2 Pita 3

Butuu bbuŋ Baba yá baa fiimə bwo

Bəmbweŋ bəŋŋ bə tɔ́ŋ, kiŋwaati ki fidiɛɛ kɨhŋ duŋ ki chá fie kkɨŋ mbieŋna bə bəŋ. Ə biŋwaati bɨhŋ mə binhliŋ mbieŋna bi lə bi jaa tɔ́ŋ ŋieeŋ, ŋoo bəŋ lə yee bə kə̂nə munhlenə munwaa. 2 Ŋkiɛɛ lə bə ŋoo bieŋ bbɨŋ bəne bə hlɨŋ Chu bə wɛɛŋ mà yɔɔlə bi yá bwo duŋ, bə ŋoo dəŋ bieŋ bbɨŋ bəŋ bəne bə faŋnə bə Jisho mà yɔɔ lə Baba nnu i duŋ yo Nchuu Fwoo mà yɔɔ lə yee bə fə̄. 3 Fieŋ fiŋkuntaŋ duŋ lə bə kələ lə ə yá yee ə dūŋ ə joo ŋə həŋgbɔŋ ŋie mə, ə bəne bə fenə yá ja bwo yee bə́ fē, bə́ fə̀ bieŋ biwaha bbɨŋ go ŋəbə kìɛɛ. 4 Bə́ yáa bə́ fē bə́ yɔ̀ɔ lə, “I mà kə kaa lə chi lə i yá baa fiimə bwo lə? I yo fəhəŋ fidiɛɛ lə? Maa ye bətah biaa mà kpe lə, bieŋ binhliŋ baa kwaa ye bi mà duŋ lə chɔɔ jə ye Chu mà fə mbiŋ.” 5 Bə́ yɔ̀ɔ nəni, bə́ nɨ̀hŋ kichɛɛŋ kkɨŋ bə́ mà kəla wɛɛŋ lə Chu mà yɔɔla kwaa die fwii fwii buuli yee li dūŋ. I yɔɔ shishɔ fu ə ŋgwiŋ mə, i mà fə shishɔ ə ŋgwiŋ go. 6 Ə dəŋ ŋgwiŋ mməŋ mə mà yii kəə shishɔ, mə laa mbiŋ nnu i màa i hlaa yo i dūŋ. 7 Ə dəŋ kwaa bə die ye nni i chiee buuli li fidiɛɛ bə shishɔ yee i kē bwii mu. I kè ə duŋ butuu bbuŋ mə lə hlaah bəne bbəŋ bə duŋ kə duŋ nə kinduŋh kkɨŋ Chu kìɛɛ, laa bə́.

8 Kwaalə Bəmbweŋ bəŋŋ bə tɔŋ, bə kə laamə fieŋ fimwi lə ə Baba mə, butuu bumwi duŋ yəəŋ ye bigoŋ nchuku lə, bigoŋ nchuku duŋ dəŋ yəəŋ ye butuu bumwi lə. 9 Baba kpalə gbo bənfə fieŋ ffɨŋ i mà kaachi ye bəne bədi hlè lə kə. I kwàa ə duŋ tɔŋ bə bəŋ yu i kìɛɛlə lə mbɛɛ ju la kə. I kìɛɛ lə bəne binhliŋ fii tɔ́ŋ ŋəbə. 10 Butuu bbuŋ Baba yá fiimə bwo yá duŋ dəŋ ye butuu bu ŋwuŋ buyi lə. Bumbini bwe buuli yá ja dimi gbaaŋ bu la ə nla mə, ə bwii tɔŋ bieŋ bbɨŋ bi dùŋ buh, ə shishɔ bə bieŋ binhliŋ bbɨŋ bi dùŋ mə fi buku.

11 Ye bwii yá fiilə bieŋ binhliŋ ə je ni mə, bə hlè lə duŋ ə yee bə dūŋ bəne biɛhɛŋ ə kinduŋh kieeŋ mə lə? Bə duŋ lə yee bə dūŋh kinduŋh kiwɛɛŋ ə duŋ bə nəə go ŋieeŋ bə Chu, 12 bə kè Butuu bu Chu buhŋ, bə jù bənfə lə bu kee bwo. Ə duŋ butuu bbuŋ bwii yá fii buuli li fi, ə bieŋ bbɨŋ bi dùŋ buh boŋ. 13 Kwaalə, kkə bie kkə kē buuli lifwɔ bə shishɔ yifwɔ yyɨŋ Chu mà kaachi, dɨŋ nu mbiŋ duŋ nnu i yáa i kə̄nə kwaa fwɔ wintiiŋ ə wu mə.

14 Nəni Bəmbweŋ bəŋŋ bə tɔŋ, ye bə kè lə bieŋ bɨhŋ nəni, yee bə jū ntakə lə bə kə yee bə dūŋ bə yili lidi kə ləkə gbenə hləŋ ə Chu fwi. Yee bə dûŋ ə kindunshiiŋ mə bə wu. 15 Bə ŋoo lə Baba kwàa tɔŋ nəni, i nə̀ ə duŋ bwɔɔ bə bəne lə bə fukwoo. Fieŋ fɨhŋ duŋ kwaa fi ŋgwoŋ ya Pwɔɔ nnu i dùŋ yo tɔŋ liaa mà bieŋ bə bəŋ bə bufe bbuŋ Chu mà nə wu. 16 Ə biŋwaati binhliŋ bbɨŋ i bìeŋ mə duŋ i yɔ̀ɔ kwaa ki bieŋ bɨhŋ. I bieŋna bieŋ bidi bi ta kah bəne bəŋkələ, nəni bənfili bə bəne bbəŋ bə́ dùŋ kə kələ dəŋ ye bə́ lèmi lə hlə kɔ kinuu ki bieŋ bie, ə duŋ dəŋ yəəŋ ye bə́ bwo lə bə́ kɔ dəŋ bi ə bidɔhɔ bidi mə ə Kiŋwaati ki Chu mə. Bə́ fə̀ nəni, bə́ dìi ə duŋ bəŋgə ə bə́ fí.

17 Bəmbwəŋ bəŋŋ bə tɔŋ, ye bə kəla lə bieŋ bɨhŋ nəni, yee bə jə̂ bwɔɔ ləkə bəne bbəŋ bə́ dùŋ kə chiee bəŋkɨnə bə Chu kə kpaa jə bəŋ bə fwɔ́ ŋəbə ŋəŋ'waha ə bə no ə dɔhɔ kkɨŋ bə lèmi kie kkɨŋ fieŋ duŋ kə nɛhiŋ bəŋ ə bə fiimə gbe ə ŋgbe mə. 18 Kwaalə, yee bə kô bu konə ə kinchɨnə ki Baba ya Jisho Kleto nnu i dùŋ yo Nchuu Fwoo nəə bə bəŋ, baa kələ wu gəŋ fwi fwi. Kiŋkohi yee ki dûŋ bə wu fidiɛɛ maa bwɔɔ mənhliŋ kə kaa. Yee fi Dûŋ lə.