Binyiinə 8

Ŋwa Nshɔŋ wobi biili li dɨŋ

Ŋwa Nshɔŋ yo bwo wobi biili li chá fumanyaaŋ le ə kiŋwaati kie bəŋ, bidɔhɔ də bu dənə nəni shiiiŋ gəŋ bwii kiŋkə ki ntaŋ bwɔɔ. 2 Nhlə ŋŋəŋ bənchinda bə Chu bə fumanyaaŋ bie bə lema ə Chu fwi. Bə́ nəə biŋgbu fumanyaaŋ bə bə́. 3 Nchinda Chu ju ja bwo lemi ə taŋ li ntofi tɨŋ, i kəna kilahŋ kkɨŋ bə́ tɔ̀ŋ kijooni mə, bə́ bì bə chwaa ki ge ki kpo. Bə́ nəə wu kijooni kiŋaaŋkə lə i buhuŋ ə taŋ li ntofi le mə bə Chu cheenə bəne bbəŋ bə́ dùŋ bə Chu. Dɔhɔ ki taŋ le duŋ bə́ mà biee bə chwaa ki ge ki kpo, li duŋ ə kabala yo fwi. 4 I tɔŋ, ndɨŋ mə kijooni kie bə Chu cheenə bəne bbəŋ bə́ dùŋ bie bə Chu fu ə wu kwáŋ ja biŋ gəŋ ə Chu fwi. 5 Nchinda Chu yo hlə ja jə kilahŋ kkɨŋ bə́ tɔ̀ŋ kie kijooni ə ki mə, jə bwii ə taŋ li ntofi le mə, yii mə ki yii, i hlə lɛɛ yaŋ kwe. Ye i lɛɛlə nəni, jaŋ bu chɔɔ yee i lāla, i dīmi, i kə̄ kiŋgbaŋgba, shishɔ nə̄nə.

Bənchinda bə Chu chɔɔ bəntɔŋ biŋgbu

6 Bənchinda bə Chu bə fumanyaaŋ bbəŋ bə́ mà kənə bie biŋgbu bi fumanyaaŋ bie hlə bwɛɛ go ŋəbə bəntɔŋ bi.

7 Nchinda Chu nnu fwii yo tɔŋ kiih kie kiŋgbu, bóh bə bwii fuhuŋ bə ŋgɔŋ gbe yaŋ kwe. Wɛɛ wi shishɔ mwe ə wɛ́ɛ tɔh mə fi, wɛɛ mwe ə wɛ́ɛ tɔh ŋə bite mə fi, biyaa bbɨŋ bi jɛ̀ki fi dəŋ kiɛkiɛ.

8 Nchinda Chu chá fie yo tɔŋ kiih kiŋgbu, bə́ lɛɛ fieŋ fidi bwii dō ə fi go, fi duŋ ye kɔnɔ kiŋkuntaŋ lə. Fi gbe ə nɔ bəŋ. Wɛɛ mwe ə wɛ́ɛ tɔh ŋə nɔ mə chu ŋgɔŋ. 9 Wɛɛ mwe ə ŋə tɔh mə ŋə bieŋ biŋkee bbɨŋ bi dùŋ ə nɔ yo mə kpe. Wɛɛ mwe ə wɛ́ɛ tɔh mə ŋə chə́ŋ yí njɔ hlaki.

10 Nchinda Chu chá shɔ yo tɔŋ kiih kiŋgbu, fintoola fidi fiŋkuntaŋ fu bwo ə buh, fi dō ye mɔɔ lə, gbe bwo kəə wɛɛ mwe ə wɛ́ɛ tɔh ŋə bibee mə bə bidɔhɔ bidi bi munfwoŋ mə. 11 Yii li fintoola fie mà duŋ lə Buloojɛ. Ye fi gbelə nəni, wɛɛ mwe ə wɛ́ɛ ŋə tɔh ŋə ŋgwíŋ mie mə yee mə lō jə. Bəne kiŋaaŋkə kpe yu ŋgwiŋ mməŋ bə́ màa bə́ ŋwī mie, yulahalə fintoola fie mà fəə ŋgwiŋ mie chu lò jə ə nlo mə.

12 Nchinda Chu chá nya yo tɔŋ kiih kiŋgbu, fieŋ fidi gɔhɔ wɛɛ mwe ə wɛ́ɛ ŋə tɔh ŋə kitaŋ mə, maa wɛɛ mwe ə wɛ́ɛ tɔh ŋə kpii mə maa dəŋ wɛɛ mwe ə wɛ́ɛ tɔh ŋə muntoola mə. Wɛ́ɛ ŋə mwe mwe ŋəbi yee ŋə dūŋ ə jɨbə mə. Kinchaa nakə baa lə duŋ ə wɛɛ mwe ə wɛ́ɛ tɔh ŋə bushi mə maa ŋə butuu mə.

13 Lə nchiini, ŋ'wo ye faŋ dīimə ə buh, ye i màa i tīɛŋ lə ə buuli mə kintekinte i yɔ̄ɔ lə, “Ŋgə looo, ŋgə looo, ŋgə yáa i dūŋ bə bəne bbəŋ bə́ dùŋ bəŋkafwi bə mbiŋ nu bwɔɔ nnu bə́ yá tɔŋ biŋgbu bbɨŋ bi she bie bbɨŋ bənchinda bə bətɔh chu duŋ bie bəntɔŋ.”