Ŋgwiŋ mməŋ mə nə̀ kinduŋh
22
Nchinda Chu yo hlə nyii mi kibee ki ŋgwiŋ mməŋ mə nə̀ kinduŋh, mməŋ mə fù ə kabala Chu mə bə Ŋwa Nshɔŋ, mə bwɔ̀ mə chàa nəni wɛɛŋ ye miajɔ lə. 2 Mə bwɔ̀ nəni mə kàh je ə kibalaki kie mə kintekinte. Tiɛɛ kkɨŋ ki nə̀ kinduŋh màa ki kō ə wɛ́ɛ ŋə ŋgwiŋ ŋie mə ŋənhliŋ. Tiɛɛ kɨhŋ maa ki chɔ̄ŋ chá yuufi ə nchɔ fwe ə kigoŋ go, ki chɔ̀ŋ cha mi mi ə kpii go. ªBibiaa bi tiɛɛ kɨhŋ mà duŋ nche yyɨŋ bə́ màa bə́ ŋwūhuŋ bitɨŋ binhliŋ mu. 3 Fieŋ ffɨŋ Chu chɨŋna fi yá baa lə duŋ ə kibalaki kɨhŋ mə kə. Ə yáa ə dūŋ kwaa kabala Chu bə Ŋwa Nshɔŋ yo həmə. Bəne biih bə nimi yáa bə́ nə̄ kiŋkohi kiŋkuntaŋ bə wu. 4 Bə́ yáa bə́ ŋə̄ŋ ə bushi bwii go, ə duŋ bə́ bieŋna yii liih ə bushi bubə go. 5 Jɨbə yá baa lə duŋ kə, bə́ yá baa lə kiɛɛ kinchaa ki mɔɔ ləkə ŋwiŋ kə, yulahalə Baba Chu yáa i dūŋ kinchaa kibə. Bə́ yáa bə́ hlāah ye bəŋkɨŋ lə bwɔɔ mənhliŋ kə kaa.Jisho yu bwō bwɔɔ chɛɛ
6 Nchinda Chu yo yɔɔ bə mi lə, “Biyɔɔnə bɨhŋ lə bi kichɛɛŋ, bbɨŋ duŋ ə bəne yii tɔŋ ə bi mə. Baba Chu nnu i duŋ Chu bəfiana biih bə bəne biih bə hlɨŋ faŋna nchinda wi lə i bwo nyii bəne biih bə nimi, fieŋ ffɨŋ fi dùŋ lə fi duŋ bwɔɔ chɛɛ.” 7 Jisho yu yɔ̄ɔ lə, “Bə wo, N'yu mbwō bwɔɔ chɛɛ.” Kintɨŋ kiŋkuntaŋ dùŋ ki mbɛɛ nnu i chiee hlɨŋ Chu ni nni i dùŋ biyɔɔnə bbɨŋ bi dùŋ ə kiŋwaati kɨhŋ mə.
8 Ə mi Jɔɔŋ mbɛɛ nnu mmà ŋ'wo ŋŋəŋ dəŋ bieŋ bɨhŋ binhliŋ. Ye mmà ŋ'wolə ŋŋəŋ dəŋ ə bi go nəni, ŋgbe ə wuh ŋə nchinda Chu yo fwi lə nnə wu kiŋkohi kiŋkuntaŋ. 9 Kwaalə, i yɔɔ bə mi lə, “Wə kə mɔŋ nə kə. Nduŋ dəŋ mbɛɛ nimi, ye wə bə bəmwaa bbəŋ bə́ dùŋ bəne bə hlɨŋ Chu maa bəne bbəŋ bə́ chì biyɔɔnə ə kiŋwaati kɨhŋ mə. Yee wə nə̂ kiŋkohi kiŋkuntaŋ ə duŋ bə Chu.”
10 Nchinda Chu yo baa yɔɔ bə mi lə, “Wə kə nələ hlɨŋ Chu ni, nni i duŋ biyɔɔnə bbɨŋ bi dùŋ ə kiŋwaati kɨhŋ mə kə, yulahalə bwɔɔ nnu bi lə duŋ yo baha baha. 11 Mbɛɛ nnu i fə̀ bieŋ biwaha yee i fə̂ kwaa bieŋ biwaha, mbɛɛ nnu i fə̀ bieŋ bi nyɛninə yee i fə̂ kwaa bieŋ bi nyɛninə. Mbɛɛ nnu i fə̀ fieŋ fintiiŋ yee i fə̂ kwaa fieŋ fintiiŋ, mbɛɛ nnu i dùŋ wɛɛŋ i ba kwaa yee i dûŋ wɛɛŋ.”
12 Jisho yu yɔ̄ɔ lə, “Bə wələ wo, bwɔɔ chɛɛ kwaa duŋ mbwo. N'yu bwō bə bikoonə, mbwo koŋ mbɛɛ mənhliŋ bələ ye fwɔ wiih dùŋ. 13 Ə mi Alfa, ndùŋ Omega. Ə mi nnu Fwi, ndùŋ nnu Dɨŋ. Ə mi Kinchɔɔ, ndùŋ Kiŋkpee.”
14 Kintɨŋ kiŋkuntaŋ dùŋ bə bəne bbəŋ bə́ wiila bindu bibə, fo bə́ lə lɛɛ ə fwiih wi mbaŋ nnu i gə̀ŋ yo ə kibalaki kie mə, fo bə́ bənə je dinə dəŋ ə tiɛɛ kkɨŋ ki nə̀ kie kinduŋh go. 15 Bəne bbəŋ bə́ yá ba ə mbaŋ yo bweenə ə bəne bbəŋ bə́ fə̀ ye bwí bə bəne bə nfíŋ maa bbəŋ bə́ fə̀ kiwaali maa bbəŋ bə́ jìi bəne maa bbəŋ bə́ chèe bə bəcheh bədi, maa bə bəne bbəŋ bə́ lèki dəŋ yo kaalənə bə́ kaalə yo.
16 “Mi Jisho nfaŋna nchinda ŋgwəŋ bə bəŋ lə i yɔɔ bieŋ bbɨŋ bi gəŋ ə bimbumə bi bəne bə kimbemi mə. Ndùŋ gbɛŋ, Ndùŋ dəŋ ŋiaŋ ə kichəŋ ki Ŋkɨŋ Daafi mə, ndùŋ Fintoola fi hə mbumbwaa ffɨŋ fi tə̀.”
17 Fiana Chu bə Kpɛ Fwɔ yu yɔ̄ɔ lə, “Bwo!” Maa nyəhə nnu i wò, i yɔɔ dəŋ lə “Bwo!” Mbɛɛ nnu ntɔntɔ ŋɨ̀ŋ wu, i bwo, mbɛɛ nnu i kìɛɛ, i bwo bənə ŋgwiŋ mməŋ mə nə̀ kinduŋh fieŋ kə hluŋ nə kə.
Keehnə ki həŋgbɔŋ
18 N'yu n'yɔ̄ɔ ŋkɨ̄nə mbɛɛ mənhliŋ nnu i wò hlɨŋ Chu nni i duŋ ni ə duŋ biyɔɔnə bbɨŋ bi fù ə kiŋwaati kɨhŋ mə lə, ə mbɛɛ lə mɔŋ yiinə fieŋ bəŋ, ə Chu yá yiinə bəŋgə bbəŋ bə́ dùŋ ə kiŋwaati kɨhŋ mə ə wu go. 19 Mbɛɛ lə mɔŋ fwoo fieŋ ə biyɔɔnə bbɨŋ bi fù ə kiŋwaati kɨhŋ mə ə duŋ hlɨŋ Chu, ə Chu nakə chiee lə i kənə wiih wɛɛ ə tiɛɛ kkɨŋ ki nə̀ kinduŋh mə, ə i nakə kənə dəŋ wiih wɛɛ ə kibalaki ki wɛɛŋ mə, kkɨŋ ki dùŋ bə bieŋna ə kiŋwaati kɨhŋ mə kə.