Binyiinə 9

Bə́ tɔŋ kiŋgbu ki chá shiŋ

Nchinda Chu chá shiŋ yo tɔŋ kiih kiŋgbu, ŋŋəŋ fintoola fidi go ffɨŋ fi hə no buh bwo gbe yaŋ kwe. Bə́ nəə kiwɛnə bə fintoola fie kkɨŋ bə́ wɛ̀ joo kkɨŋ ki dùŋ nəni fululu. 2 Fintoola fie hlə wɛ biwu bi joo kie, ndɨŋ fu mə nəni chuuu, ye mə fu lə ə bieŋ bbɨŋ bə́ hə buhaŋ tɔŋ mə. Ndɨŋ mməŋ mə màa mə fū mie ə joo kie mə fə kitaŋ bə buuli nyɨŋ. 3 Chə́mə fu ə ndɨŋ mie mə bwɔ yaŋ kwe. Bə́ nəə chə́mə yé muŋga lə yee yí gba ye bəkunama bə yaŋ kwe lə, 4 bə́ looŋka yí lə yí kə bihi bieŋ bbɨŋ bi kò yaŋ kwe, ləkə biyaa, ləkə bite, ləkə maa laha, yɔɔ lə yí nə ŋgə ə duŋ bə dɨŋ bəne bbəŋ bə́ dùŋ kə kənə kidahŋ ki Chu ə mənshi məbə go. 5 Bə́ mà tookwaŋ lə chə́mə yé nə bəne ŋgə kii tiŋ. Kwaalə yí kə jii lə bə́ ə njii mə kə. Ŋgə nnu yí mà duŋ lə yee yí nə̄ mà duŋ ye kunama lə, bwɔɔ nnu i gbà mbɛɛ. 6 Ə kii ŋə tiŋ ŋəhŋ mə bəne yáa bə́ kīɛɛ kpe bə́ kə ŋəŋ nə ə yi go kə. Bə́ yáa bə́ dē lə bə́ kpe, kpe lɔ̀ bə́ ə nlɔ mə.

7 Chə́mə yɨhŋ mà duŋ ye bikwuŋ bbɨŋ bə́ mà bwɛɛla chi lə bi fu la ntɨmə. Bieŋ bidi mà duŋ yí fí ye binfwili bi muŋkɨŋ bbɨŋ bə́ bì bə chwaa ki ge ki kpo, mənshi mə yí duŋ ye mə bəne lə. 8 Fwee kiyi ki fí dùŋ ye ki bəkwɛɛ lə, bigəə biyi dùŋ ye bigəə bi bətuntunu lə. 9 Yí mà kənə bikwaka ye bichwaa bbɨŋ bəne bə ntɨmə kə̀ə bəkɔŋ mu. Bwɔɔ nnu yí tìɛŋ bikwulə biyi dìmi ye bigɔtɔ kiŋaaŋkə bbɨŋ bə́ kpà bikwuŋ mu bwɔɔ nnu bi lə̀lə ə bidi bi ntɨmə mə. 10 Yí kə̄nə ŋini bə gɛŋ ye bəkunama lə. Muŋga muyi mmuŋ yí nə̀ ŋgə bə bəne ə kii mə tiŋ duŋ ə duŋ ə ŋini ŋəyi ŋəhŋ go. 11 Yí mà kənə ŋkɨŋ yí ə duŋ nchinda nnu i fwòŋ joo kkɨŋ ki dùŋ nəni fululu, yii liih duŋ ə die yi Hiblu mə lə Abaddɔŋ, li duŋ ə die yi Glik mə lə, Apoliyɔŋ (yii lɨhŋ duŋ lə mbɛɛ nnu i bìhi ə bihi mə).

12 Ŋgə nnu fwii yo kaa. Kwaalə bə wələ wo, bədi bəŋgə bie bə́ kaani bə́ bə̄lə dɨŋ bəfwe.

Bə́ tɔŋ kiŋgbu ki chá buhlɔ

13 Nchinda Chu chá buhlɔ yo tɔŋ kiih kiŋgbu, ŋ'wo ye die fu ə bitiɛɛlə binua bbɨŋ bi dùŋ ə taŋ li ntofi llɨŋ bə́ fə̀ bə chwaa ki ge ki kpo, ki duŋ ə Chu fwi, 14 die ye yɔɔ bə nchinda Chu chá buhlɔ nnu i mà kənə yo kiŋgbu kie lə, “Hlooli bənchinda bə bənua bbəŋ bə́ mà kwaa bie baha ə kibee ki Yufleti tɨŋ.” 15 Nəni, Nchinda Chu yo hlə hlooli bənchinda bə bənua bie. Bənchinda bie duŋ bə́ mà bwɛɛla chi bə́ lə yee bə́ kē bwɔɔ bə butuu maa kpii bə kigoŋ kkɨŋ bə́ yá hlooli bə́, ə bə́ jii wɛɛ mwe ə wɛ́ɛ tɔh ŋə bəne mə. 16 Mmà ŋŋoo ye kitnu ki bəne bə ntɨmə bə bikwuŋ duŋ. Bə́ mà duŋ munhla gi fwe (200,000,000). 17 Bikwuŋ bbɨŋ mmà ŋŋəŋ bie ə fieŋ ye yobutuu mə lə bə bəne bbəŋ bə́ mà biŋ bie bəŋ mà duŋ ə yɨhŋ jé mə: Bəne bie mà leela bikwaka kəə bəkɔŋ mu, nche yo geenə ye bwii lə, baa duŋ ye buuli, baa duŋ dəŋ mbuluu. Bikuu bi bikwuŋ bie màa bi bū bi bətuntunu, bwii bə ndɨŋ maa fieŋ fidi ye muŋkaŋ mmuŋ mu dò lə màa mu fū ə bi jə́. 18 Bieŋ bi bəŋgə bbɨŋ bi mà duŋ, ə maa bwii bə ndɨŋ maa fieŋ ye muŋkaŋ mmuŋ mu dō lə màa bi fū ə bikwuŋ bie jə́, jii bəne wɛɛ mwe ə wɛ́ɛ tɔh mə. 19 Muŋga mu bikwuŋ bie duŋ ə bi jə́, maa ə ŋini ŋəbi go. Ŋini ŋəbi duŋ ye yɔ́ lə ŋə kə̄nə bikuu, ə duŋ fieŋ ffɨŋ bi bìaanə bəne mu.

20 Maa ye fi mà kah'lə nəni, bəne bbəŋ bə́ mà she bie bbəŋ bieŋ bi bəŋgə bɨhŋ mà kə jii lə bə́ kə, nakə fii lə dəŋ tɔ́ŋ ŋəbə ə bieŋ bbɨŋ bə́ mà fə bə kwáŋ ŋəbə kə. Bə́ nakə wii lə bənchee bə bənchinda bə hlaata, bə dwáŋ ŋə nchéh ləkə ŋŋəŋ bə́ bì bə chwaa ki ge ki kpo, ləkə kiwu, ləkə bə choo kiɛhɛŋ, ləkə bə tə, ləkə bə tiɛɛ. Ə duŋ dwáŋ ŋə nchéh ŋəhŋ duŋ ə ŋə nakə ŋəŋ nə ə fieŋ go, ləkə wo ləkə jaa. 21 Bə́ nakə fii lə dəŋ tɔ́ŋ bənjii bəne ləkə bənfə nfíŋ, ləkə waali kiwaali ləkə yi buyi.