Binyiinə 15

Bəŋgə bə chá fumanyaaŋ bə həŋgbɔŋ

Mbaa ŋŋəŋ dɨŋ fieŋ fidi fi ŋɨŋ gəə ə buh, ə duŋ fieŋ fiŋkpee gbo fiŋkuntaŋ. Ə màa bənchinda bə Chu fumanyaaŋ bə́ kə̄nə bəŋgə fumanyaaŋ bə həŋgbɔŋ, lə bə́ nə bə bəne, yulahalə ə bə́ bbəŋ Chu yá kaanə nyii biwɛɛ biih bbɨŋ bi fwèe bə bə́. 2 Mbaa ŋŋəŋ ə fieŋ fidi go fi bu ye nɔ nnu bə́ fuhaŋ bə bwii, i chāa nəni ye miajɔ lə. Bəne bədi lema baha ə nɔ yo tɨŋ, ə duŋ bbəŋ bə́ mà kɨŋ bie nyaŋ ŋwi gbo ye bə maami wi yo, maa bieeni yi kiŋwaati yyɨŋ yi mà duŋ ye yii li nyaŋ ye lə. Bə́ mà lemi həmə bə́ kə̄nə chíŋ yí Chu ə bə́ kwáŋ, 3 bə́ tēe yii li Mushe mbɛɛ nimi Chu bə yii li Ŋwa Nshɔŋ. Bə́ màa bə́ tēe lə,

“O Baba Chu nnu i Kə̀nə yo Muŋga Munhliŋ,

bieŋ bbɨŋ wə fə̀ duŋ biŋkuntaŋ bə bi ŋɨŋ gəə.

Wə dùŋ Ŋkɨŋ bitɨŋ binhliŋ,^ª

jé yyɨŋ wə fə̀ bieŋ ə yí mə duŋ yintiiŋ bə yí kiyəyəŋ.

4 O Baba, mbɛɛ nnu i dùŋ ə i nakə yee i lɔ̄ wə, i dòhi wə lə nyəhə lə?

Ə kwaa wə wɛɛŋ yo.

Bitɨŋ binhliŋ yáa bi bwō bi bwɔ̀kwe bə wə, bə́ nə̀ wə kiŋkuntaŋ

yulahalə bə́ ŋəŋna bieŋ bbɨŋ wə fə̀ bi dùŋ ntiiŋ.”

5 Ə chu bwɔɔ nnu dɨŋ nduŋ duŋ chiini, ŋŋəŋ bə́ wɛɛ chəŋ ntofi nni buh ə duŋ kikɔ kkɨŋ ki nyìi lə Chu yo bə bəne. 6 Bənchinda bə Chu bə fumanyaaŋ bbəŋ bə́ mà kənə bie bəŋgə fumanyaaŋ bwo fu ə chəŋ ntofi ye mə. Bə́ mà duŋ bə́ leela bindu bi tə̀, bini bi bininə ə kɔŋ go bbɨŋ bə́ fə̀ bə chwaa ki ge ki kpo. 7 Fieŋ fimwi ə kintu ki bieŋ biŋkee bi binua bie mə hlə nə bənchinda bə fumanyaaŋ bie bənchwa fumanyaaŋ bbəŋ bə́ fə̀ bə chwaa ki ge ki kpo. Bənchwa bie mà yiila bə tɔŋ linlo li Chu nnu i dùŋ yo bwɔɔ mənhliŋ ki həŋgbɔŋ hləŋ. 8 Chəŋ ntofi ja yii bə ndɨŋ mməŋ mə fù ə kinchaa ki Chu mə bə muŋga mwii. Fi hlə duŋ lə duŋ ə mbɛɛ nakə baa lə lɛɛ ə chəŋ ntofi Chu mə kə, gəŋ bwii ye bəŋgə bə fumanyaaŋ bbəŋ bənchinda bə Chu bə fumanyaaŋ bie mà duŋ bənnə bəne yá kah.