2 Pita 2

Bəne bə keehnə bə yo kaalənə

Dəŋ yəəŋ ye bəne bədi mà duŋ duŋ ja fu bwo ə bəne mə, bə́ kaalə yo lə bə́ duŋ bəne bə hlɨŋ Chu, ə duŋ dəŋ yəəŋ ye bəne bəkeehnə bə yo kaalənə lə yee bə́ dūŋ ə bəŋ mə. Bə́ lə wɛɛnə bwo bə dɨŋ keehnə kidi kkɨŋ duŋ ə ki bihi bəne, hlə nɨhŋ Che Kwoo nnu i mà kpe yo bən'yah bə́. Bə́ lə fə nəni hlə lɛɛ ŋgə cha mi ə bikuu bibə bəŋ. 2 Bəne kiŋaaŋkə lə bələ fwɔ wibə, ə fɨhŋ nini fə ə bəne yee bə yɔ̄ɔ díe yiwaha ki Je kichɛɛŋ. 3 Díi ŋəŋge ŋə bieŋ lə fə ə yee bə́ mīi jə bieŋ bieeŋ bə cháh yi yo kaalənə yyɨŋ bə́ bwɛɛla. Bəne bəhŋ duŋ bbəŋ Chu mà bwɛɛla ŋgə bə́ ə kaani foo, ŋgə yo duŋ kwaa həmə i kè bə́.

4 Yee bə kə̂lə lə Chu mà kə biaa lə bənchinda bwɔɔ nnu bə́ mà fə yiwaha kə. I mà chiha bə́, bə́ gəŋ ə dɔhɔ ki ŋgə mə, i yii bə́ ə fíaŋ mə ə bibwɔɔ binduumə mə bbɨŋ bi dùŋ nəŋ fiii, dɔhɔ kkɨŋ bə́ lə yee bə́ dūŋ mə gəŋ bwii butuu bu nhlaah. 5 I mà kə biaa lə dəŋ mbiŋ nnu fwii bwɔɔ nnu i mà faŋ yo ŋgwiŋ mə bwɔ bwo laa mbiŋ bəne bbəŋ bə́ mà kə duŋ nə kinduŋh kkɨŋ Chu kìɛɛ kə. I mà biaalə kwaa ə duŋ Nuah nnu i màa i dōntə lə yee bəne dūŋh kinduŋh kintiiŋ ə Chu fwi, bə bəne bədi fumanyaaŋ. 6 I mà tɔŋna kitɨŋ ki Shɔdɔŋ bə ki Gɔmɔla bə bwii bi fi buku, i fə fɨhŋ yee fi dūŋ ye kinfɛhiŋ ki fieŋ ffɨŋ fi yá duŋ bə bəne bbəŋ bə́ dùŋ kə duŋ nə kinduŋh kkɨŋ Chu kìɛɛ kə. 7 Kwaalə, i fwoo Lɔt nnu i màa i dūŋh kinduŋh kintiiŋ, gbo gbà wu bə kinduŋh ki nyɛninə kkɨŋ bəne bəwaha mà duŋ ə ki mə. 8 Bieŋ bbɨŋ mbɛɛ ntiiŋ nu màa i ŋə̄ŋ bə bbɨŋ i màa i wō bwɔɔ nnu i mà duŋ ə bə́ mə mà fəə tɔŋ liih li wɛɛŋ nə̀ wu ŋgə joo ŋənhliŋ bə fwɔ wibə wiwaha. 9 Ye bieŋ bɨhŋ màa bi kāh lə nəni, kəə fi nyìi lə Baba kə̀lə bənfwoo bəne bbəŋ bə́ wò wu ə kwáŋ ŋə ŋgə mə, baa kələ dəŋ bənchi bəne bbəŋ bə́ dùhŋ kinduŋh kkɨŋ Chu kìɛɛ, gəŋ bwii butuu bu nhlaa. 10 Ŋgə nu lə duŋ gbɛntɛlɛ bə dɨŋ bəne bbəŋ bə́ lèki bəmbələ kwaa ə duŋ fieŋ ffɨŋ go ŋəbə fwì ŋə kìɛɛ ə duŋ ffɨŋ fi bìhi mbɛɛ. Ə baa duŋ bə́ bbəŋ bə́ jə̀ mbɛɛ nnu i hlàah bəne kwe.

Chu yá yi laa bəne bə keehnə bə yo kaalənə

Bəne bə keehnə bə yo kaalənə bəhŋ kənə kpɔ, bə́ wò gbo gbaaŋ, kə lɔɔ dəŋ bənto bəfiana bə buh bbəŋ bə́ kə̀nə muŋgeni muŋkuntaŋ. 11 Maa bənchinda bə Chu bbəŋ bə́ kə̀nə muŋga bə́ tà dəŋ kah bə́ mɔŋ nə bənto bəfiana bəhŋ ə Baba fwi kə. 12 Kwaalə bəne bəhŋ fə̀ bieŋ ə duŋ bbɨŋ ŋgɔŋ məbə kìɛɛ, ye nyáŋ yí nji fə̀ lə bieŋ kə hlee, yí duŋ kwaa lə bəne kwo nyieŋ bu nyieŋ nə. Bəne bəhŋ bwò bə́ tò bieŋ ŋkələ hləŋ. Chu yá yi laa bə́ ye nyáŋ yí nji yɨhŋ, 13 ə bikoonə bibə duŋ ŋgə nnu bə́ wò yo yu ŋgə nnu bə́ bwo yo bə wu. Bə́ ba bənhle lə bəndi baa ŋwi gbaaŋ ə bushi choo lə kintɨŋ bə bə́. Bə́ dùŋ yili ə bəŋ mə bə́ yìhi bəŋ. Bwɔɔ nnu bə dì bəə bə́, bə́ wò njənjə bənfihi bəŋ bə fwɔ wibə wimbee gbo we. 14 Díi ŋəbə dùŋ kwaa ŋə kiwaali, kə fiili bə yiwaha. Bə́ ba bənlɛɛnti bəne bbəŋ bə́ bìaŋ ə kimbemi kibə mə bəə bə́ fə̀ yiwaha. Díi ŋəŋge lɛɛla ə ŋgɔŋ məbə mə. Bə́ jəə kida! 15 Bə́ shee je ntiiŋ yee bə́ jāaŋka ə njaaŋka mə. Bə́ bəla wuh ŋə Balaŋ ŋwa Bɛwu, nnu i mà bemi yo bənfə fieŋ ffɨŋ fi dùŋ kə duŋ nə yəəŋ yu i mà leka kpo. 16 Hlɔmbwaa nyieemi wu ki fieŋ fiwaha fɨhŋ. Hlɔmbwaa nnu i dùŋ jə kə yɔɔ lə, yee i yɔ̄ɔ jə ye mbɛɛ ŋkee lə, i bāŋ fwɔ wi kiyuunfə wwuŋ mbɛɛ hlɨŋ Chu nu màa i fə̄.

17 Bəne bə keehnə bəhŋ duŋ ye chwaa bwɔɔ nni i dūŋ kə fwoo ŋgwiŋ, baa duŋ ye kiku kkɨŋ ki gbè ə bweenə fwee kàh ki tù. Chu bwɛɛla dɔhɔ kkɨŋ ki dùŋ nəni fiii, kili bə bə́. 18 Bə́ kə̀h kijə gbaaŋ, bə́ wè kiŋ'we kinya. Bə́ lɛ̀ɛnti bəne bbəŋ bə́ lə̀lə bə́ fù ə kintu ki bəne bbəŋ bə́ dùŋ kə kələ fieŋ fi yəəŋ. Bə́ lɛ̀ɛnti bə́ bə keehnə kkɨŋ ki dùŋ lə duŋ ə bə́ chu dɨŋ yee bə́ fə̄ bieŋ bbɨŋ gbo wifwinə kìɛɛ. 19 Bə́ jàa bə́ yɔ̀ɔ bə bəne lə bə́ kənə lə bənduŋ bənfwa bə fieŋ fidi kə, kwaalə ə duŋ bə́ kibɛɛ bbəŋ bə́ yɔ̀ɔ bə́ baa duŋ bənfwa bə bieŋ bbɨŋ bi bìhi go wi mbɛɛ. Bə́ dùŋ bənfwa yulahalə ə mbɛɛ nə gbo wiih bə fieŋ, kəə i duŋ nfwa fieŋ fie. 20 Yee bə kə̂lə lə ə bəne lələ lɔ bieŋ bbɨŋ bi bìhi bəne ə mbiŋ nu mə yu bə́ kəla Baba ya Jisho Kleto nnu i dùŋ yo Nchuu Fwoo, baa gəŋ lɛɛ chuu ə bieŋ bie mə, ə bi bini kənə bə́, ə bieŋ bie fwɔ ə bə́ go kah ye bi mà hlaalə duŋ fwii. 21 Ə bəne fə nəni, kəə fi həə fi nūaa lə bəne bie kə hlaa lə kələ je kinduŋh kintiiŋ kə, kahiŋ bəŋkələ bwo tukwaŋ ə ŋkɨnə wɛɛŋ go nnu bə́ nəə bə bə́. 22 Dɨŋ bəne bəmbini bie fə̀ fieŋ ffɨŋ ŋgaŋga yɔ̀ɔ fie fi duŋ kichɛɛŋ lə, “Bwɔɔ nnu bwi bwo i ŋaŋ bieŋ i baa gəŋ chu yee i dī.” Ji baa duŋ lə, “Bwɔɔ nnu bə́ wii jɔŋ i baa gəŋ chu dəŋ yee i bɨ̄nə ə diimi le mə.”