Binyiinə 3

Hlɨŋ Jisho nni i gə̀ŋ ə kimbumə ki bəne bə kimbemi ki Shaldi mə

Mbɛɛ nnu nhə ŋŋəŋ yo baa yɔɔ bə mi lə, “Bieŋ kiŋwaati kɨhŋ bə nchinda Chu nnu i dùŋ yo ə kimbumə ki bəne bə kimbemi ki Shaldi mə lə, ‘Ni lə die nni wu nnu i kə̀nə yo bəfiana bə Chu fumanyaaŋ bə muntoola fumanyaaŋ. Ŋkə̀lə fwɔ́ ŋieeŋ. Bə nyiee ye bəne bbəŋ bə́ kàani bəŋkee, bə duŋ bəŋkpi. 2 Bə ŋənə, bə yii muŋga ə fieŋ ffɨŋ fi she ffɨŋ fi chu chəələ dəŋ bəŋkpe. Yee bə kə̂lə lə ŋkə ŋŋəŋ nə ye fwɔ́ ŋieeŋ nwaa gəŋ kpee həŋgbɔŋ ə Chu ŋgwəŋ fwi kə. 3 Bə hle fieŋ ffɨŋ bə mà tɨŋna jə ə duŋ ffɨŋ bə mà woo. Yee bə kə̂nə ə fimbini fie go, bə fii tɔ́ŋ ŋieeŋ. Ə bə nakə ŋənə, ə n'yá nja bwo ə bəŋ mə ye ŋwuŋ buyi lə, nnu bə lə nakə kələ bwɔɔ yo kə. 4 Kwaalə, bə bie bə bəne bədi chɛɛ ə Shaldi bbəŋ bə́ kə yihi bindu bibə kə. Bə mbini bie duŋ bbəŋ kkə yáa kkə jāa bee bə́, bə́ leela bindu biwu, yulahalə ə bə́ bbəŋ bə́ wuna bənfə lə. 5 Mbɛɛ nnu i yá kah, ə wu nnu i yá lee dəŋ bindu biwu. Mbini yo mbɛɛ duŋ n'yá ŋgɔhɔ fwoo yii liih ə kiŋwaati ki bəne bbəŋ bə́ kə̀nə kinduŋh ki kə kaa mə. N'yá n'yɔɔ kiih bə kijə kɨŋŋ ə Tah fwi, maa bə bənchinda biih lə ŋkələ wu. 6 Mbɛɛ nnu i kə̀nə bituŋ, i wo fieŋ ffɨŋ Fiana Chu yɔɔ fie bə bimbumə bi bəne bə kimbemi.’”

Hlɨŋ Jisho nni i gə̀ŋ ə kimbumə ki bəne bə kimbemi ki Filadelfia mə

7 Mbɛɛ yo baa yɔɔ bə mi lə, “Bieŋ kiŋwaati bə nchinda Chu nnu i yo dùŋ ə kimbumə ki bəne bə kimbemi ki Filadelfia mə lə, ‘Bɨhŋ lə biyɔɔnə bi mbini yo mbɛɛ nnu i dùŋ yo ba wɛɛŋ, maa bə kichɛɛŋ. Ə wu nnu i kə̀nə kiwɛnə ki muŋkɨŋ mu Daafi. Bwɔɔ nnu i wɛ̀, mbɛɛ hləŋ həmə nnu mə lə fwaŋ chuu kə, ə mə lə fwaŋ, mbɛɛ hləŋ həmə nnu mə lə wɛ chuu kə. 8 Ŋkə̀lə fwɔ́ ŋieeŋ. Bə wələ wo, ŋ'wɛɛ bəŋ wulə kie chi ki yə, mbɛɛ hləŋ həmə nnu duŋ ə i fwaŋ chuu ki kə. Ŋkə̀lə lə maa ye bə duŋ lə kə kənə muŋga gbaaŋ, bə bələ kwaa ə duŋ biyɔɔnə bɨŋŋ. Bə kə nɨhŋ nə mi kə. 9 Bə wələ wo, bəne bbəŋ bə́ dùŋ bie ə kintu ki Hlaata mə, bbəŋ bə́ yɔ̀ɔ bie lə bə́ dùŋ Bəjuu, bə́ kaalə ə duŋ yo, bə́ kə duŋ nə Bəjuu kə. Nduŋ nfə ə bə́ bwo bɛŋ núh bəŋ fwi kələ lə nleki bəŋ. 10 Ye bə chìlə die njəŋ bəŋkwaa biwɛɛ, nlə nfwoŋ bəŋ bwɔɔ nnu bimɔŋnə lə bwo ə mbiŋ nu mə, bəmɔŋ bəne bənhliŋ bbəŋ bə́ dùŋ ə mbiŋ nte. 11 N'yu mbwō bwɔɔ chɛɛ. Bə kənə ə fieŋ ffɨŋ bə kə̀nə fie go ntakə, fo mbɛɛ ju lə nakə jəə kinfwili kieeŋ ki muŋkɨŋ kə. 12 Mbɛɛ nnu mə lə kah, nlə nfə ə yee i dūŋ wooli ki chəŋ ntofi Chu ŋgwəŋ, ə i yá nakə fwoo mu kə. Nlə mbieŋ yii li Chu ŋgwəŋ ə wu go, bə yii li kibalaki ki Chu ŋgwəŋ kkɨŋ ki dùŋ Jelushalɛŋ fwɔ, nnu i fu ə Chu ŋgwəŋ go ə buh. Nlə mbieŋ dəŋ yii lɨŋŋ lifwɔ ə wu go. 13 Mbɛɛ nnu i kə̀nə bituŋ i wo fieŋ ffɨŋ Fiana Chu yɔ̀ɔ fie bə bimbumə bi bəne bə kimbemi.’”

Hlɨŋ Jisho nni i gə̀ŋ ə kimbumə ki bəne bə kimbemi ki Layodeshia mə

14 I baa yɔɔ bə mi lə, “Bieŋ kiŋwaati bə nchinda Chu nnu i dùŋ yo ə kimbumə ki bəne bə kimbemi ki Layodeshia mə lə, ‘Ni lə die mbini yo, nnu yii liih dùŋ yo lə, Yee fi Dûŋ lə. Ə wu mbini yo, nnu i lèmi yo ba ə die yi bəŋ, ə duŋ wu nnu i yɔ̀ɔ kichɛɛŋ ki Chu. Ə wu kinchɔɔ ki fieŋ finhliŋ ffɨŋ Chu mà fəə. 15 Ŋkə̀lə fwɔ́ ŋieeŋ. Bə duŋ kwaa nəŋ! Bə də̀ lə, ləkə bə shì lə. Ŋkiɛɛ lə bə hə yee bə də̂ ləkə bə hə yee bə shî! 16 Nəni, ye bə duŋ lə ŋkwo weŋ kintekinte kə dəə ləkə kə shee, nlə ŋŋaŋ fwoo bəŋ ə mi jə. 17 Bə yɔ̀ɔ lə bə dùŋ bəne bə kpo, lə bə koo kə baa lə kiɛɛ fieŋ kə. Bə yɔ̀ɔ nəni kə kələ lə fieeŋ fie fwɔɔ ə nfwɔmə kə lə? Bə dùŋ bəne bbəŋ dùŋ ə yee bə́ kwō hlɨŋ bə bəŋ gbaaŋ, bə dùŋ bəne bənjɨnənə, baa duŋ bəmbandii maa bəne bbəŋ bə́ jàa bichi bindende! 18 Ŋkiɛɛ lə ŋkeeh bəŋ lə bə taŋ chwaa kige ki kpo ə mi kwáŋ, kkɨŋ bə́ tɔŋna ki bə jo ki chāa, ə bə hlə duŋ bəne bə kpo. Bə taŋ bindu biwu bəŋkəə bichi bindende bieeŋ mu, fo bəne lə nakə yee bə́ ŋə̄ŋ ə bi go gbo bèe bəŋ kə. Bə taŋ dəŋ nche yi díi ŋieeŋ ə mi kwáŋ lɔɔ díi ŋieeŋ mu, fo bə lə yee bə́ ŋə̄ŋ ə bieŋ go. 19 Bəne bbəŋ nlèki, ə bə́ bbəŋ mbà bənhlaah bə́ yu fwɔ́ ŋəbə, nnə̀ bə́ ŋgə bəŋkeeh bə́. Nəni, bə kənə ŋgɨŋ bəŋgaanə tɔ́ŋ ŋieeŋ. 20 Bə wələ wo, n'yu nlēmi fwih ŋkɔ̀ɔ. Ə mbɛɛ lə wo die njəŋ wɛ wulə kie, ə nlɛɛ chili wu, ə bee wu di fieŋ fimwi. 21 Mbɛɛ nnu mə lə kah, nlə nnə wu dɔhɔ, ə kkə shii bee wu ə kabala ŋgwəŋ bəŋ, yəəŋ ye mmà ŋkah'lə, ŋgəŋ shii bee Tah ə kabala wi bəŋ. 22 Mbɛɛ nnu i kə̀nə bituŋ i wo fieŋ ffɨŋ Fiana Chu yɔɔ fie bə bimbumə bi bəne bə kimbemi.’”