Kpɛ ju bə nyaŋ ji nni i bu dɔɔkɔ
12
Nja ŋŋəŋ dəŋ fieŋ fidi fi ŋɨŋ gəə ə buh. Ə màa kpɛ ju nnu i mà leela kitaŋ ə wu go ye kindu lə, kpii duŋ wuh ŋiih kwe, i bɛŋna kinfwili ki muŋkɨŋ fi, muntoola duŋ ə ki go yuufi ə nchɔ munfweŋ. 2 I mà duŋ bə te, i bɨ̄nə bəmbwee, i wō nlogo bwee le, i dē.3 Mbaa ŋŋəŋ dəŋ fieŋ fidi fi ŋɨŋ gəə ə buh. Ə nyaŋ ji nni i gèenə ə ŋgeenə mə, i bù dɔɔkɔ. I kə̀nə bikuu fumanyaaŋ bə bitiɛɛlə yuufi, binfwili bi muŋkɨŋ bitənə bitənə fumanyaaŋ duŋ ə bikuu bie bəŋ. 4 I kə ŋwini wiih hə buh, kooni wɛɛ mwe ə wɛ́ɛ tɔh ŋə muntoola ŋie mə buh, lɛɛ yaŋ kwe. Nyaŋ ye lemi ə kpɛ nnu i màa i bɨ̄nə yo bəmbwee fwi, fo kpɛ yo bwee, ə i bwini di ŋiaŋ yo. 5 I bwee ŋiaŋ nyo, ə duŋ nnu i yáa i hlāah bitɨŋ binhliŋ bə kichɔchɔ. Kwaalə, ye i mà bweelə, bə́ ya jə ŋiaŋ yo biŋ bə wu ə Chu kwuŋ, yee i dūŋ baha ə kabala wi tɨŋ. 6 Kpɛ yo hlə lɔ gəŋ yee i dūŋ ə nji ə dɔhɔ kkɨŋ Chu mà bwɛɛ chi wu mə. Ə duŋ dɔhɔ kkɨŋ bə́ yáa bə́ fwōŋ wu ə joo mə nchuku bə gi fwe bə mbwɛɛbuhlɔ (1,260).
7 Ntɨmə ja chɔɔ ə Chu kwuŋ, nchinda Chu Maykɛl bə kintu ki bənchinda biih jù bə nyaŋ nni i bù ye dɔɔkɔ. Nyaŋ ye bə biih bənchinda jù, 8 kwaalə bə́ kɨŋ nyaŋ ye bə kimɔ kiih, i nakə baa lə kənə dɔhɔ ə mbiŋ Chu mə kə. 9 Bə́ fwoo nyaŋ nni i bù ye dɔɔkɔ fini yi, i bwo gbe yaŋ kwe. Nyaŋ ni ə bwɔɔ ko mə, duŋ fiŋkwini i duŋ Hlaata. Ə duŋ wu nnu i fìhi bəne bə yaŋ kwe bənhliŋ. Bə́ mà fina lɛɛ yi bə bənchinda biih bə́ gbe yaŋ kwe.
10 Nduŋ duŋ ŋ'wo ye die diimə ə Chu kwuŋ, i yɔ̄ɔ lə,
“Ə fidiɛɛ nnu Chu lə chɨnə bəne biih,
ə i nyii muŋga mwii mu nimi, yee i hlāah muŋkɨŋ mwii,
ə Nchuu Fwoo wi nnu i mà kaachi yo nyii dəŋ muŋgeni mwii mu nhlaahnə.
Yee fi dûŋ lə fidiɛɛ yulahalə bə́ fina lɛɛ mbɛɛ yo yaŋ kwe
nnu i màa i bā yo bənlemi ə Chu fwi ə bushi bə butuu
i bwɛɛ bieŋ ə bəŋgwoŋ go.
11 Kwaalə, bə́ kɨŋna wu
yu ŋgɔŋ mə Ŋwa Nshɔŋ maa bə die Chu nni bə lèmi ye ə kidɨŋ ki nhlaa yo bəŋ.
Bə́ mà kə leki kinduŋh kibə
ə je nni duŋ ə yee bə́ lɔ̄ bəŋkpe kə.
12 Nəni, ə yee mbiŋ Chu tɨ̄ŋ,
bəne bənhliŋ bbəŋ bə́ dùŋ mə, tɨ̀ŋ dəŋ.
Kwaalə, ŋgə ŋkuntaŋ duŋ weŋ shishɔ bə nɔ,
yulahalə fiŋkwini hlila bwo ə bəŋ bəŋ.
Fi fiila bə tɔŋ llɨŋ li fwèe gbaaŋ,
yulahalə fie fi kə̄lə lə bwɔɔ fi shee chɛɛ.”
13 Lə nyaŋ nni i bù ye dɔɔkɔ ŋəŋ lə bə́ lɛɛla yi, i gbee ə mbiŋ nte, i kwili lili bələ kpɛ nnu i mà bwee yo ŋiaŋ nyo yo dɨŋ. 14 Kwaalə, bə́ nə bikulə bi faŋ bifwe bə kpɛ yo lə i tiɛŋ lɔ no ə yɔ ye tɨŋ gəŋ yee i dūŋ ə nji bigoŋ bitɔh bə kiŋkə bə́ fwòŋ wu mə. 15 Yɔ ye fwoo ŋgwiŋ ə yi jə ye kibee lə ə kpɛ yo dɨŋ fo mə lə tu gəŋ bə wu. 16 Kwaalə, shishɔ chɨnə kpɛ yo, wɛ kijə kiyi me kibee kkɨŋ nyaŋ ye mà fwoo kie jə. 17 Nyaŋ ye hlə fwoo tɔŋ bə kpɛ yo, hlə ja la bwɔni bə kpɛ yo nyɨmə bbəŋ bə́ mà she bie, ə duŋ bə́ bbəŋ bə́ chì bəŋkɨnə bə Chu, bə́ bèmi kah dəŋ bənhlaa Jisho. 18 Iª hlə gəŋ yee i lēmi ə nɔ kpɛɛli.