Binyiinə 13

Nyaŋ ŋwi gbo nni i mà fu ə nɔ mə

Mbaa nja ŋŋəŋ nyaŋ ŋwi gbo i fū ə nɔ mə, i kə̀nə bikuu fumanyaaŋ bə bitiɛɛlə yuufi, bə binfwili bi muŋkɨŋ bitənə yuufi ə bitiɛɛlə bie go, yíi ŋŋəŋ ŋə bìhi yii li Chu duŋ ə bikuu bie go. 2 Nyaŋ nni mmà ŋŋəŋ ye mà bu kikwu, wuh ŋiih duŋ ye nyaŋ ji nni bə́ chèe lə biɛɛ, kijə kiih duŋ ye ki tuntunu lə. Nyaŋ nni i bù ye dɔɔkɔ hlə nə nyaŋ ye muŋga mwii maa kabala wi lə yee i hlāah bə muŋgeni muŋkuntaŋ. 3 Kwoo ki nyaŋ ye kidi mà kənə dɨŋ biaa kidi kkɨŋ duŋ ə ki jii yi, kwaalə ki mà kaa. Gəə ŋɨŋ bəne bənhliŋ yaŋ ə mbiŋ nte, bə́ gbe nyaŋ ye dɨŋ. 4 Bəne yee bə́ nə̄ kiŋkohi kiŋkuntaŋ bə nyaŋ nni i bù ye dɔɔkɔ, yulahalə i mà nəə nyaŋ ŋwi gbo ye muŋgeni mwii. Bə́ hlə yee bə́ nə̄ dəŋ kiŋkohi kiŋkuntaŋ bə nyaŋ ŋwi gbo ye bə́ yɔ̄ɔ lə, “Ə nyəhə nnu i dùŋ ye nyaŋ ŋwi gbo ni, ə nyəhə nnu i dùŋ ə i ju bə yi lə?”

5 Bə́ nəə nyaŋ ye kijə kkɨŋ duŋ ə yee i yɔ̄ɔ die kinhləə, i bìhi dəŋ yii li Chu, bə́ baa chi lə yee i hlāah ə kii mə mbwɛɛnya ə nchɔ fwe. 6 I hlə gbe bən'yɔɔ díe yiwaha ki Chu, i bìhi yii liih, bə dɔhɔ kkɨŋ Chu duŋ həmə maa bəne bbəŋ bə́ dùŋ ə Chu kwuŋ. 7 Bə́ mà tookwaŋ lə i tɨmə ntɨmə bə bəne bbəŋ bə́ dùŋ bə Chu, kɨŋ bə́, chi dəŋ lə yee i kə̄nə muŋgeni ə ŋəŋkwili ŋənhliŋ bəŋ, bə bəne bənhliŋ maa bəne bə díe yinhliŋ, maa bitɨŋ binhliŋ. 8 Bəne bənhliŋ bə yaŋ mbiŋ nu mə yáa bə́ nə̄ kiŋkohi kiŋkuntaŋ bə yi. Bəne bəhŋ duŋ mbɛɛ mənhliŋ nnu bə́ mà kə bieŋ nə yii liih ə kiŋwaati mə ye mbiŋ mà chɔɔ kə. Kiŋwaati kɨhŋ duŋ kkɨŋ yíi ŋə bəne bbəŋ bə́ kə̀nə kinduŋh duŋ mə, ə duŋ kiŋwaati ki Ŋwa Nshɔŋ nnu bə́ mà nyieŋ yo.

9 Mbɛɛ nnu i kə̀nə bituŋ, i wo. 10 Ə mbɛɛ lə duŋ nnu bə́ lə kwo wu, kəə bə́ lə kwo. Ə mbɛɛ lə duŋ lə mə yá kpe ə mbieelə go, kəə bə́ yá yi jii ba wu bə mbieelə. Fɨhŋ gəŋ bə bəne bbəŋ bə́ dùŋ bə Chu lə yee bə́ kwāa tɔ́ŋ, bə́ yìi tɔ́ŋ ə wu mə.

Nyaŋ ŋwi gbo nni i mà fu ə ke

11 Mbaa nja ŋŋəŋ ji nyaŋ ŋwi gbo, nni i màa i fū ə ke, i kə̄nə bitiɛɛlə bifwe ye bi ŋwa nshɔŋ lə, i yɔ̄ɔ ye nyaŋ nni i bù ye dɔɔkɔ lə. 12 I màa i nyīi muŋgeni munhliŋ mu nyaŋ ŋwi gbo nni fwii ye ə yii liih bəŋ. I fə mbiŋ mənhliŋ bə bəne bənhliŋ bə yaŋ mbiŋ nte yee bə́ nə̄ kiŋkohi kiŋkuntaŋ bə nyaŋ nni fwii ye, nni biaa kiih kkɨŋ ki mà duŋ kie ə ki jii yi, mà kaa. 13 I màa i fə̄ bieŋ bbɨŋ bi nyìi muŋgeni mwii, i fə̀ maa bwii jà wi hlìli yaŋ kwe bəne ŋə̀ŋ. 14 Ye bə́ mà tulə kwáŋ lə yee i fə̄ bieŋ bbɨŋ bi nyìi muŋga mwii kah ə yii li nyaŋ ŋwi gbo ye bəŋ, i hlə yee i fīhi bəne bbəŋ bə́ dùŋ yaŋ kwe. Bənnə kiŋkuntaŋ bə nyaŋ ŋwi gbo nni bə mà biaanə ye bə mbieelə i ba ŋkee, hlə yɔɔ bə́ fah maami ju nnu i bù nyaŋ ye. 15 Bə́ mà tookwaŋ lə i nə fiana bə tiɛɛ ki fahnə ki nyaŋ ŋwi gbo ye, fo tiɛɛ kie lə yee ki yɔ̄ɔ jə, ki fə̀ bə́ jìi bəne bənhliŋ bbəŋ bə́ nɨ̀hŋ bənnə kiŋkohi bə tiɛɛ kie. 16 I mà yɔɔla lə bə́ gba bidahŋ ə bəne bənhliŋ go ləkə ə bweenə ki diee go ləkə ə bushi go, mbɛɛ tənə ləkə ŋkuntaŋ, mbɛɛ kpo, ləkə njɨnənə, nfwa ləkə nnu i duŋ kə duŋ nə nfwa, 17 fo mbɛɛ lə nakə taŋ nə ləkə taa fieŋ i kaani kə duŋ nə bə kidahŋ kie kə. Kidahŋ kɨhŋ lə yii li nyaŋ ŋwi gbo ye, ləkə bieeni yi yii liih. 18 Fɨhŋ lə fieŋ ffɨŋ fi kìɛɛ ə duŋ bufe buŋkuntaŋ. Mbɛɛ nnu i kə̀nə bufe bbuŋ bu duŋ bu Chu, i chee bieeni yi Kiŋwaati kɨhŋ ə duŋ yii li nyaŋ ni kələ. Bieeni yi kiŋwaati kɨhŋ lèmi ə yii li mbɛɛ ŋkee bəŋ, li duŋ ə nfa mə lə, (666).