Johonor Phogodang
Mak 1:1 -8; Luk 3:1 -20;
Jhn 1:6 -8, 15 -28
3
Sei somoiot baptisma goridie Johone Judea dejor moruobomit einei phogodang gorer. 2 The hor, “Itchioro rejjiogan hai ejchie hinottei tomar monani phiro!” 3 Ei Johonor sombonde muni Isaiar darai ei hodagan ho oie,“Moruobomit ek jonor roi horte: ‘PROBUR podtan hajeinei, tar podtani uju goro.’ ”
4 Ar Johone the nije uduo hejchoi bunnie habor uri thai, ar tar homorot samarar homor pijoni pini thai. Ar the shuduo-phiring ar jharo modhu hedo. 5 Sei somoi, manus Jerusalem sohorottun, goda Judea dejottun ar goda Jordan sorar seropala jaganittun tar sidu gelak. 6 Ar tharar pabpani haam heinei Jordanot tartun baptisma lolak.
7 Hintu Johone jokke shagor Pharisi ar Sadduki tar idu baptisma goribartei ettonde degilo, the tharare holo, “Bijollo sabor bongsogun, ebode rakkanottun dhei jebartei honna tomare uij dilo? 8 Tomar monani pabottun phireio bili manjie degon para ham goro na. 9 Ar tumi mone-mone no hoio, ‘Amar bab Abrahame amattei agedo.’ Haron mui tomare hongor: Itchiore ei silunottuno Abrahamottei puo banei di pare. 10 Ikkunu gajchunor gorat hurolan thuo oie. Jei gajchuot gom gulo no doribo, sibie goschei dinedi agunot pheleidie obo.
11 “Tomar monani phireio hinottei, mui tomare jodepode gori panit baptisma gori duongor. Hintu mortun bes oborug ek jon ejer. Mui tar jodaganio boie dibar lak noi. The tomare Pobitro Aptaloi ar agundoi baptisma gori dibogi 12 Tar ghomun gome-dalei boier dinedi gola-ghorot bhorei thobartei tar hulogan adot loinei age. Hintu sobhagun huno din no morede agunot puri pheleibo.”
Jisur Baptisma
Mak 1:9 -11; Luk 3:21 -22;
Jhn 1:29 -34
13 Sei somoi Galili dejottun Jisu lungilogi. The Johonottun baptisma lobartei Jordan sorat tar idu elo. 14 Hintu Johone ien hoinei tare badha dibar selo, “Mui tortun baptisma lona dorkar, a hittei tui mor idu baptisma lobartei elede?”
15 Jisu Johonore uttor dilo, “Ikkunuttei ien goribar dena. Haron edogkie gori ami beg dharmig niomani purei dena hamakkai dorkar.” Sebeden Johone raji olo. 16 Johone Jisure baptisma gori denar jogon-togon, Jisu panittun udi elo. Ar sawh, tartei sorgogani hulidie oie. Johone Itchioro Aptabuo ekkuo hodoro dogkie oinei lambegi ar Jisur ugure portegi degilo. 17 Sebeden jogon-togon sorgottun ekkuo sobdo bhar olo, “Ibie olode mor agojor Puo, tar ugure mui baari hujhi olung.”