Binyiinə 20

Nhlaa bigoŋ nchuku

Nduŋ duŋ ŋŋəŋ nchinda Chu ju go, i hlīli i bwō buh, i kə̄nə kiwɛnə ki joo kkɨŋ ki dùŋ kə kənə ki həŋgbɔŋ, bə fíaŋ yiŋkuntaŋ ə wu kwaŋ. 2 I kwo nyaŋ nni i bù ye dɔɔkɔ, i dùŋ Dɛbulu, i dùŋ dəŋ Hlaata, i kwaa bə fiaŋ ye lə yee i dūŋ mə gəŋ bwii bigoŋ nchuku (1,000). 3 Ye i kwaa lə nəni, i hlə lɛɛ yi ə joo ki nduumə kie mə nəni fululu, fwaŋ, hlə mwee biwu bi joo kie lə yee i dūŋ mə, fo mə lə nakə baa lə yee i jāa i fīhi bəne ə bitɨŋ mə kə, gəŋ bwii bwɔɔ nnu bigoŋ bie nchuku (1,000) yá ka. Bwɔɔ nnu dɨŋ bə́ yá hlooli tukwaŋ ə yi go lə i fiinə jaa kwaa ə bwɔɔ bəŋ chɛɛ.

4 Mbaa ŋŋəŋ ə bəkabala go, ə duŋ bəne bbəŋ bə́ shiila bie ə bə bəŋ duŋ bbəŋ bə́ mà nəə bənhlaa bə hlaahnə ə bə́ kwáŋ. Ŋŋəŋ dəŋ bəfiana bə bəne bbəŋ bə́ mà jiila fwoo bikuu bibə yu bə́ màa bə́ dōntə ki Jisho maa die Chu. Bəne bəhŋ duŋ bbəŋ bə́ mà kə nəə kiŋkohi kiŋkuntaŋ bə nyaŋ ŋwi gbo ye maa maami wi yo, bə́ mà kə fəə dəŋ kinyii ki nyaŋ ŋwi gbo ye ə bushi go ləkə ə kwáŋ ŋəbə go kə. Bəne bəhŋ mà fiima chu yee bə́ hlāah bəə Kleto ə bigoŋ mə nchuku (1,000). 5 Bəne bbəŋ bə́ mà fu bəhŋ ə kpe mə lə nfu ə kpe mə nnu fwii. Bəne bəŋkpi bbəŋ bə́ mà she bie mà kə fwoo ə kpe mə kə gəŋ bwii bwɔɔ nnu bigoŋ bie nchuku (1,000) mà ka. 6 Bəne bbəŋ bə́ kə̀nə kintɨŋ kiŋkuntaŋ duŋ dəŋ wɛɛŋ, ə duŋ bə́ bbəŋ bə́ kə̀nə dɔhɔ ə nfu kpe nnu fwii mə. Kpe chá fie ni kənə lə muŋga ə bə́ bəŋ kə. Bə́ yáa bə́ dūŋ bəche ntofi bə Chu bə Nchuu Fwoo nnu Chu mà kaachi yo, bə́ yáa bə́ hlāah bə bə́ gəŋ bwii bigoŋ nchuku (1,000).

Bə́ yá yi laa Hlaata

7 Bigoŋ bɨhŋ nchuku (1,000) yá ka, ə bə́ hlooli Hlaata ə chəŋ munfwa mə, 8 ə i hlə fu bwo yee i jāa i fīhi bitɨŋ binhliŋ bbɨŋ bi dùŋ ə bənchi bə mbiŋ bə bənua mə. Bitɨŋ bɨhŋ duŋ Gɔk bə Magɔk. I yá buhuŋ bwɛɛ bi ə bi fə gbo bəntɨmə ntɨmə. Bə́ yáa bə́ lə̄əŋkə bu ləəŋkənə ye choo lə ə nɔ kpɛɛli. 9 Bə́ yá fu jaa gəŋ ə mbiŋ mənhliŋ mə gəŋ kanyi ə dɔhɔ kkɨŋ bəne bbəŋ bə́ dùŋ bə Chu bə kibalaki kkɨŋ ki dùŋ tɔŋ liih. Kwaalə, bwii yá bwɔ bwo buh laa bə́. 10 Bə́ yá kwo hlaata nnu i màa i jāa yo i fīhi bə́, bwo lɛɛ wu ə kibuku ki bwii wwuŋ wi fì bə muŋkaŋ mə, ə duŋ dɔhɔ kkɨŋ nyaŋ ŋwi gbo ye bə mbɛɛ nnu i mà kaalə yo yo lə i dùŋ mbɛɛ hlɨŋ Chu. Bə́ yáa bə́ wō ŋgə həmə butuu bə bushi bwɔɔ mənhliŋ kə kaa.

Nhlaa nnu həŋgbɔŋ

11 Nhlə nja ŋŋəŋ ə kabala ju go ŋkuntaŋ i wuunə, ŋŋəŋ dəŋ mbɛɛ nnu i mà shii yo ə kabala yo bəŋ. Buuli bə shishɔ ja la wu dí, bə́ nakə baa lə ŋəŋ ə bi go ə dɔhɔ kie mə kə. 12 Ŋŋəŋ dəŋ bəne bənhliŋ bbəŋ bə́ mà kpee, bəŋkuntaŋ maa bətənə, bə́ lema ə kabala fwi. Bə́ wɛ̄ biŋwaati, wɛ kidi ə duŋ ki yíi ŋə bəne bbəŋ bə́ kə̀nə kinduŋh. Bə́ gbe bəŋkaalə bənhlaa bə bəne bbəŋ bə́ mà kpe bie, bə́ bə̄lə ye fwɔ wi mbɛɛ mà duŋ ye bə́ bieŋ lə ə biŋwaati bie mə. 13 Nɔ fwòo bəne bbəŋ bə́ mà kpe ə wu mə, bə́ bwo. Kpe bə mbiŋ bəŋkpi fwòo bəbə bəne bbəŋ bə́ mà kpee, bwo dəŋ bə bə́. Bə́ hlə yee bə́ kāalə nhlaa mbɛɛ bə̄lə ə fieŋ ffɨŋ i mà fə go. 14 Bə́ hlə lɛɛ kpe bə mbiŋ bəŋkpi ə nɔ kibuku ki bwii mə. Kibuku ki bwii wuhŋ duŋ kpe chá fie. 15 Ə yii li mbɛɛ lə nakə duŋ nə llɨŋ bə́ bieŋna ə kiŋwaati ki bəne bbəŋ bə́ kə̀nə kinduŋh mə, bə́ lɛɛ wu ə kibuku ki bwii we mə.