Binyiinə 16

Bənchwa fumanyaaŋ bə tɔŋ li Chu linlo

Nduŋ duŋ wo ye die ji yɔ̄ɔ gbaaŋ ə chəŋ ntofi mə bə bənchinda bə Chu bə fumanyaaŋ bie lə, “Bə gəŋ shoo tɔŋ li Chu linlo llɨŋ li duŋ ə bənchwa bə fumanyaaŋ bie mə ə shishɔ bəŋ.” 2 Nchinda Chu nnu fwii yo gəŋ shoo wi yo nchwa tɔŋ li Chu linlo ə shishɔ bəŋ. Bibiaa bi ŋwi gbo binlo, kwo bəne bbəŋ bə́ mà kənə bie bieeni yi nyaŋ ŋwi gbo ye, bə́ nə̀ kimbwɔkwe kiŋkuntaŋ bə maami nyaŋ ye. 3 Nchinda Chu chá fie yo gəŋ shoo wi yo nchwa ə nɔ mə, ŋgwiŋ mie fiimə chu ye ŋgɔŋ mə mbɛɛ ŋkpi lə. Fieŋ finhliŋ ffɨŋ fi mà nɔŋ ə nɔ yo mə kpe. 4 Nchinda Chu chá shɔ yo shoo wi yo nchwa ə kibee mə, maa ə bidɔhɔ bi chwaŋ bwɔɔ mə, bi fiimə chu ŋgɔŋ. 5 Ŋ'wo ye nchinda Chu nnu i fwòŋ ŋgwíŋ yɔ̄ɔ lə,

“Chu, wə duŋ Chu ntiiŋ ə je nni wə kàalə ye bənhlaa mə.

Wə nnu wə dùŋ fidiɛɛ, wə mà duŋna foo.

O Chu, nnu wə duŋ Wɛɛŋ.

6 Bəne bəhŋ duŋ ə bə́ bbəŋ ŋgɔŋ mə bəne bbəŋ bə́ dùŋ bwo

maa bəne bwo bə hlɨŋ dùŋ ə bə́ kwáŋ.

Wə hlə nə ŋgɔŋ lə bə́ ŋwi.

Fɨhŋ duŋ bikoonə bibə.”

7 Nja ŋ'wo ye die fu ə taŋ li ntofi mə dohi lə,

“Eee Baba Chu nnu i Kə̀nə yo Muŋga Munhliŋ,

wə kàalə bənhlaa bwo, wə bə̀lə je kichɛɛŋ bə je ntiiŋ!”

8 Nchinda Chu chá nya shoo wi yo nchwa ə duŋ ə kitaŋ bəŋ, kitaŋ kie ŋāŋa ki tɔ̄ŋ bəne bie ye bwii lə. 9 Yoo kintaabə yee ki fū ə kitaŋ kie mə ki tɔ̄ŋ bəne. Kwaalə bə́ nakə gaanə tɔ́ŋ ŋəbə lə yee bə́ nə̄ Chu kindohi kə. Bə́ kaka yee bə́ bīhi yii li Chu nnu i kə̀nə muŋga ə bəŋgə bəŋ.

10 Nchinda Chu chá shiŋ yo shoo wi yo nchwa ə duŋ ə kabala nyaŋ ŋwi gbo ye bəŋ, jɨbə gbe ə mbiŋ nnu nyaŋ ye màa i hlāah yo bəŋ. Bəne yee bə́ dūŋ ə nlogo mə bə́ gbà ŋəniini ŋəbə. 11 Bə́ gbe bənto Chu nnu buh yu nlogo bibiaa bibə. Kwaalə bə́ nakə gaanə fwɔ́ ŋəbə kə.

12 Nchinda Chu chá buhlɔ yo shoo wi yo nchwa ə duŋ ə kibee ki Yufleti mə, ŋgwiŋ mie bu ŋimi, bənfə je lə bəŋkɨŋ bə wɛɛ wwuŋ kitaŋ fù lə kah ə yi mə. 13 Nduŋ duŋ ŋŋəŋ bəfiana bəyili bədi go bətɔh bə bu bikwu. Bə́ fù ə kijə ki nyaŋ nni i bù ye dɔɔkɔ, bə ə kijə ki nyaŋ ŋwi gbo ye mə, maa kijə ki mbɛɛ nnu i kàalə yo yo lə i dùŋ mbɛɛ hlɨŋ Chu. 14 Bəfiana bəhŋ duŋ bənchinda bə fiŋkwini. Ə duŋ bə́ bbəŋ bə́ fə̀ bieŋ bbɨŋ bi nyìi muŋgeni mubi. Bə́ gəŋ ə bəŋkɨŋ bə bitɨŋ binhliŋ ə mbiŋ nte, bə́ bùhuŋ lə bə́ bwɛ̀ɛ gbo bə ntɨmə nnu i yáa i dūŋ yo butuu buŋkuntaŋ bu Chu nnu i Kə̀nə yo Muŋga Munhliŋ.

15 Jisho mà yɔɔ lə, “Bə wələ wo, n'yá mbwo ye ŋwuŋ buyi lə. Kintɨŋ kiŋkuntaŋ dùŋ ki mbɛɛ nnu i nɔ̀ŋnə kinɨŋ kə, nnu i kə̀nə bindu ə wu go fo mə lə nakə tɨmə fu kichi kindende ə bəne ŋəŋ ə kindende kiih go kə.”

16 Bəfiana bie hlə ja bwo buhuŋ bəŋkɨŋ bie ə dɔhɔ kkɨŋ bə́ chèe ə díe yí Bəhiblu mə lə Amagedɔŋ.

17 Nchinda Chu nnu chá fumanyaaŋ yo shoo wi yo nchwa ə fwee mə. Die ji fu ə chəŋ ntofi mə ə dɔhɔ kkɨŋ kabala duŋ kie yɔɔ gbaaŋ lə, “Ka ka kaa!” 18 Jaŋ chɔɔ yee i lāla, i dīmi, i kə̄ kigbaŋgba shishɔ nə̄nə bə muŋga gbaaŋ. Dɨŋ nənə nunu bə muŋga mà kə hlaa lə duŋ chɔɔ jə ye mbɛɛ mà gbe bənduŋ yaŋ ə mbiŋ nte kə. Kinənə ki shishɔ kɨhŋ mà duŋ kiŋwi gbo gbaaŋ. 19 Kibalaki kiŋkuntaŋ bwulə fu wɛ́ɛ tɔh. Bibalaki bi bitɨŋ bwulə ə bwulə mə. Chu hle kibalaki kiŋkuntaŋ ki Babilɔŋ, nə kwooh kiih ki biwɛɛ bbɨŋ bi fwèe lə i yihi. 20 Bitɨŋ bi ŋgwiŋ kintekinte binhliŋ la, bikɔni dəŋ la bu lanə kpanii. 21 Bóh ŋəŋkuntaŋ ŋəŋkuntaŋ yee ŋə gbē ə buh. Mwe dili ye bəkilo mbwɛɛnya lə. Bóh ŋie gbè ə bəne bəŋ, bə́ tò Chu bu tonə, ye i faŋ lə ŋgə bóh ŋəhŋ ə bə́ bəŋ, yulahalə bəŋgə bie mà duŋ bəŋwi gbo gbaaŋ.