Bə́ nə kiŋkohi bə Chu
19
Ə fɨhŋ dɨŋ, mbu nja wo fieŋ fidi dīmi ə kitɨŋ ki buh mə ye kimɔ ki bəne kiŋkuntaŋ lə, ki gɛ̄ɛmə lə,“Kiŋkohi yee ki dûŋ bə Chu ya.
Ə wu nnu i fwòo bəne, ə duŋ wu nnu i kə̀nə kiŋkuntaŋ bə muŋga.
2 I kàalə bənhlaa biih i bə̀lə kichɛɛŋ bə je ntiiŋ.
I lɛɛla ŋgə ə kpɛ kiwaali shaŋ yo go,
nnu i maa i bīhi yo mbiŋ bə fwɔ wiih wi kiwaali we.
I chuula fie ə kpɛ mbini yo go
fie ni duŋ fie bəne biih bə nimi bbəŋ kpɛ nu mà jiila.”
3 Bə́ baa bə́ gɛ̄ɛmə lə,
“Yee Kiŋkohi dûŋ bə Chu.
Ndɨŋ mməŋ mə bìŋ mie ə kibalaki kɨhŋ go, lə yee mə bīŋ bwɔɔ mənhliŋ ŋka hləŋ.”
4 Bəcha bə mbwɛɛnfie ə nchɔ bənua maa bieŋ biŋkee bi binua bie, hlə gbe gəŋ kwe nə kiŋkohi gbaaŋ bə Chu nnu i shìi yo ə kabala bəŋ. Bə́ yɔɔ lə, “Yee fi Dûŋ lə. Yee kiŋkohi dûŋ bə Chu.”
5 Die ji hlə fu ə kabala yo mə, i yɔ̄ɔ lə,
“Bəŋ bənhliŋ bbəŋ bə dùŋ bəne bə nimi bə Chu,
yee bə dôhi Chu ya,
bəŋ bənhliŋ bbəŋ bə lɔ̀ wu ə leki ə duŋ bətənə
ləkə bəŋkuntaŋ, yee bə́ nə̂ kiŋkohi bə wu.”
Chɔnɔ ki biah li Ŋwa Nshɔŋ
6 Mbaa wo fieŋ fidi fi duŋ ye die kimɔ ki bəne, fi dīmi ye ŋgwíŋ mməŋ mə gbe lə ə fwafwa mə, mə nyieemi ye jaŋ kiŋgbaŋgba bə muŋga lə,
“Yee kiŋkohi dûŋ bə Chu,
yulahalə Baba ya Chu
nnu i Kənə yo Muŋgeni Munhliŋ i yu hlāah.
7 Yee kkə tɨ̂ŋ, kkə wò njənjə, kkə nə̀ kiŋkohi bə wu,
yulahalə bwɔɔ biah li Ŋwa Nshɔŋ baha,
Kpɛɛ Fwɔ bwɛɛla gbo wiih.
8 Bə́ nəə wu kindu kkɨŋ ki dūŋ fiɔɔŋ
ki chāa, ki tə̄, i leela.”
(Kindu kɨhŋ duŋ fwɔ wintiiŋ wi bəne bbəŋ bə́ dùŋ bə Chu.)
9 Nchinda Chu yo baa yɔɔ bə mi lə, “Bieŋ fɨhŋ lə, ‘Kintɨŋ kiŋkuntaŋ dùŋ ki bəne bbəŋ bə́ hə jaŋ bə́ ə chɔnɔ ki biah li Ŋwa Nshɔŋ mə.’” I baa yɔɔ bə mi lə, “Díe yɨhŋ lə díe yí Chu yí kichɛɛŋ.” 10 Nhlə gbe wu fwi lə nnə kiŋkohi kiŋkuntaŋ bə Nchinda Chu nu. I yɔɔ bə mi lə, “Wə kə fəə nəni kə. Nduŋ dəŋ mbɛɛ nimi ye wə lə maa bəmwaa bbəŋ bə́ lèmi ə fieŋ ffɨŋ bə́ yɔ̀ɔ ki Jisho. Yee wə nə̂ kiŋkohi kiŋkuntaŋ ə duŋ bə Chu. Fieŋ ffɨŋ bə́ yɔ̀ɔ fɨhŋ ki Jishoª ə fi kibɛɛ fi bəne bə hlɨŋ Chu màa bə yɔ̄ɔ.”
Ŋwa Nchu tɨmə ntɨmə kɨŋ bəne biih bbəŋ bə́ duŋ kə diee njənə bə wu
11 Nduŋ duŋ ŋŋəŋ buuli wɛɛma, kikwuŋ kidi kiwu lema. Mbɛɛ nnu i mà duŋ yo ə ki bəŋ bə́ chèe wu lə, Mbɛɛ nnu i Lèmi ə Die yi bəŋ, maa dəŋ lə, Mbɛɛ Kichɛɛŋ, i bwò i kàalə bənhlaa biih i tɨ̀mə ntɨmə wi ntiiŋ. 12 Díi ŋiih mà duŋ ye liniini li bwii lə, binfwili bi muŋkɨŋ duŋ wu fi kiŋaaŋkə. I mà kənə yii llɨŋ bə́ bieŋ ə wu go, mbɛɛ ju kə kələ yii le kahiŋ wu. 13 I mà duŋ i leela kindu kindiɛɛ ə duŋ bə́ hə nuula ki ə ŋgɔŋ mə. Yii llɨŋ bə́ màa bə́ chēe wu duŋ lə, Die Chu. 14 Bəne bə ntɨmə bə Chu kwuŋ bə̀lə wu dɨŋ, bə́ biŋna ə bikwuŋ biwu bəŋ, bə́ leela bindu bi fiɔɔŋ, bi chàa, bi wùunə nəni buuu. 15 Mbieelə ntɨmə ndi màa i fū wu jə, ə duŋ wu nnu i yá kɨŋ bitɨŋ mu yee i hlāah bə muŋgeni muŋkuntaŋ. I yá fwoo nyii biwɛɛ bi Chu nnu i Kə̀nə yo Muŋga Munhliŋ gbaaŋ bə bəne, biwɛɛ bi Chu bɨhŋ duŋ bbɨŋ bi fwèe gbaaŋ ye hlɔh llɨŋ bə́ chwa sháŋ mə, mbihŋ fù. 16 Ə kindu kiih go bə nyɨ́ŋ yiih go bə́ bieŋna yii liih lə, “Ŋkɨŋ bəŋkɨŋ maa Baba bəbaba.”
17 Mbaa ŋŋəŋ nchinda Chu ju go, i lema ə kitaŋ bəŋ. I màa i lēmi nəni i dīimə munyini munhliŋ mmuŋ mu tìɛŋ buh, i yɔ̄ɔ lə, “Bə bwo bumə ə chɔnɔ kiŋkuntaŋ mə kkɨŋ Chu fəə. 18 Bə yá di biŋwuuni bi bəŋkɨŋ bə bi bəche bikuu bi bəne bə ntɨmə, maa bi bəne bə muŋga, maa bi bikwuŋ bə bəne bbəŋ bə́ bìŋ ə bi bəŋ, maa bi bəne bənhliŋ bbəŋ bə́ dùŋ bənfwa bə bbəŋ bə́ dùŋ kə duŋ nə bənfwa, maa bi bəne bətənə bə bəŋkuntaŋ.” 19 Nhlə ŋŋəŋ nyaŋ ŋwi gbo ye go bə bəŋkɨŋ bə yaŋ kwe maa bəne bəbə bə ntɨmə, bə́ buma lə bə́ tɨmə ntɨmə bə mbɛɛ nnu i shìi yo ə kikwuŋ kie bəŋ bə bəne biih bə ntɨmə. 20 Lə ntɨmə gbe, i kwo nyaŋ ŋwi gbo ye bə mbɛɛ nnu i mà kaalə yo yo lə i dùŋ mbɛɛ hlɨŋ Chu. Mbɛɛ nu dùŋ nnu i màa i bwō yo i shì nyáŋ ye fwi, i fə̀ bieŋ bi ŋɨŋ gəə. Bieŋ bɨhŋ duŋ bbɨŋ i màa i fīhi bəne bbəŋ bə́ mà kənə bieeni yi nyaŋ ŋwi gbo ye, maa bə bəne bbəŋ bə́ mà nə kiŋkohi kiŋkuntaŋ bə maami nyaŋ ŋwi gbo ye. Bə́ mà lɛɛla bieŋ bɨhŋ bifwe bi dùŋ biŋkee ə kibuku kkɨŋ bwii bə muŋkaŋ fì mə. 21 Wu nnu i mà shii yo ə kikwuŋ kie bəŋ hlə gba bəne bbəŋ bə́ mà she bie bə mbieelə nnu i màa i fū yo ə wu jə, munyini munhliŋ di biŋwuuni bibə fiili chu duŋ gɛɛɛ.