Binyiinə 1

Kiŋwaati ki Binyiinə bbɨŋ Jisho mà nyii bə Jɔɔŋ

Kinchɔɔ

Kiŋwaati kɨhŋ duŋ ki bieŋ bbɨŋ Jisho Kleto mà nə bə Jɔɔŋ, ə duŋ bieŋ bbɨŋ Chu mà nə bə Jisho lə i nyii bə bəne biih, lə ə bi bbɨŋ bi lə duŋ ba ə bwɔɔ bəŋ chɛɛ. Jisho Kleto hlə faŋ nchinda wi hə Jɔɔŋ mbɛɛ wi nimi, bənfə lə bə́ kələ bieŋ bie. 2 Jɔɔŋ hlə bieŋ fieŋ finhliŋ ffɨŋ i mà ŋəŋ, ffɨŋ fi dùŋ die Chu bə bieŋ bbɨŋ Jisho Kleto mà yɔɔ bə wu. 3 Kintɨŋ kiŋkuntaŋ dùŋ ki mbɛɛ nnu i chèe hlɨŋ Chu ni. Kintɨŋ kiŋkuntaŋ dùŋ dəŋ ki bəne bbəŋ bə́ wò fieŋ ffɨŋ bə́ bieŋna ə kiŋwaati kɨhŋ mə bə́ chì, yulahalə bwɔɔ bieŋ bie yo baha baha.

Jɔɔŋ nə cheenə bə bimbumə fumanyaaŋ bi bəne bə kimbemi

4 Ə mi Jɔɔŋ, mbīeŋ kiŋwaati kɨhŋ bə bimbumə bi kimbemi bi fumanyaaŋ bbɨŋ bi dùŋ ə bidi bi mbiŋ nu Ɛshia mə. Kinleki ki Chu bə kindunshiiŋ yee ki dûŋ bə bəŋ, kkɨŋ ki nò buh ə Chu kwuŋ, wu nnu i yo, i mà duŋna, nnu i yá bwo. Kinleki ki Chu bə kindunshiiŋ kɨhŋ yee ki dûŋ bə bəŋ kkɨŋ ki bwò ə bəfiana bə fumanyaaŋ bbəŋ bə́ dùŋ ə kabala wi fwi, 5 maa ə Jisho Kleto go nnu i bèmi kah bə nhlaa lə i lèmi ə die yi bəŋ. Ə wu nnu i mà duŋ mbɛɛ nnu fwii bənfiimə fu ə kpe mə. Ə duŋ wu nnu i hlàah bəŋkɨŋ bənhliŋ bə yaŋ kwe. Ə wu nnu i lèki be, i mà fwoola be ə yíwaha yaa mə bə ŋgɔŋ miih. 6 I fə be yee kkə dūŋ bəne bə muŋkɨŋ, fə lə yee kkə dūŋ bəche ntofi Chu wi bə Tili. Kiŋkuntaŋ bə muŋgeni dùŋ bə wu bwɔɔ mənhliŋ kə kaa. Yee fi Dûŋ lə.

7 Bə kee ŋəŋ, Jisho yu bwō, i yu bwō ə joonə mə. Bəne bənhliŋ yá ŋəŋ ə wu go maa bəne bbəŋ bə́ mà bɛŋ bie wu bə gɔŋ. Bitɨŋ bi yaŋ kwe binhliŋ yáa bi wīli ndəŋ yu wu. Ə li ye fi yá duŋ. Yee fi Dûŋ lə.

8 Baba Chu yɔɔ lə ə wu Alfa, ə wu Omega. Ə wu nnu i dùŋ, ə wu nnu i mà duŋ yo, ə wu nnu yá yi bwo. Ə wu Muŋgeni Munhliŋ.

Jɔɔŋ ŋəŋ ə Jisho go

9 Ə mi Jɔɔŋ, mwaa weŋ kimbemi ə wɛɛ wi Jisho mə, be bənhliŋ wò ŋgə yu wu, kkə duŋ ə muŋkɨŋ mwii mə, kkə kwàa tɔ́ŋ ə bieŋ binhliŋ mə. Mmà nduŋ ə nchi nnu Patmo mə, ə duŋ bə́ mà fwoo mi ə nfwoo mə yu die Chu nni mmàa dōntə mbaa n'yɔ̄ɔ ki Jisho. 10 Lə ə bwo duŋ butuu bu Baba, ndùŋ ə Fiana Chu mə, nduŋ duŋ ŋ'wo ye die ntaabə yɔ̄ɔ ə mi dɨŋ ye kiŋgbu. 11 I màa i yɔ̄ɔ lə, “Bieŋ bieŋ bbɨŋ wə yu ŋə̄ŋ bɨhŋ ə kiŋwaati mə, wə faŋ bə bimbumə bi bəne bə kimbemi bi fumanyaaŋ bbɨŋ bi dùŋ ə bibalaki bi Ɛfɛshu, Shimna, Pegamuŋ, Tayatila, Shaldish bə Filadelfia maa Layodeshia mə.”

12 Lə n'yee nfīimə bəŋəŋ mbɛɛ nnu i yɔ̄ɔ yo bə mi. Bwɔɔ nnu mmà nfiimə, ŋŋəŋ bieŋ bbɨŋ bə́ tɨ̀ŋ chi bimɔɔ bəŋ fumanyaaŋ bbɨŋ bə́ fə̀ bə chwaa ki kpo ki ge. 13 Mbɛɛ ju duŋ mə kintekinte ə bieŋ bie mə bbɨŋ bə́ tɨ̀ŋ chi bie bimɔɔ bəŋ ye Ŋwa Mbɛɛ lə, nnu i leela kindu ki ndiee, wala kiwalanə ə kɔŋ go kkɨŋ bə́ fəə bə chwaa ki ge ki kpo. 14 Fwee kiih ki fi wūunə ye fiɔŋ liwu lə, ki wūunə nəni buuu ye bó lə, díi ŋiih lala ye liniini li bwii lə. 15 Wuh ŋiih mà duŋ fiɔɔŋ ye chwaa ki ge kkɨŋ bə́ tɔŋ bə jo, die yi dīmi ye ŋgwíŋ mməŋ mə gbè lə. 16 I mà kənə muntoola fumanyaaŋ ə kwaŋ wiih wi diee mə, mbieelə nnu i dì wɛɛ ŋənhliŋ fu ə wu jə, bushi bwii tə̀ ye ŋwiŋ ŋaŋa lə.

17 Ye ŋŋəŋ lə ə wu go, ŋgbe ə wu fwi n'yee ndūŋ ye mbɛɛ ŋkpi lə. I chi kwaŋ wiih wi diee ə mi bəŋ yɔɔ lə, “Wə kə lɔɔ kə. Ə mi Fwi, ə mi Dɨŋ. 18 Ə mi nnu nduŋ yo həmə. Mmà ŋkpee, kwaalə kee ŋəŋ, mmà nchoo n'yee ndūŋ fa, n'yáa ndūŋ fa bwɔɔ mənhliŋ. Ə mi nnu ŋkənə kiwɛnə ki kpe bə ki mbiŋ bəŋkpi. 19 Nəni, bieŋ bieŋ bbɨŋ wə ŋəŋ, bieŋ bbɨŋ bi dùŋ fidiɛɛ bə bbɨŋ bi yá duŋ bə bbɨŋ bi yá bwo bwɔɔ nnu dɨŋ. 20 Fieŋ fi nələnə ffɨŋ muntoola mu fumanyaaŋ mmuŋ wə hə ŋəŋ mwe ə kwaŋ wuŋŋ wi diee mə bə bieŋ bi fumanyaaŋ bbɨŋ bə́ fə̀ bie bə chwaa ki ge ki kpo bbɨŋ bə́ tɨ̀ŋ chi bie bimɔɔ bəŋ nyii fɨhŋ nəŋ: Muntoola mu fumanyaaŋ mwe lə bənchinda bə Chu bbəŋ bə́ dùŋ bə bimbumə bi bəne bə kimbemi bə fumanyaaŋ, bieŋ bi fumanyaaŋ bbɨŋ bə́ tɨ̀ŋ chi bie bimɔɔ bəŋ duŋ bimbumə bi bəne bə kimbemi bə fumanyaaŋ bie.”