Binyiinə 5

Ŋwa Nshɔŋ wuna bəŋwobi bíili ŋə fumanyaaŋ ŋie

Mbaa ŋŋəŋ ə kiŋwaati kidi go ə kwaŋ wi diee wi mbɛɛ nnu i mà shii yo ə kabala yo bəŋ, ə duŋ bə́ bieŋna mənte maa yaŋ go, bə́ kaa ki ə ŋka mə, bə́ maala ə bidɔhɔ mə fumanyaaŋ bə bíili. 2 Mbaa nja ŋŋəŋ dəŋ ə nchinda Chu ntaabə ju go. I gɛ̀ɛmə bə die ntaabə i bìi ləə, “Ə nyəhə həmə nnu i wuna bəŋwobi biili lɨhŋ, hluuli kiŋwaati kɨhŋ lə?” 3 Mbɛɛ ju mà kə duŋ nə mə buh ləkə yaŋ kwe ləkə ə ke, nnu duŋ ə i hluuli kiŋwaati kie ləkə nnu duŋ ə i kee ə kiŋwaati kie mə kə. 4 Ŋkpe bə ndəŋ gbaaŋ lə mbɛɛ hləŋ nnu duŋ ə i wɛ kiŋwaati kɨhŋ ləkə kee ə ki mə. 5 Mbɛɛ ju ə kintu ki bəne bəcha bie mə yɔɔ bə mi lə, “Wə kə yee wə dê kə. Wələ wo, mbɛɛ nnu bə́ chèe yo lə Tuntunu, nnu i fu ə kichəŋ ki Juda mə nnu bə́ chèe dəŋ lə Gbɛɛni ə kichəŋ ki Ŋkɨŋ Daafi mə kaah ba. Ə wu nnu duŋ ə i wobi bíili ŋə fumanyaaŋ ŋie hluuli kiŋwaati kie.”^ª

6 Nja ŋŋəŋ Ŋwa Nshɔŋ go, i lèmi ə kabala yo kintekinte bə bieŋ biko bi binua bie bə bəne bəcha bie mə, i duŋ ə waalə bə́ nyieena wu. I mà kənə bitiɛɛlə fumanyaaŋ bə díi fumanyaaŋ. Díi ŋie duŋ bəfiana bə Chu fumanyaaŋ bbəŋ i faŋna bə fu gəŋ ə mbiŋ mənhliŋ mə. 7 Ŋwa Nshɔŋ yo gəŋ jə kiŋwaati kie ə kwaŋ wi diee wi mbɛɛ nnu i mà shii yo ə kabala yo bəŋ. 8 Ye i jə lə kiŋwaati kie nəni, bieŋ bi binua biko bie bə bəne bəcha bie mbwɛɛnfie ə nchɔ bənua gəŋ gbe ə Ŋwa Nshɔŋ yo fwi. Mbɛɛ mənhliŋ ə bə́ mə kəna chiŋ bə nchwa nnu bə́ fə̀ bə chwaa ki ge ki kpo, kijooni yiila mə. Kijooni kɨhŋ duŋ Chu cheenə bə bəne bə Chu. 9 Bə́ hlə sheeni yii lifwɔ lidi llɨŋ li yɔ̀ɔ lə,

“Ə wə nnu wə wuna bənjə kiŋwaati kie,

wobi biili le,

yulahalə bə́ mà nyieŋna wə,

ŋgɔŋ mwo yaah bəne ə kwáŋ ŋə yiwaha mə nə bə Chu.

Bəne bəhŋ fù ə bichəŋ binhliŋ mə, díe yinhliŋ,

bichəŋ bi bəne binhliŋ maa bitɨŋ binhliŋ.

10 Wə nəə bə́ muŋkɨŋ,

fə lə yee bə́ dūŋ bəche ntofi bə Chu ya.

Bə́ yáa bə́ hlāah ə mbiŋ nu mə.”

11 Mbaa kee, ŋ'wo díe yí bənchinda bə Chu bə duŋ ə bənchuku mə bənchuku mə bə ə munhla mə munhla mə. Bə́ lema kaa kabala yo kunə bə bieŋ biko bie maa bəcha bie. 12 Bə́ shēeni buh gbaaŋ bə́ yɔ̄ɔ lə,

“Ŋwa Nshɔŋ nnu bə́ mà nyieŋ yo,

ə wu nnu i wuna bəŋkənə

muŋga bə bieŋ maa bə bufe bbuŋ bu dùŋ bu Chu

maa yii liŋkuntaŋ bə kinyohi kiŋkuntaŋ maa bə kiŋkohi.”

13 Mbu ja wo bieŋ binhliŋ bbɨŋ Chu mà fəə bbɨŋ bi dùŋ ə buh bə yaŋ kwe maa ə shishɔ mə maa ə nɔ mə, maa bieŋ binhliŋ bbɨŋ bi dùŋ ə bidɔhɔ bɨhŋ mə, bi shèeni lə,

“Kinhləmə bə kiŋkohi bə kinyohi bə kiŋkuntaŋ maa muŋgeni

dùŋ ə kənə wu nnu i shìi yo ə kabala yo bəŋ

maa Ŋwa Nshɔŋ nnu i dùŋ yo bwɔɔ mənhliŋ kə kaa!”

14 Ye bi shēeni lə nəni, bieŋ binua biŋkee bie bemi lə, “Yee fi Dûŋ lə!” Bəne bəcha bie gbe kwe nə wu kiŋkohi kiŋkuntaŋ.