2 Pita 1

Kiŋwaati ki chá fie ki

Pita

Ə mi Shaamuŋ Pita, mbɛɛ nimi Jisho Kleto ndùŋ dəŋ mbɛɛ wi faŋnə. Mbīeŋ kiŋwaati kɨhŋ bə bəŋ bbəŋ bə tɨŋna bie jə kimbemi kishaŋ kkɨŋ ki dùŋ yəəŋ ye kiaa, fɨhŋ nini duŋ yu kinduŋh kintiiŋ ki Jisho Kleto nnu i dùŋ Chu i dùŋ dəŋ Nchuu Fwoo ya.

2 Chu nyii bəŋ tɔŋ liih linwaa bə kindunshiiŋ gbaaŋ, kah ə kiŋkələ bieŋ kkɨŋ bə kə̀lə Chu bə Jisho nnu i dùŋ Baba ya.

Kinduhŋ ki bəne bbəŋ Chu diila bə́ baa shaa

3 Muŋga mwii mmuŋ mu duŋ mwe mu Chu nəə be bieŋ binhliŋ bbɨŋ kkə kìɛɛ ə kinduŋh kɨhŋ mə maa bənduŋ kinduŋh kkɨŋ Chu kìɛɛ. Mu fəə nəni kah ə kiŋkələ bieŋ kkɨŋ kkə kə̀lə Chu nnu i chèe yo be lə kkə lɛɛ ə kiŋkuntaŋ mə bə ə kinjənjə kkɨŋ ki dùŋ kiih mə. 4 Ə je ni mə nni i nəə be bieŋ biŋkuntaŋ gbaaŋ bbɨŋ bi dùŋ bishaŋ bbɨŋ i mà kaachi. Bieŋ bɨhŋ duŋ bənfə lə yee bə lɔ̄ bieŋ biwaha bi yaŋ mbiŋ nu nte bbɨŋ gbo kìɛɛ bbɨŋ bi bìhi bəne. Nəni ə bə hlə yee bə dūŋ ə je nni Chu duŋ ə yi mə. 5 Ye fi duŋ lə nəni, bə ju kinwaa bən'yiinə fwɔ winwaa ə tɔŋ llɨŋ bə yiila le ə Kleto mə. Ə fwɔ winwaa mə, bə yiinə kiŋkələ bieŋ. 6 Ə kiŋkələ bieŋ go, bə yiinə go ŋə nfwoŋnə. Ə go ŋə nfwoŋnə bəŋ, bə yiinə tɔ́ŋ ŋəŋkwaanə. Ə tɔ́ŋ ŋəŋkwaanə bəŋ, bə yiinə kinduŋh kkɨŋ Chu kìɛɛ. 7 Ə kinduŋh kkɨŋ Chu kìɛɛ mə, yee mbɛɛ kə̂nə kiwawa bə maani. Ə kiwawa mə, bə yiinə kinleki. 8 N'yɔ̄ɔ nəni yulahalə, ə bə kənə wuhŋ fwɔ, bə gə̀ŋ bə wi fwi fwi, ə wi fə ə bə nakə baa lə yee bə dūŋ nəni nya kə, ləkə lə bə dùŋ ye bəne bbəŋ bə́ dùŋ ə bə́ nakə fəə fieŋ ye bəne bbəŋ bə́ kə̀lə bieŋ ki Baba ya Jisho Kleto kə. 9 Yee bə kə̂lə lə ə mbɛɛ nakə kənə dɨŋ wuhŋ fwɔ, kəə i baŋna díi ə bieŋ bi Chu mə, i baalə ŋəŋ ə bieŋ go je nyɛɛkə kə. I laama lə Chu mà wiila yíwaha yyɨŋ i màa i fə̄ ye fwii.

10 Bəŋgwoŋ, fi hlə yee fi dūŋ lə, yee bə jû gbaaŋ bənfə ə duŋ bieŋ bbɨŋ bi nyìi lə ndii nnu Chu mà dii yo bəŋ, bənshaa nnu Chu mà shaa yo bəŋ duŋ ə fieŋ nɛhiŋ fi kə. Ə yee bə fə̄ nəni, ə bə yá nakə baa lə gbe ə kimbemi kieeŋ mə kə dududu. 11 Nəni bə́ yá bwo wɛ bəŋ je nni i dùŋ nəni gbuuuŋ, ə bə lɛɛ ə muŋkɨŋ mu kə kaa mə mu Baba ya Jisho Kleto nnu i dùŋ yo Nchuu Fwoo ya.

12 Maa ye bə kəla lə bieŋ bɨhŋ, bə lèmi dəŋ kɨɨŋ ə kichɛɛŋ kkɨŋ bə woo kɨhŋ bəŋ, ŋkiɛɛ kwaa lə mbaa ŋŋoo bəŋ ki bi bwɔɔ mənhliŋ. 13 Nhle lə fi fie yəəŋ nəni lə n'yee ŋŋɛ̄hiŋ bəŋ ki bieŋ bɨhŋ ye ŋkaani lə ndùŋ fa fo bə lə yee bə hlē, 14 yulahalə ŋkələ lə ə she kwaa chɛɛ ə fiana she gbo wuŋŋ ye Baba ya Jisho Kleto fəə ŋkələ. 15 Nhlə n'yee njū ntakə lə bwɔɔ nnu ŋgəŋ, ə yee bə dūŋ bə hlè bieŋ bɨhŋ bwɔɔ mənhliŋ.

Díi ŋŋəŋ ŋə ŋə̀ŋ kiŋkuntaŋ ki Kleto

16 Yee bə kə̂lə lə bieŋ bbɨŋ kkə mà yɔɔ bɨhŋ bə bəŋ ki muŋga maa ki mbwo nnu Baba ya Jisho Kleto yá bwo, ə mà kə duŋ nə cháh yyɨŋ bəne mà jəə bwɔɔ bwɛɛ yyɨŋ kkə yɔ̀ɔ bəŋ kə. Kkə mà ŋəŋna ə kiŋkuntaŋ kiih go bə díi ŋiaa. 17 Ə mà duŋ bwɔɔ nnu Chu Tah mà nə wu kiŋkohi maa kiŋkuntaŋ, die fu ə wu nnu i dùŋ yo Kiŋkuntaŋ Kiŋaamə mə i yɔ̀ɔ lə, “Nu lə Ŋiaa, nnu i dùŋ tɔŋ lɨŋŋ. Ŋ'wò njənjə bə wu gbaaŋ.” 18 Be kibɛɛ kkə mà woo die ni ye i hlīli i bwō buh bwɔɔ nnu kkə mà duŋ yo bee Jisho ə kɔnɔ ki wɛɛŋ go. 19 Ye kkə mà wolə nəni, kkə hlə kaanə kələ kichɛɛŋ ki fieŋ ffɨŋ bəne bə hlɨŋ Chu mà yɔɔ ə kaani foo. Fi nwaa lə bə yii bufe ə fieŋ fie mə gbaaŋ, yulahalə fi duŋ ye mɔɔ kkɨŋ ki chàa ə jɨbə mə gəŋ bwii bwɔɔ nnu butuu lə wu, ə Jisho yee i chāa ə tɔ́ŋ ŋieeŋ mə ye fintoola fi hə mbumbwaa lə. 20 Fieŋ ffɨŋ fi ko kah bieŋ binhliŋ ə dɔhɔ kɨhŋ mə duŋ lə bə kənə bəŋkələ lə, hlɨŋ Chu ji hləŋ nni i dùŋ ə Kiŋwaati ki Chu mə^ª nni duŋ ə mbɛɛ hlɨŋ màa i nāchɛ ə bufe bwii mə kə. 21 Fi duŋ lə, hlɨŋ Chu ji hləŋ nni i màa i nō ə fieŋ fidi ffɨŋ mbɛɛ ŋkee kiɛɛ lə yee fi dūŋ. Bəne bə hlɨŋ màa bə́ yɔ̄ɔ ə duŋ Fiana Wɛɛŋ nnu màa i fə̄ bə́ hlə yee bə́ yɔ̄ɔ die nni i fù ə Chu kwáŋ.