Binyiinə 21

Buuli lifwɔ bə shishɔ yifwɔ

Nduŋ duŋ ŋŋəŋ buuli lifwɔ bə shishɔ yifwɔ, yulahalə buuli liko bə shishɔ yiko mà laa, ə duŋ nɔ mà kə baa lə duŋ dəŋ kə. 2 Ŋŋəŋ kibalaki ki wɛɛŋ ə duŋ Jelushalɛŋ fwɔ, ki fū buh ə Chu kwuŋ, ki hlīli ki bwō ye kpɛ fwɔ nnu bə́ bwɛɛla wu gbo bəŋgəŋ nə bə nyimi. 3 Ŋ'wo die yɔɔ ə kabala yo tɨŋ gbaaŋ lə, “Bə chiini ŋəŋ, dɔhɔ kkɨŋ Chu yáa i dūŋ, kie ba bə bəne. I yáa i dūŋ bə bə́. Bə́ yáa bə́ dūŋ bəne biih, ə wu Chu kibɛɛ nnu i yáa i dūŋ bə bə́, i dūŋ Chu bə́. 4 I yá yi giaali ndəŋ mənhliŋ ə bə́ dí. Mbɛɛ yá baa lə kpe kə, ə fieŋ fidi nakə baa lə duŋ həmə ffɨŋ bəne ləə bə́ jūuli ləkə de ləkə kənə kinlogo kidi, yulahalə bieŋ bbɨŋ bi màa bi hlāa bi dūŋ bie, bi baala duŋ kə.”

5 Wu nnu i mà shii yo ə kabala bəŋ yɔɔ lə, “Bə chiini ŋəŋ, nlə nfə bieŋ binhliŋ fidiɛɛ ə bi chu bifwɔ.” I baa yɔɔ bə mi lə, “Bieŋ fieŋ fɨhŋ ə kiŋwaati mə, yulahalə biyɔɔnə bɨhŋ duŋ bi kichɛɛŋ, bbɨŋ duŋ ə bəne yii tɔŋ mə.” 6 I baa yɔɔ bə mi lə, “Ka ka kaa. Ə mi Alfa, ə mi Omega. Ə mi Kinchɔɔ, ə mi Kiŋkpee. Mbɛɛ nnu ntɔntɔ ŋɨ̀ŋ wu, nlə nnə wu ŋgwiŋ mməŋ mə fù ə fwoŋ wwuŋ wi nə̀ kinduŋh, ə i ŋwi kə hluŋnə fieŋ kə. 7 Mbɛɛ nnu i yá kah, i yá yi kənə bieŋ bɨhŋ binhliŋ ə yee bi dūŋ bə wu ye bishələ lə. N'yáa ndūŋ Chu wi, ə yee i dūŋ ŋiaa. 8 Kwaalə bə bəne bbəŋ tɔ́ŋ ŋəbə nə̀nə, maa bbəŋ bə́ dùŋ kimbemi hləŋ, bə bbəŋ bə́ bìhi bieŋ, maa bbəŋ bə́ jìi bəne, maa bbəŋ bə́ fə̀ kiwaali, maa bbəŋ bə́ fə̀ nfíŋ, maa bbəŋ bə́ chèe bə bəcheh bədi, bə bəne bənhliŋ bbəŋ bə́ kàalə yó, ŋkwo bə́ yáa i dūŋ kibuku ki bwii kkɨŋ ki fì bə muŋkaŋ mə. Ni duŋ kpe ə chá bəŋ fie.”

Jelushalɛŋ fwɔ

9 Nchinda Chu ju ə kintu ki bənchinda bə Chu bə fumanyaaŋ bie mə bbəŋ bə́ mà kənə bənchwa bə fumanyaaŋ bbəŋ bə́ mà yiila baaa bə bəŋgə fumanyaaŋ bə dɨŋ bie, ja bwo yɔɔ bə mi lə, “Bwo ŋgəŋ nnyii wə Kpɛ Fwɔ nnu i duŋ Kpɛɛ Ŋwa Nshɔŋ.” 10 I hlə jə mi ndūŋ ə kwáŋ ŋə fiana Chu mə, bee wu gəŋ ə kɔnɔ kiŋkuntaŋ kidi kindiɛɛ go. I nyii mi kibalaki ki wɛɛŋ kkɨŋ ki dùŋ Jelushalɛŋ, ki fu ə buh ə Chu kwuŋ ki hlīli ki bwō. 11 Ki màa ki hlīli nəni, kinchaa ki Chu tə̀ ə ki go ye tə lidi llɨŋ li tə̀ bə́ chèe lə Jashpa, li chàa nəni wɛɛŋ ye miajɔ lə. 12 Kibalaki kie mà kənə mbaŋ ŋkuntaŋ ndiɛɛ, fwíih yuufi ə nchɔ fwe duŋ ə mbaŋ yo go, bənchinda bə Chu yuufi ə nchɔ bəfwe duŋ ə fwíih ŋie tɨŋ. Bə́ mà bieŋna yíi ŋə bichəŋ bi Ishlael bi yuufi ə nchɔ bifwe ə fwíih ŋə mbaŋ yo go. 13 Fwíih ŋəhŋ mà duŋ wɛɛ wwuŋ kitaŋ bɛɛ tɔh, wwuŋ kitaŋ gəŋ chɨ̀ŋ tɔh, wuŋwa tɔh, maa wunhlili tɔh. 14 Tə́ ŋə kichili ki mbaŋ yo mà duŋ yuufi ə nchɔ fwe, ə duŋ bə́ bieŋna yíi ŋə bəne bə hlɨŋ bə Ŋwa Nshɔŋ bə yuufi ə nchɔ bəfwe ə tə́ ŋie go.

15 Nchinda Chu nnu i mà yɔɔ yo bə mi mà kənə kifɛhinə ə kwáŋ ə duŋ tələ kkɨŋ bə́ fə̀ bə chwaa ki ge ki kpo. Kifɛhinə kɨhŋ mà duŋ lə, i fɛhiŋ kibalaki kie bə fwíih ŋə mbaŋ ŋie, maa bimbwɔɔ bi mbaŋ bie mu. 16 Kibalaki kie mà duŋ bimbwɔɔ binua bi duŋ yəəŋ binhliŋ, budee bə kiŋgbɔɔŋkɔ maa kibəŋ ki mu kie mà duŋ yəəŋ. I hlə fɛhiŋ kibalaki kie bə tələ ki choo kiih kie, ki fu bəmaay nchuku bə gi tiŋ (1,500). Ye i fɛhiŋ lə budee bwe, bə kiŋgbɔɔŋkɔ maa kibəŋ kie, bi bu fu yəəŋ. 17 I fɛhiŋ dəŋ bimbwɔɔ bie kinchiimə ki mu duŋ bəntaŋ mbwɛɛnshɔ ə nchɔ buhlɔ (36).^ª Nchinda Chu yo mà fɛhiŋ bə kifɛhinə kkɨŋ mbɛɛ ŋkee fɛ̀hiŋ mu.

18 Bə́ mà mwee bimbwɔɔ bie bə tə́ ŋəntachuŋ ŋŋəŋ bə́ chèe lə Jashpa, kibalaki kie kibɛɛ duŋ kkɨŋ bə́ mà wɛɛ bə chwaa ki ge ki kpo ki ki. Kibalaki kɨhŋ chaa nəni wɛɛŋ ye miajɔ lə. 19 Bə́ mà jwa jwa kichili ki bimbwɔɔ bi kibalaki kie bə dɨŋ tə́ ŋəndi ŋəntachuŋ chili chili ə duŋ ŋŋəŋ ŋə kə̀nə bəkəŋ chili chili. Bə́ mà chee tə li fwii le lə Jashpa, llɨŋ li baŋ le mu lə Shafɛɛ, li chá shɔ le lə Agɛt, li chá nya le lə ɛmelad, 20 li chá shiŋ bəŋ duŋ lə Onik, li chá bəŋ buhlɔ duŋ lə Kaneliaŋ, li chá bəŋ fumanyaaŋ duŋ lə Klishɔlit, li chá bəŋ nyaaŋ duŋ lə Beli, li chá bəŋ fumayuufi duŋ lə Topa, li chá bəŋ yuufi duŋ lə Klishɔpla, li chá bəŋ yuufi ə nchɔ mwe duŋ lə Jashint, li chá bəŋ yuufi ə nchɔ fwe bəŋ duŋ lə Ametit. 21 Fwíih ŋə mbaŋ ŋə yuufi ə nchɔ fwe ŋəhŋ, bə́ mà fə bə binya yuufi ə nchɔ bifwe, bə́ jə dii li kinya mwe fə fwiih wi mbaŋ mwe mu. Je nni kibalaki kie mə duŋ nni bə́ mà fə bə chwaa ki ge ki kpo ki ki, je ye chaa wɛɛŋ gəŋ tɔ, i tə̀ ye miajɔ lə.

22 Mmà ŋkə ŋŋəŋnə ə chəŋ ntofi go ə kibalaki kie mə kə, yulahalə Baba Chu nnu i Kə̀nə yo Muŋga Munhliŋ bə Ŋwa Nshɔŋ mà duŋ chəŋ ntofi ni həmə. 23 Kibalaki kidi mà kə baa lə duŋ kkɨŋ duŋ ə kitaŋ ləkə kpii tə ə ki mə kə, yulahalə kinchaa ki Chu mà duŋ kinchaa ki kibalaki kie, Ŋwa Nshɔŋ duŋ mɔɔ kie. 24 Bitɨŋ binhliŋ yáa bi jāa ə kinchaa ki kibalaki kie mə, bəŋkɨŋ bə shishɔ yáa bə́ bwō bə kiŋkuntaŋ kibə ə kibalaki kɨhŋ mə. 25 Bə́ yá baa lə kəə fwiih wi mbaŋ wi kibalaki kɨhŋ butuu budi kə, yulahalə jɨbə yá gbee həmə kə. 26 Bə́ yáa bə́ bwō bə kiŋkuntaŋ maa kiyohi kənə bieŋ bi bitɨŋ binhliŋ ə kibalaki kɨhŋ mə. 27 Kwaalə fieŋ ffɨŋ fi dùŋ kə chaa lə yá lɛɛ lə ə kibalaki kɨhŋ mə dududu. Mbɛɛ nnu i fə̀ bieŋ biwaha ləkə nnu i kàalə yo yá lɛɛ lə mə dududu. Bəne bbəŋ bə́ yá lɛɛ kwaa ə bəne bbəŋ bə́ bieŋna yíi ŋəbə ə kiŋwaati ki Ŋwa Nshɔŋ mə, kkɨŋ bə́ bìeŋ yíi ŋə bəne bbəŋ bə́ kə̀nə kinduŋh ə ki mə.