Haron tomar dhonani jiot thai tomar monanio siot thebo.
22 “Sog olakke heyeganottei seragor dogkie. Senottei tor sog gom ole, tor goda heyegan phor obo. 23 Hintu tor sog horab ole, tor goda heyegan andhar obo. Senottei tor bidirie phoran judi andhar ole, sei andharan hodog ghur andhar obo!
24 “Huno jone di jon girojor ham gori no pare. Haron ek jonore the hinsie goribo ar ek jonore the hos pebo bah, the ek jonore agudinei ar ek jonore the bis degibo. Tumi eksomare Itchioror ar dhon-sompotti daji oi parta noi.
Sidie no Gorsio
Luk 12:22 -31
25 “Senottei mui tomare hongor: Tomar poranani bajibartei hi heba ar tomar heyeganittei hi uriba hi piniba sidie no gorsio. Poranan haiddiottun bes dorkar ar heyegan habor-suborottun bes dorkar noi ni? 26 Pheigkunore sawh. Thara noio hujuon ar noio habon Tobuio tomar sorgo Babe tharare habar. Pheigkunor darane tumi bes moillio noi ni? 27 Hintu tomartun honna sidie gorinei tar heyegan ek adδ lamba gori pare? 28 “Uron-pinonor sombonde tumi a hittei sidie goro? Mado phulun hingori dangor on bhabi sawh. Thara hamio no goron ar shuduoio no hadon. 29 Hintu mui tomare hongor, Solomonore oborug gori shajileo esannie ekkuo phulor dogkie doul odo noi. 30 Madot edchie jei herani age ar hellie suluot pheleidie obode sienire judi Itchiore sedog shajele, oh hom bischiasigun! Sittun bes tomare the no shajeibo ni na? 31 Senottei sidie no gorsio ar no hoio, ‘Hi hebong?’ Bah, ‘Hi uribong pinibong?’ 32 Be-jadtune ieni onsur togan. Ieni begkani tomar dorkar lagede tomar sorgo Babe hobor pai. 33 Hintu akke Itchioror rejjiogan ar Tar dharmigkan togo. Sebeden ieni bara, sieni begkani tomare dibo. 34 Hellier sidie hellie goribo hinottei, helliettei sidie no gorsio. Ek dinor hosto ek dinottei jodasto.