Binyiinə 17

Kpɛ kiwaali shaŋ bə nyaŋ ŋwi gbo

Nchinda Chu ju ə bənchinda bə Chu bə fumanyaaŋ bie mə bbəŋ bə́ mà kənə bie bənchwa bə fumanyaaŋ bie bu ja yɔɔ bə mi lə, “Bwo nnyii wə dɨŋ ŋgə nnu bə́ yá nə bə kpɛ nnu i mà duŋ yo ŋkɨŋ kiwaali nnu i shiila yo ə ŋgwíŋ mə kiŋaŋ bəŋ. 2 Kpɛ nu duŋ nnu bəŋkɨŋ bə yaŋ kwe mà fə kiwaali bə wu, fwɔ wiih wi kiwaali wuhŋ kwo bəne bə yaŋ kwe ye mbihŋ lə.”

3 Nchinda Chu yo jə mi ə Fiana Chu yo mə, gəŋ bə mi ə nji. Ŋŋəŋ kpɛ ju go i shiila ə nyaŋ ŋwi gbo bəŋ, i geenə nəni bwaaaŋ, i yiila bə yíi gbo wiih winhliŋ, i bìhi yii li Chu. Nyaŋ ye mà kənə bikuu fumanyaaŋ bə bitiɛɛlə yuufi. 4 Kpɛ yo mà kwaa gbo wiih bə bindu bi bəne bəŋkuntaŋ bi geenə, i jwa jwa gbo bə bieŋ bbɨŋ bə́ fə̀ bə chwaa ki kpo ki ge maa dɨŋ tə́ ŋəntachuŋ maa bigəə bi həkwi bintachuŋ. I mà kənə kwooh ə wu kwaŋ kkɨŋ bə́ fə̀ bə chwaa ki kpo ki ge ki yiila bə bieŋ biŋwi gbo maa yili li kiwaali. 5 Bə́ mà bieŋna yii lidi ə bushi bwii go li duŋ ə ŋgaŋga mə lə, “Babilɔŋ ŋkuntaŋ nnu i dùŋ mah bəkwɛɛ bə kiwaali maa bieŋ biŋwi gbo yaŋ kwe.” 6 Ŋŋəŋ kpɛ yo ŋwee chɨŋ ŋgɔŋ mə bəne bə Chu bbəŋ bə́ mà jiila yu Jisho, mə kwo wu ye mbihŋ lə.

Ye ŋŋəŋ lə ə kpɛ yo go nəni, gəə ŋɨŋ mi gbaaŋ. 7 Nchinda Chu yo bii bə mi ləə, “Gəə ŋɨ̄ŋ wə yulaha lə? Nlə n'yɔɔ tɔ wə fieŋ ffɨŋ fi dùŋ ə nələ mə ki kpɛ nu bə nyaŋ ŋwi gbo nni i kə̀nə ni bikuu fumanyaaŋ bə bitiɛɛlə yuufi nni i tù ye wu. 8 Nyaŋ ŋwi gbo nni wə ŋə̄ŋ ni i mà duŋ, kwaalə fidiɛɛ nəni mə hləŋ kə. I yá no ə joo kinduumə kie mə nəni fululu, hlə biŋ fu gəŋ ə dɔhɔ kkɨŋ bə́ yá laa yi ə nlaa mə. Gəə yáa ki ŋɨ̄ŋ bəne bbəŋ bə́ dùŋ yaŋ kwe bbəŋ bə́ mà kə bieŋ nə yíi ŋəbə ə kiŋwaati ki bəne bbəŋ bə́ kə̀nə kinduŋh mə gbe jə ye mbiŋ mà chɔɔ. Gəə yáa ki ŋɨ̄ŋ bə́ ye bə́ yá ŋəŋ lə ə nyaŋ ni go, yulahalə nyaŋ ni mà duŋna, kwaalə mə hləŋ kə, i yá yi baa bwo. 9 Fɨhŋ nini lə fieŋ ffɨŋ fi kìɛɛ kwoo kkɨŋ ki kə̀nə bufe bbuŋ bu duŋ bu Chu. Bikuu bi nyáŋ yé fumanyaaŋ lə bikɔnɔ fumanyaaŋ bbɨŋ kpɛ yo shìi ə bi bəŋ. Bikuu bie duŋ dəŋ bəŋkɨŋ fumanyaaŋ. 10 Bəŋkɨŋ gbee ə muŋkɨŋ mubə bəŋ, mwi yu kaani i hlāah, ju yu kaani kə bwoo. Bwɔɔ nnu mbini yo yá bwo, ə i yá duŋ ə muŋkɨŋ mwe bəŋ ə bwɔɔ bəŋ chɛɛ. 11 Ki nyaŋ ŋwi gbo nni i mà duŋ ye həmə ŋkee, fidiɛɛ mə hləŋ kə, yi dəŋ duŋ ŋkɨŋ, ŋkɨŋ nu duŋ ə chá nyaaŋ bəŋ, kwaalə i yo ə kintu ki bəŋkɨŋ bə fumanyaaŋ bie mə. Mbini yo dəŋ bwɔɔ nnu i yá bwo, ə i yá gəŋ ə dɔhɔ kkɨŋ duŋ ə bə́ yá laa wu bu laanə.

12 Bitiɛɛlə bi yuufi bbɨŋ wə ŋəŋ bɨhŋ duŋ bəŋkɨŋ yuufi bbəŋ bə́ kə nəə bə́ muŋga mudi munhlaahnə kə. Bə́ yá nɔhiŋ bə́, ə bə́ yá hlə yee bə́ kə̄nə muŋgeni munhlaahnə bə nyaŋ ŋwi gbo ye. Kwaalə bə́ yá hlaah ə ntaŋ bwɔɔ bəŋ mwi. 13 Bəŋ bənhliŋ kənə kinhle mwe. Bə́ yá nə muŋga bə muŋgeni mubə munhlaahnə munhliŋ bə nyaŋ ŋwi gbo ye. 14 Bə́ yá yi bwɛɛ gbo tɨmə ntɨmə bə Ŋwa Nshɔŋ yo, kwaalə ə Ŋwa Nshɔŋ yo kɨŋ bə́, yulahalə i duŋ Baba bəbaba maa Ŋkɨŋ bəŋkɨŋ. I yá tɨmə kɨŋ bə bəne biih bbəŋ i diila shaa bə́, bie bə́ lēmi bə wu bwɔɔ bənhliŋ.”

15 Nchinda Chu yo yɔɔ bə mi lə, “Ŋgwíŋ mməŋ wə hə ŋəŋ mie kpɛ kiwaali yo shiila ə mə bəŋ lə dɨŋ bəne bə bintu bi bəne maa bitɨŋ maa bəne bbəŋ bə́ yɔ̀ɔ maa díe yɛhɛŋ. 16 Bitiɛɛlə bi yuufi bbɨŋ wə hə ŋəŋ bie bə bi nyaŋ ŋwi gbo ye yáa bi lōh bə kpɛ kiwaali yo. Bə́ yá di bieŋ biih binhliŋ ə i she kindende, ə bə kɔkɔ nyaŋ ə wu go, kaanə tɔŋ wu bə bwii. 17 Fieŋ fɨhŋ duŋ ə Chu nnu i yiila ə tɔ́ŋ ŋəbə mə lə yee bə́ fə̄ fieŋ ffɨŋ i lèki, hlə fə lə yee bə́ kə̄nə kinhle mwe bənnə muŋga mubə munhlaahnə bə nyaŋ ŋwi gbo ye, gəŋ bwii ye die Chu yá bwo wunə. 18 Kpɛ nnu wə hə ŋəŋ yo duŋ kibalaki kiŋkuntaŋ kkɨŋ ki kə̀nə muŋgeni ə bəŋkɨŋ bə yaŋ kwe bəŋ bənhliŋ.”