Binyiinə 10

Nchinda Chu nnu i mà kənə fiŋwaati ffɨŋ bə́ hə wɛɛ

Mbaa ŋŋəŋ ə nchinda ju Chu go ntaabə nnu i hlīli i bwō buh, joonə kəəla wu ye kindu lə, komi kaala kwoo kiih, bushi bwii duŋ ye kitaŋ lə, wuh ŋiih duŋ ye biwooli bi bwii lə. 2 I mà kəna fiŋwaati fidi ə wu kwaŋ fi duŋ kiwɛ. I hlili chi gbu wiih wi diee ə nɔ bəŋ, chi gbu wiih wi məə ə shishɔ bəŋ. 3 Ye i chilə nəni, i gɛɛmə buh bə die ntaabə ye tuntunu hlūŋ lə. Ye i gɛ̄ɛmə lə nəni, jaŋ nni i bà ye bəndimi chá fumanyaaŋ hlə yɔɔ jə. 4 Ye jaŋ nni i bà ye bəndimi chá fumanyaaŋ yɔɔlə nəni, nhlə n'yee ŋkiɛɛ lə mbieŋ fieŋ ffɨŋ i yɔ̄ɔ fie, die ji yɔɔ bə mi mə buh lə, “Chi bulə fieŋ ffɨŋ jaŋ nni mə hə dimi ye chá fumanyaaŋ hə yɔɔ fie. Wə kə bieŋnə ə kiŋwaati mə kə.” 5 Nchinda nnu mmà ŋŋəŋ yo i lēmi ə nɔ bəŋ maa ə shishɔ bəŋ tuuli kwaŋ wiih wi diee hə bu, 6 kaŋ muŋkaŋ bə yii li mbɛɛ nnu i dùŋ yo həmə bwɔɔ mənhliŋ kə kaa, ə duŋ wu nnu i mà fə buuli bə bieŋ binhliŋ bbɨŋ bi dùŋ ə li mə, maa shishɔ bə bieŋ binhliŋ bbɨŋ bi duŋ ə yi mə, maa nɔ bə bieŋ binhliŋ bbɨŋ bi duŋ ə wu mə. I kaŋ yɔɔ lə, “Chu lə baa lə yee i kɛ̄hiŋ bwɔɔ bənfə fieŋ ffɨŋ i kìɛɛ kə! 7 Ə yá bwo duŋ joo ŋŋəŋ nchinda Chu chá fumanyaaŋ yo yá tɔŋ kiŋgbu kiih, ə Chu yá fə fieŋ ffɨŋ i mà nələ bwo wunə ye i mà n'yɔɔlə bə bəne biih bə nimi, bə́ dùŋ bəne biih bə hlɨŋ.”

8 Die nni mmà ŋ'wo ye mə buh baa yɔɔ bə mi lə, “Gəŋ jə fiŋwaati ffɨŋ bə́ hə wɛ fie ə kwaŋ wi nchinda Chu nnu i lēmi yo ə nɔ bəŋ maa ə shishɔ bəŋ.” 9 Nhlə ŋgəŋ ə nchinda Chu yo go, n'yɔɔ lə i nə mi fiŋwaati fie. I yɔɔ bə mi lə, “Jə di. Bwɔɔ nnu fi lə bwɔ wə bulə, fi lə yee fi lō jə ə nlo mə. Kwaalə, fi lə yee fi jə̄njə wə jə ye kituŋ lə.” 10 Nhlə jə fiŋwaati fie ə kwaŋ wi nchinda Chu yo mə, ki di. Ye mmà ndilə, ŋ'wo ə mi jə njəənjə kə ye kituŋ lə. Kwaalə bwɔɔ nnu mmà ndi fi, lə fi bwɔ gbe mi bulə, ŋ'wo ye fi lo jə bu lonə. 11 Ye ndilə, bə́ yɔɔ bə mi lə, “Wə kənə bə mbaa dontə hlɨŋ Chu bə bəne. Hlɨŋ ni duŋ ki dɨŋ bəne bə bitɨŋ maa bəne bbəŋ bə́ yɔ̀ɔ náami chili chili maa bə bəŋkɨŋ.”