Binyiinə 14

Ŋwa Nshɔŋ bə bəne 144,000

Bə wələ wo, ə chu lə mbaa nchiini, ŋŋəŋ Ŋwa Nshɔŋ i lema ə kɔnɔ ki Jayɔŋ go, bəne bənchuku gbi bə mbwɛɛnya ə nchɔ bənua (144,000) duŋ bə wu. Bəne bəhŋ duŋ bbəŋ bə́ mà kənə bidahŋ bi yii liih bə li Tili ə bushi bubə go. 2 Ŋ'wo ye die bwɔ bwo mə buh ye fwafwa ŋgwiŋ gbe lə wuuu. Mə dīmi dəŋ ye jaŋ kiŋgbaŋgba lə. Die nni mmà ŋ'wo ye màa i yɔ̄ɔ dəŋ ye chíŋ ŋŋəŋ bəne kwī lə. 3 Bə́ tèe yíi ŋənfwɔ ə kabala yo fwi bə bieŋ biŋkee bi binua bie, maa bəcha bə bəne bie. Ə mà duŋ ə mbɛɛ ju tee yii le kə kahiŋ bəne bə bənchuku gbi bə mbwɛɛnya ə nchɔ bənua bie. Ə duŋ bə́ bbəŋ bə́ mà yah bə́ ə yiwaha mə. 4 Bəhŋ lə bəne bbəŋ bə́ kə bihi go ŋəbə bə bəkwɛɛ kə, yulahalə bə́ mà kə kələ bəkwɛɛ kə. Ə bə́ bbəŋ bə́ màa bə́ bā bəmbələ Ŋwa Nshɔŋ dɔhɔ kkɨŋ i gə̀ŋ. Bəne bəhŋ duŋ bbəŋ bə́ mà fwoo bə́ ə ŋkaani bəne bənhliŋ mə lə bə́ duŋ ye sháŋ yí fwii yí Chu bə Ŋwa Nshɔŋ yo. 5 Yo kaalənə mà kə hlaa lə fu ə bə́ jə́ kə. Bə́ dùŋ fibə gbenə hləŋ.

Biyɔɔnə bi bənchinda bə Chu bətɔh

6 Mbaa nja ŋŋəŋ nchinda Chu ju go i tīɛŋ ə buuli kintekinte. I mà kənə hlɨŋ nwaa nni i dùŋ kə kaa bəndontə bə bəne bənhliŋ bbəŋ bə́ dùŋ ə mbiŋ nte. I mà duŋ bəndontə bə bitɨŋ binhliŋ, bə muŋkwili munhliŋ, maa bəne bbəŋ bə́ yɔ̀ɔ díe yɛhɛŋ maa dəŋ bəne biɛhɛŋ bənhliŋ. 7 Nchinda yo diimə gbaaŋ lə, “Yee bə lɔ̂ Chu. Bə nə̀ wu kindohi yulahalə bwɔɔ wi hlaahnə wuna. Yee bə nə̂ kiŋkohi kiŋkuntaŋ bə wu nnu i mà fə yo buuli bə shishɔ maa nɔ bə bidɔhɔ bbɨŋ chwaŋ bwɔɔ fù ə bi mə.”

8 Nchinda ju Chu, chá fie yee i bə̄lə wu i yɔ̄ɔ lə, “Babilɔŋ ŋkuntaŋ gbee, i gbee ba. Ə duŋ wu nnu i mà fə bitɨŋ binhliŋ ŋwi fwɔ wi kiwaali kibə ye mbihŋ lə.”

9 Ju nchinda Chu bətɔh yo hlə bələ dəŋ bə́, diimə lə, “Ə mbɛɛ lə mɔŋ bənnə kiŋkohi kiŋkuntaŋ bə nyaŋ ŋwi gbo ye maa bə kieŋ kkɨŋ bə́ fəə ki bù yi, i kənə dəŋ kidahŋ ə bushi go maa ə kwaŋ go, 10 kəə i yá ŋwi mbihŋ mməŋ mə dùŋ biwɛɛ bi Chu bbɨŋ bi fwèe. Biwɛɛ bɨhŋ lə bbɨŋ i yiila ə kwooh kiih kinlo mə kə fuhuŋ kə. Mbini yo mbɛɛ bə́ ya lɛɛ wu ə fieŋ fidi mə ffɨŋ fi dùŋ ye muŋkaŋ lə, ə i ŋəŋ ə ŋgə go. Fieŋ ffɨŋ yá duŋ ə bənchinda bə Chu bəwɛɛŋ fwi bə Ŋwa Nshɔŋ yo. 11 Ndɨŋ yáa mə bīŋ bwɔɔ mənhliŋ kə kaa ə dɔhɔ kkɨŋ bə́ yá lɛɛ kie bə́ ə ŋgə mə. Bəne bbəŋ bə́ nə̀ kiŋkohi kiŋkuntaŋ bə nyaŋ ŋwi gbo maa bbəŋ bə́ nə̀ nyaŋ ye yii liŋkuntaŋ maa bbəŋ bə́ kə̀nə kidahŋ ki yii liih, yá kənə fiana ə ŋgə bə́ mə ə bushi ləkə butuu.” 12 Fɨhŋ gəŋ bə bəne bbəŋ bə́ dùŋ bə Chu ə duŋ bə́ bbəŋ bə́ chì bəŋkɨnə bə Chu, bə́ yiila tɔ́ŋ ə Jisho mə, lə bə́ kwaa tɔ́ŋ.

13 Nduŋ duŋ ŋ'wo ye die yɔ̄ɔ ə Chu kwuŋ, i yɔ̄ɔ bə mi lə, “Bieŋ fieŋ fɨhŋ: Chɔɔ jə fidiɛɛ gəŋ fwi, kintɨŋ kiŋkuntaŋ dùŋ bə bəne bbəŋ bə́ kpè, bə́ hə buma bə Baba.” Fiana Chu fwɔŋ lə, “Kintɨŋ kiŋkuntaŋ dùŋ bə bə́ bə kichɛɛŋ, yulahalə bə ŋɔɔna ə munfwa mubə mə, bifənə binwaa bibə lə bələ bə́.”

Bigbanə bi mbiŋ

14 Bə wələ wo, lə nchiini, ŋŋəŋ joonə kiwu buuu, mbɛɛ shiila ə joonə kie bəŋ i bù Ŋwa Mbɛɛ. Ə mà duŋ i bɛŋna kinfwili ki muŋkɨŋ kkɨŋ bə́ fə̀ bə chwaa ki ge ki kpo, i kəna fibɛ ə kwaŋ fi bù filoje findi. 15 Ju nchinda Chu ja fu ə chəŋ ntofi mə, diimə mbɛɛ nnu i mà shii yo ə joonə kie bəŋ bə die ntaabə, yɔɔ lə, “Nɛhiŋ fibɛ fo fie yee wə bānchi mu. Bwɔɔ banchinə wuna, nnu bibanchinə bi mbiŋ binhliŋ wuna kaah bəmbanchi” 16 Nəni, mbɛɛ nnu i mà shii yo ə joonə bəŋ hlə fiaa filoje fiih ə mbiŋ mə banchi mbiŋ mu.

17 Ju nchinda Chu baa fu ə chəŋ ntofi mə, i kəna dəŋ fibɛ ə kwaŋ fi bù filoje findi. 18 Ju nchinda Chu fu ə taŋ li ntofi mə, ə duŋ wu nnu i kə̀nə muŋga ə bwii bəŋ. I diimə gbaaŋ bə ju nnu i mà kənə yo fibɛ findi fie lə, “Fiaa fibɛ fo fie wə kaalə binchɔŋ bi sháŋ yí mbiŋ bə fi yaŋ kwe yulahalə sháŋ yé gee.”^ª 19 Nchinda Chu yo hlə fiaa fibɛ fiih yaŋ kwe, kaalə sháŋ yí mbiŋ yé yaŋ kwe bə fi, buhuŋ ŋwoŋ hə hlɔh dɔhɔ kiŋkuntaŋ kkɨŋ bə́ chwà mbihŋ, fɨhŋ nyìi fieŋ ffɨŋ biwɛɛ bi Chu fwèe bbɨŋ i yá fə bə bəne. 20 Bə́ jə fu bə sháŋ yí mbihŋ yé ə kibalaki kie mə yee bə́ chwā, ə fū ə duŋ ŋgɔŋ, mə yīi mə bīŋ, bwo bwii ye biwu bi kikwuŋ lə, mə lə̄əŋkə mə gə̄ŋ, gəŋ bwii ye bəmaay gi fwe lə (200).