Binyiinə 4

Jɔɔŋ ŋəŋ ye bə́ nə kiŋkohi bə Chu ə buh

Dɨŋ ə bieŋ bɨhŋ mə, mbaa ŋkee, ŋŋəŋ wulə ki buh duŋ yə. Die nni nhə nhlaa wo ye i yɔ̄ɔ bə mi ye kiŋgbu lə, baa yɔɔ bə mi lə, “Baŋ bwo fəŋ nnyii wə bieŋ bbɨŋ bi kə̀nə bənduŋ ə bwɔɔ nnu dɨŋ nu bəŋ.” 2 Cha mi, nja n'yee ndūŋ ə Fiana Chu mə, nhlə ŋŋəŋ ə kabala go i duŋ buh, ə duŋ mbɛɛ shiila ə wu bəŋ. 3 Mbɛɛ yo màa i tə̄ ye tə́ ŋəndi ŋəntachuŋ lə ŋŋəŋ bə́ chèe lə jashpa bə ŋŋəŋ bə́ chèe lə kaneliaŋ, komi kaala kabala yo kunə, i tə̀ dəŋ ye tə llɨŋ bə́ chèe lə ɛmelad. 4 Bəkabala bədi mbwɛɛnfie ə nchɔ bənua mà duŋ taa kabala yo kunə. Bəne bəcha bədi shiila ə bə́ bəŋ mbwɛɛnfie ə nchɔ bənua, bə́ leela bindu biwu, bɛŋ binfwili bi muŋkɨŋ bbɨŋ bə́ fə̀ bə chwaa ki ge ki kpo. 5 Jaŋ nni i làla màa i tə̄ ə kabala yo mə, kiŋgbaŋgba kə̀, i dìmi, bimɔɔ fumanyaaŋ dò ə kabala yo fwi ə duŋ bəfiana bə Chu fumanyaaŋ. 6 Fieŋ fidi mà duŋ dəŋ həmə kabala yo fwi, fi bu nɔ nnu i chàa ba nəni wɛɛŋ ye miajɔ lə.

Bieŋ biko bidi binua mà lema ə kabala yo bəŋ kiwɛɛ kinhliŋ, díi duŋ ə bi go fwi maa dɨŋ. 7 Fieŋ fiko fi fwii fie màa fi bu tuntunu, ffɨŋ fi bāŋ mu, bu naŋ niɛ, ffɨŋ fi baa baŋ mu kə̀nə bushi ye bu mbɛɛ lə, fi dɨŋ fie bu faŋ nnu i tìɛŋ. 8 Bieŋ biŋkee bi binua bie mà kənə bikulə buhlɔ buhlɔ, bi duŋ bə díi kiŋaaŋkə buh maa kwe. Bieŋ bie bwò bi shèeni ə butuu bə bushi kə wii lə kə. Bi bwò bi shèeni lə,

“Chu dùŋ wɛɛŋ! Chu dùŋ wɛɛŋ! Chu dùŋ wɛɛŋ!

Ə wu Baba Chu, nnu i Kə̀nə Muŋgeni Munhliŋ.

Ə wu nnu i mà hlaa duŋ, ə duŋ wu nnu i dùŋ, ə duŋ wu nnu i yá bwo.”

9 Bwɔɔ nnu bieŋ biŋkee bie bwo yee bi fāŋ kiŋkohi bə Chu bi nə̀ kindohi maa bə kimbaafɛɛ bə wu nnu i mà shii yo ə kabala yo bəŋ, nnu i dùŋ yo həmə bwɔɔ mənhliŋ kə kaa, 10 bəcha bə mbwɛɛnfie ə nchɔ bənua bəhŋ, hlə gbe gəŋ ə wu fwi nnu i shii yo ə kabala yo bəŋ, nə kiŋkohi kiŋkuntaŋ bə wu nnu i dùŋ yo həmə bwɔɔ mənhliŋ kə kaa kə. Bwɔɔ nnu bə́ fə̀ nəni bə́ bwà binfwili bibə bi muŋkɨŋ, bə́ nɔ̀hiŋ ə kabala yo fwi bə́ shèeni lə,

11 “Wə nnu wə dùŋ yo Baba, wə dùŋ Chu ya,

wə wuna nnu duŋ ə yee bə́ fāŋ wə kiŋkohi,

nə kindohi bə wə,

bə dòhi muŋga mwo,

yulahalə ə mà fə wə bieŋ binhliŋ,

ə màa wə nnu wə mà leka, wə hlə fə bi, bi hlə yee bi dūŋ həmə.”