Binyiinə 2

Hlɨŋ Jisho nni i gə̀ŋ ə kimbumə ki bəne bə kimbemi bə Ɛfɛshu mə

Mbɛɛ nnu mmà ŋŋəŋ yo yɔɔ bə mi lə, “Bieŋ kiŋwaati bə nchinda Chu nnu kimbumə ki bəne bə kimbemi bə Ɛfɛshu mə lə, ‘Ni lə die mbɛɛ nnu i kə̀nə yo muntoola mu fumanyaaŋ mwe ə kwaŋ wiih wi diee, i jàa ə bieŋ bi fumanyaaŋ bie mə bbɨŋ bə́ fə̀ bə chwaa kige ki kpo kkɨŋ bə́ tɨ̀ŋ chi bimɔɔ bəŋ: 2 Ŋkə̀lə fwɔ́ ŋieeŋ ye bə nɨ̀ŋ bə bwòŋ, ŋkə̀lə dəŋ biwɛɛ bbɨŋ bə kwàa bə ye duŋ ə bə nakə bemi fieŋ ffɨŋ bəne bəwaha bwò bə fi kə. Bə mɔŋna bəne bbəŋ bə́ chèe go ŋəbə lə bə́ dùŋ bəne bə faŋnə bə Jisho bə́ dùŋ kə duŋ nə kə, bə ŋə̀ŋ lə bə́ dùŋ bəne bə yo kaalənə. 3 Ŋkə̀lə ye bə kwaala lə biwɛɛ ə fieŋ finhliŋ mə yu mi kə fɨŋ nə kə. 4 Kwaalə, fieŋ fidi fie həmə ffɨŋ ŋkənə bə bəŋ ffɨŋ fi kə nwaa lə mi kə. Bə baala kənə kinleki kkɨŋ bə mà kənə kie fwii kə. 5 Bə hle dɔhɔ kkɨŋ bə màa bə hlaa bə dùŋ kie, bə hlə bwo gbe. Bə gaanə tɔ́ŋ ŋieeŋ yee bə fə̂ ye bə màa bə fə̄lə fwii. Ə bə nakə gaanə, ə mbwo fwoo fieŋ fieeŋ ffɨŋ bə́ chì fie mɔɔ bəŋ dɔhɔ kkɨŋ fi lèmi kie. 6 Kwaalə, fieŋ finwaa ffɨŋ bə fə̀ duŋ lə bə lèki lə fwɔ wi kintu ki bəne bə Nikolataŋ, ə duŋ dəŋ fieŋ ffɨŋ nduŋ kə lèki kə.

7 Mbɛɛ nnu i kə̀nə bituŋ, i wo fieŋ ffɨŋ Fiana Chu yɔ̀ɔ fie bə bimbumə bi bəne bə kimbemi. Mbɛɛ nnu i yá kah ə n'yá nnə wu je ə i di sháŋ yí tiɛɛ kkɨŋ ki nə̀ kinduŋh, ki duŋ ə dɔhɔ ki kinjənjə ki Chu mə.’”

Hlɨŋ Jisho nni i gə̀ŋ ə kimbumə ki bəne bə kimbemi bə Shimna mə

8 Mbɛɛ yo baa yɔɔ bə mi lə, “Bieŋ kiŋwaati bə nchinda Chu nnu i dùŋ yo ə kimbumə ki bəne bə kimbemi bə Shimna mə lə, ‘Ni lə die mbɛɛ nnu i dùŋ yo Fwi, i duŋ Dɨŋ. Ə duŋ wu nnu i mà kpee i bwo chu yee i dūŋ fa. 9 Ŋkə̀lə bəŋgə bbəŋ bə wò maa bə njɨnənə kieeŋ, kwaalə bə duŋ bəne bə kpo. Ŋkə̀lə díe yiwaha yyɨŋ bəne yɔ̀ɔ bə bəŋ. Bə́ chèe go ŋəbə lə bə́ dùŋ Bəjuu, bə́ kə duŋ nə kə. Bə́ dùŋ ə kimɔ ki hlaata mə. 10 Bə kə yee bə lɔ̂ bəŋgə bbəŋ bə duŋ bəŋ'wo kə. Bə wələ wo, hlaata hə chu duŋ lə i yii bəŋ bədi ə chəŋ munfwa mə bəmɔŋ bəŋ. Bə yá yi wo ŋgə ə joo bəŋ yuufi. Maa ə duŋ dəŋ lə bə kpe, yee bə lêmi ntakə, nəni ə nnə bəŋ kinfwili ki muŋkɨŋ kkɨŋ ki dùŋ kinduŋh ki kə kaa.

11 Mbɛɛ nnu i kə̀nə bituŋ, i wo fieŋ ffɨŋ Fiana Chu yɔ̀ɔ fie bə bimbumə bi bəne bə kimbemi. Mbɛɛ nnu i yá kah duŋ ə kpe chá fie yá baa tuu ə wu go kə.’”

Hlɨŋ Jisho nni i gə̀ŋ ə kimbumə ki bəne bə kimbemi bə Pegamuŋ mə

12 I baa yɔɔ bə mi lə, “Bieŋ kiŋwaati bə nchinda Chu nnu kimbumə ki bəne bə kimbemi bə Pegamuŋ mə lə, ‘Ni lə die mbɛɛ nnu i kə̀nə yo mbieelə: 13 Ŋkə̀lə dɔhɔ kkɨŋ bə dùŋ. Bə dùŋ ə dɔhɔ kkɨŋ kabala Hlaata duŋ kibɛɛ. Kwaalə bə lèmi dəŋ ə yii lɨŋŋ bəŋ ntakə. Bə mà kə nɨhŋ nə bən'yii tɔŋ ə mi mə ə joo ŋə Antipa mbɛɛ ŋgwəŋ kichɛɛŋ mə. I màa i yɔ̄ɔ kɨŋŋ, bə́ jii wu ə bəŋ mə ə dɔhɔ kkɨŋ Hlaata dùŋ. 14 Kwaalə, ŋkənə bieŋ bidi chɛɛ bə bəŋ bbɨŋ bi kə nwaa lə mi kə. Bəne bədi bie həmə ə kimɔ kieeŋ mə bbəŋ bə́ bə̀lə keehnə kkɨŋ Ablahaŋ mà keeh Balak lə i fə fieŋ fidi ffɨŋ bwɔni Bəishlael lə bɨnə gbe ə fi bəŋ. I mà fəə yee bə́ dī biləə bbɨŋ bə́ fə̀ ntofi mu nə bə bəcheh baa fə yee bə́ dūŋ bə fwɔ wi kiwaali. 15 Ə lə dəŋ yəəŋ ye bə kənə bəne bədi ə kintu kieeŋ mə bbəŋ bə́ bə̀lə keehnə ki bəne bə Nikolataŋ. 16 Nəni, bə gaanə tɔ́ŋ ŋieeŋ. Ə bə nakə gaanə, ə mbwo bwɔɔ chɛɛ ntɨmə bə bəne bie bə mbieelə nnu i fù ə mi jə. 17 Mbɛɛ nnu i kə̀nə bituŋ, i wo fieŋ ffɨŋ Fiana Chu yɔɔ fie bə bimbumə bi bəne bə kimbemi. Mbɛɛ nnu i yá kah, ə n'yá njə ə mana^ª nnu bə́ mà nələ nə bə wu, ə mbaa nə wu tə liwu bə́ bieŋna yii lifwɔ bəŋ llɨŋ mbɛɛ kə duŋ nə həmə nnu i kə̀lə yii le kə kahiŋ mbɛɛ nnu i jə yo tə le.’”

Hlɨŋ Jisho nni i gə̀ŋ ə kimbumə ki bəne bə kimbemi ki Tayatila mə

18 Mbɛɛ yo baa yɔɔ bə mi lə, “Bieŋ kiŋwaati bə nchinda Chu nnu i dùŋ yo ə kimbumə ki bəne bə kimbemi ki Tayatila lə, ‘Ni lə die Ŋwa Nchu. Ə duŋ wu nnu díi ŋiih làla ye liniini li bwii lə, wuh ŋiih duŋ fiɔɔŋ ye chwaa kige kkɨŋ bə́ tɔ̀ŋ bə jo. 19 Ŋkə̀lə fwɔ́ ŋieeŋ, ŋkə̀lə ye bə kə̀nə kinleki, ŋkə̀lə dəŋ tɔ́ŋ ŋŋəŋ bə yìi ə mi mə maa nimi llɨŋ bə nɨ̀ŋ bə ye bə kwàa tɔŋ. Ŋkə̀lə dəŋ lə fwɔ́ ŋieeŋ ŋə fidiɛɛ nwaala kah ŋŋəŋ bə mà hlaa kənə ŋie fwii. 20 Kwaalə, fieŋ fidi fie həmə ffɨŋ ŋkənə bə bəŋ ffɨŋ fi kə nwaa lə mi kə. Bə tookwaŋ ə kpɛ nnu bə chèe nu lə Jeshebel go, yee i fə̄ fieŋ ffɨŋ i fə̄ fie. I chèe gbo wiih lə i duŋ mbɛɛ hlɨŋ Chu, i fìhi bəne bəŋŋ bə keehnə kiih, i fə̀ bə́ dùŋ ə fwɔ wi kiwaali mə, bə́ dì dəŋ biləə bbɨŋ bə́ tofa bəcheh mu. 21 Nnəə wu bwɔɔ bəŋgaanə tɔŋ liih, kwaalə i nɨhŋna bəŋgaanə fwɔ wiih wi kiwaali we. 22 Bə wələ wo, nlə nfaŋ jəŋ ə wu go, ə i nɔhiŋ wu ta ə yee i ŋɛ̄kɛ bə yi, ə nfə ə bəne bbəŋ bəə bə́ fə̀ bie kiwaali kie wo ŋgə ntaabə, kahiŋ lə bə́ gaana bəmbələ fwɔ wi kpɛ yo. 23 Nlə njii bəne biih bə kintu. Nəni, ə bimbumə bi bəne bə kimbemi binhliŋ hlə kələ lə ə mi nnu ŋkə̀lə bieŋ bbɨŋ bi dùŋ ə biwɛɛ bi bəne mə bə bbɨŋ bi dùŋ ə tɔ́ŋ mə. Nlə nhluŋ mbɛɛ mənhliŋ bələ ye nimi liih duŋ lə.

24 Kwaalə, bəŋ bədi bə Tayatila lèmi lə ə dɨŋ kɨhŋ keehnə bəŋ kə, bə keeh'lə dəŋ fieŋ ffɨŋ bəne bədi chèe lə ə bieŋ bi Hlaata bbɨŋ bi dùŋ ə nələ mə, n'yɔ̄ɔ lə mbaalə chi ntiɛ ndili ju ə bəŋ bəŋ kə. 25 Fi duŋ kwaa lə, yee bə kə̂nə ə fieŋ ffɨŋ bə kə̀nə fie go ntakə, gəŋ bwii bbuŋ n'yá mbwo. 26 Mbɛɛ nnu yá kah, nnu i fə̀ nimi llɨŋ nlèki le gəŋ kpee həŋgbɔŋ, ə n'yá nə wu muŋga ə bitɨŋ bəŋ. 27 Yəəŋ ye Tah nə lə mi muŋga, nlə nnə muŋga ə yee i hlāah bi bə kichɔchɔ, i chɛ̀hi bə́ mu ye shó ŋə mbiŋ ŋŋəŋ ŋə kpee hlaamə biŋkə biŋkə. 28 Nlə nnə dəŋ wu fintoola fi həmbumbwaa. 29 Mbɛɛ nnu i kə̀nə bituŋ, i wo fieŋ ffɨŋ Fiana Chu yɔ̀ɔ bə bimbumə bi bəne bə kimbemi.’”