Binyiinə 11

Bəne bəfwe bə hlɨŋ Chu

Bə́ hlə jə nə mi kifɛhinə ki duŋ ye tələ lə, bə́ yɔɔ bə mi lə, “Gəŋ fɛhiŋ chəŋ ntofi Chu maa taŋ li ntofi, wə fa dəŋ bəne bbəŋ bə́ chèe Chu mu, 2 kwaalə wə kə fɛhiŋ fwili le kə. Tukwaŋ ə li go yulahalə bə́ nəə li bə bəne bbəŋ bə́ dùŋ kə duŋ nə Bəjuu. Bə́ yá yi biŋ ə kibalaki ki wɛɛŋ bəŋ ə bə́ yá diɛŋ kibalaki kie ə kii mə mbwɛɛnya ə nchɔ fwe. 3 N'yá nə muŋga bə bəne bəŋŋ bəfwe bbəŋ bə́ yɔ̀ɔ kɨŋŋ, yɔɔ ki hlɨŋ njəŋ bə bəne ə joo mə nchuku bə gi fwe bə mbwɛɛbuhlɔ (1,260). Bə́ yáa bə́ yɔ̄ɔ bə́ leela bindu biyi bi kpe.”

4 Bəne bə bəfwe bəhŋ lə bite bi Olif bifwe bə bieŋ bifwe bbɨŋ bə́ chì bibəənə bbɨŋ bi lèmi bie ə Baba fwi nnu i kə̀nə yo shishɔ. 5 Ə mbɛɛ lə ja kiɛɛ lə i fə fieŋ fiwaha bə bə́, ə bwii fu bə́ jə́ fii mbɛɛ nnu i dùŋ yo kə diee njənə bə bə́. Ə je ni mə, ə mbɛɛ lə kiɛɛ lə i fə fieŋ fiwaha bə bə́, kəə i kənə bəŋkpe nəni. 6 Bə́ kənə muŋga mmuŋ duŋ ə bə́ fwaŋ buuli lə jaŋ kə teelə ə shishɔ bəŋ joo ŋŋəŋ bə́ duŋ lə yee bə́ dōntə hlɨŋ Chu. Bə́ kənə dəŋ muŋga mmuŋ duŋ ə bə́ fii ŋgwíŋ ə mə chu ŋgɔŋ, maa muŋga bənlɛɛ jə́ŋ yinhliŋ ə mbiŋ nte, maa bwɔɔ nwɛhɛŋ nnu bə́ lèki.

7 Bwɔɔ nnu bə́ yá kaanə yɔɔ fieŋ ffɨŋ bə́ kə̀nə fie bən'yɔɔ, ə nyaŋ ŋwi gbo nni i fu ye ə joo kinduumə mə nəni fululu, fu yee i tɨ̄mə ntɨmə bə bə́, kɨŋ bə́, jii bə́, 8 ə biŋwuuni bibə ba həmə ə je nni kibalaki kiŋkuntaŋ kie mə. Kibalaki kɨhŋ duŋ kkɨŋ bə́ chèe ə kana mə lə Shɔdɔŋ ləkə lə Ijip, ə duŋ həmə nnu bə́ mà bweeni Baba bə́ ə kiŋgwa go. 9 Ə joo bəŋ tɔh bə kiŋkə ŋkáani yí bəne, ləkə biwi biɛhɛŋ, ləkə bbəŋ bə́ yɔɔ díe yɛhɛŋ, ləkə bbəŋ bə́ fù ə bitɨŋ biɛhɛŋ mə, yáa bə́ chīini biŋwuuni bibə ye bi nɔ̄ŋ lə, nɨhŋ lə bə́ kə diih lə bi kə. 10 Bəne bbəŋ bə́ dùŋ bə mbiŋ nu yáa bə́ tɨ̄ŋ lə ə kpe bəne bəhŋ chɛɛŋ chɛɛŋ lə. Bə́ yáa bə́ tɨ̄ŋ, ə mbɛɛ yee i fāŋ kinnə bə mbɛɛ, mbɛɛ fāŋ kinnə bə mbɛɛ. Bə́ yáa bə́ fə̄ nəni yulahalə bəne bə hlɨŋ Chu bə bəfwe bəhŋ bwoo bəne bə ŋgə ŋkuntaŋ yaŋ mbiŋ nte.

11 Lə fi duŋ nəni, joo ŋə tɔh ŋəhŋ bə kiŋkə hə kaah, fiana nnu i nə̀ yo kinduŋh ja ə Chu go bwo lɛɛ ə bə́ mə, bə́ ja fa. Bəne ŋəŋ nəni kənə nɨŋ gbaaŋ. 12 Bəne bə bəfwe bie wo ye die yɔɔ bə muŋga ə buh, i yɔ̄ɔ bə bə́ lə, “Bə biŋ bwo fəŋ!” Bə́ hlə yee bə́ bīŋ bə́ gə̄ŋ buh ə joonə mə, bəne bəbə bbəŋ bə́ dùŋ kə jənə chīini. 13 Ə bwɔɔ yo bəŋ, shishɔ gbe yee yi nə̄nə bə muŋga gbaaŋ, wɛɛ mwe ə ŋə yuufi mə bulə. Bəne bənchuku fumanyaaŋ (7,000) kpe ye shishɔ ye màa yi nə̄nə lə. Kiŋkə ki bəne kkɨŋ ki mà she kie kənə nɨŋ gbaaŋ, ki fāŋ kindohi bə Chu nnu i dùŋ yo buh.

14 Nnu i kah nu lə ŋgə chá fie. Kwaalə bə wələ wo, ŋgə chá shɔ yu bwō bwɔɔ chɛɛ.

Bə́ tɔŋ kiŋgbu ə chá bəŋ fumanyaaŋ

15 Nchinda Chu chá fumanyaaŋ yo hlə tɔŋ kiih kiŋgbu, ŋ'wo ye díe yɔɔ bə muŋga mə buh, i yɔ̄ɔ lə, “Muŋkɨŋ mu mbiŋ nu choo mu Baba ya bə Nchuu Fwoo nnu i mà kaachi yo, i yáa i hlāah bwɔɔ mənhliŋ kə kaa.” 16 Bəne bəcha bə mbwɛɛnfie ə nchɔ bənua bbəŋ bə́ mà shii bie ə bəkabala bəbə bəŋ ə Chu fwi hlə gbe kəə mənhlɨŋ məbə kwe, nə kiŋkohi kiŋkuntaŋ bə Chu. 17 Yee bə́ fə̄ nəni, bə́ yɔ̄ɔ lə,

“Kkə nə̄ kimbaafɛɛ bə wə,

Baba Chu nnu wə Kə̀nə yo Muŋgeni Munhliŋ,

wə yo fidiɛɛ, wə mà duŋna.

Kkə nə̄ kimbaafɛɛ yulahalə wə jəə

muŋga mwo muŋkuntaŋ chɔɔ bənhlaah.

18 Bəne bbəŋ bə́ dùŋ kə kələ wə^ª bie bə lō,

Bwɔɔ wa nnu wə nyii tɔŋ lo llɨŋ li fwèe, wuna.

Ə duŋ bwɔɔ nnu wə hlaah bəne bbəŋ bə́ kpee.

Ə duŋ dəŋ wə nnu wə koŋ bikoonə bə bəne bwo bə nimi

bbəŋ bə́ dùŋ bəne bwo bə hlɨŋ,

ə wə koŋ bəne bbəŋ bə́ dùŋ bə Chu,

koŋ dəŋ bəne bənhliŋ bbəŋ bə́ bwɔ̀kwe bə yii lo,

maa ə duŋ bəne bətənə ləkə bəŋkuntaŋ.

Ə duŋ dəŋ bwɔɔ nnu wə lə laa bəne bbəŋ

bə́ bìhi bie mbiŋ nu.”

19 Bə́ hlə ja wɛ wulə ki chəŋ ntofi Chu nni buh. Ŋkɔlɔ bitimi bbɨŋ Chu nnu i mà duŋ yo ə chəŋ ntofi mə wɛɛmə. Jaŋ ja yee i lāla, i dīmi, i kə̄ kigbaŋgba, shishɔ nə̄nə, bóh ŋəŋkuntaŋ ŋəŋkuntaŋ gbē.