Binyiinə 7

Bə́ fə kinyii ə bəne Bəishlael go bənchuku gbi bə mbwɛɛnya ə nchɔ bənua (144,000)

Bwɔɔ nnu dɨŋ, ŋŋəŋ bənchinda bə Chu bənua bə́ lema ə bənchi bə mbiŋ bənua mə, bə́ kə̀ə fwee kkɨŋ ki fù ə bənchi bie mə lə ki kə yee ki kāh ə shishɔ mə ləkə ə nɔ bəŋ, maa ə bite go. 2 Mbaa ŋŋəŋ ə nchinda Chu ju go, i fū ə wɛɛ wwuŋ kitaŋ bɛɛ, i kə̀nə fieŋ fi Chu nnu i kə̀nə yo kinduŋh ffɨŋ i chè bəne biih mu bə kwaŋ. I hlə chee bənchinda bə Chu bə bənua bie bə die ntaabə. Bənchinda bəhŋ duŋ bbəŋ bə́ mà nəə muŋga bə bə́, lə bə́ bihi shishɔ maa nɔ. 3 I chee yɔɔ lə, “Bə kə bihi shishɔ ləkə nɔ ləkə bite. Kkə kaani kə chiee mənshi mə bəne bə nimi bə Chu ya kə.” 4 Ŋ'wo lə bəne bbəŋ bə́ mà che bie mà duŋ bənchuku gbi bə mbwɛɛnya ə nchɔ bənua (144,000), bə́ ma fu ə bichəŋ bi Ishlael mə binhliŋ. 5 Bə́ mà chiee bəne ə kichəŋ ki Juda mə, bənchuku yuufi ə nchɔ bəfwe, ə kichəŋ ki Lobɛŋ mə, bənchuku yuufi ə nchɔ bəfwe, ə kichəŋ ki Gad mə, bənchuku yuufi ə nchɔ fwe, 6 ə kichəŋ ki Asha mə, bənchuku yuufi ə nchɔ bəfwe, ə kichəŋ ki Naftali mə, bənchuku yuufi ə nchɔ bəfwe, ə kichəŋ ki Manashi mə, bənchuku yuufi ə nchɔ bəfwe, 7 ə kichəŋ ki Shimiyɔŋ mə, bənchuku yuufi ə nchɔ bəfwe, ə kichəŋ ki Lebi mə, bənchuku yuufi ə nchɔ bəfwe, ə kichəŋ ki Ishaka mə, bənchuku yuufi ə nchɔ bəfwe, 8 ə kichəŋ ki Jebuluŋ mə, bənchuku yuufi ə nchɔ bəfwe, ə kichəŋ ki Joshɛ mə, bənchuku yuufi ə nchɔ bəfwe, ə kichəŋ ki Benjameŋ mə, bə́ che bənchuku yuufi ə nchɔ bəfwe.

Kimɔ ki bəne gbɛɛɛ

9 Bwɔɔ nnu dɨŋ, nchiini ŋŋəŋ kimɔ ki bəne nəni gbɛɛɛ kkɨŋ duŋ ə mbɛɛ nakə faa kə. Bə́ mà fu ə bitɨŋ binhliŋ mə, bə bichəŋ binhliŋ mə maa bəne bənhliŋ bə díe yinhliŋ, bə́ lema ə kabala Ŋwa Nshɔŋ yo fwi, bə́ leela bindu biwu, kənə bibaanə ə bə́ kwáŋ. 10 Bə́ màa bə́ wīli buh, bə́ yɔ̄ɔ lə, “Kinfukwoo bwò ə Chu ya go nnu i shiila yo ə kabala bəŋ maa ə Ŋwa Nshɔŋ go.” 11 Bənchinda bə Chu bənhliŋ lema fiili taa kabala yo kunə bə bəcha bə bəne bie maa bieŋ biŋkee bi binua bie, bə́ gbe chɨŋ mənhlɨŋ kwe ə kabala yo fwi, bə́ nə̄ kiŋkohi kiŋkuntaŋ bə Chu. 12 Bə́ màa bə́ fə̄ nəni, bə́ yɔ̄ɔ lə, “Yee fi Dûŋ lə! Kindohi bə kiŋkuntaŋ maa bufe duŋ bu Chu ya kə kaa. Yee kkə nə̂ kimbaafɛɛ bə wu. Ə kə̀nə wu kinyohi bə muŋga bə kintakwaŋ, i bà bwɔɔ mənhliŋ kə kaa! Yee fi Dûŋ lə.”

13 Ŋwucha ju ə bəcha bie mə, bii bə mi ləə, “Bəhŋ lə bə nyəhə bbəŋ bə́ leela bindu biwu lə? Bə́ fu fəhəŋ lə?” 14 Nchuu bə wu lə, “Che kwili, ə kələ kwaa wə.” I yɔɔ bə mi lə, “Bəhŋ lə bəne bbəŋ bə́ fù ə bwɔɔ ŋgə ŋkuntaŋ mə. Bə́ wiila bindu bibə ə ŋgɔŋ mə Ŋwa Nshɔŋ mə, yee bi wūunə, 15 bə́ hlə yee bə́ dūŋ ə kabala Chu fwi, bə́ nɨ̀ŋ bə wu ə butuu bə bushi, ə chəŋ ntofi yi mə. Wu nnu i shii yo ə kabala yo bəŋ yá yi duŋ fiŋgwii fibə. 16 Jəbulə yá baa lə wu bə́ kə, ntɔntɔ yá baa lə ŋɨŋ dəŋ bə́ kə. Ŋwiŋ yá baa lə kəh bə́ kə, Yoo kishi yá baa lə tɔŋ bə́ kə. 17 Fi yáa fi dūŋ nəni, yulahalə Ŋwa Nshɔŋ nnu i dùŋ yo ə kabala yo kintekinte yáa i fwōŋ bə́ ye nfwoŋ shɔ́ŋ lə, i jə̀ bə́, i gə̀ŋ bə bə́ ə dɔhɔ ki ə ŋgwiŋ mməŋ mə nə̀ kinduŋh mə. Ə Chu yá giaali dəŋ ndəŋ mənhliŋ ə bə́ dí.”