Jɛŋ 4

Kinleki ki bieŋ bi mbiŋ yii yìhi mbɛɛ Chu

Fieŋ ffɨŋ fi jà fi bwo bə kpənənə maa nyɨmə ə bəŋ mə duŋ laha lə? Nhle lə ə ŋgɨŋ bieŋ bbɨŋ go ŋieeŋ kìɛɛ lə? 2 Bwɔɔ nnu bə kìɛɛ fieŋ ə bə nakə bənə fi kə, yee bə kīɛɛ lə bə jii mbɛɛ hlə bənə fi. Bə bwò bə tɨŋ díi ə fieŋ go, ə fi lə jɨnə, yee bə kpə̄nə, bə jù. Fieŋ ffɨŋ fi fə̀ bə kə bə̀nə bieŋ bɨhŋ duŋ yulahalə bə noŋnə bə Chu kə. 3 Ə bə lə noŋ dəŋ, ə bə nakə bənə kə, yulahalə bə noŋnə bə bihlenə binwaa kə. Bə nòŋ bieŋ ə duŋ kwaa bənfə bieŋ bbɨŋ go ŋieeŋ lèki mu. 4 Bə duŋ ba ye bəkwɛɛ ləkə bənəə bbəŋ bə́ shee biah ŋəbə yee bə́ fə̄ ə duŋ kiwaali. Bə kə kələ lə ə mbɛɛ lə kwo kinshiŋ bə mbiŋ, kəə i choo mbɛɛ nnu i dùŋ yo kə diee njənə bə Chu kə lə? Nəni, yee bə kə̂lə lə, maa nyəhə nnu i kìɛɛ lə i kwo kinshiŋ bə mbiŋ nu, kəə wu dəŋ choo mbɛɛ nnu i dùŋ yo kə diee njənə bə Chu. 5 Bə jaa ləhəŋ hlə yee bə hlē lə fieŋ ffɨŋ bə́ mà bieŋ ə Kiŋwaati ki Chu mə duŋ nya lə? Bə́ mà bieŋna lə, “Chu kə̀nə kinhle, i dè gbaaŋ bə fiana nnu i mà yii yo lə yee i dūŋ bə be.”^ª 6 Chu nyìi be tɔŋ linwaa gbaaŋ. Ə fieŋ ffɨŋ bə́ bieŋna ə Kiŋwaati ki Chu mə lə,

“Chu jə̀ bəne bbəŋ bə́ hlə̀ə kwe,

kwaalə i nə̀ kinchɨnə kiih bə bəne bbəŋ bə́ bwɔ̀kwe, i hlə̀mə bə́ bə tɔŋ linwaa.”

7 Nəni, bə nə go ŋieeŋ bə Chu, bə twaŋ wuh ə fiŋkwini go, fi lə lɔ ə bəŋ dɨŋ. 8 Ə bə bwo baha baha ə Chu go, ə i bwo dəŋ baha baha ə bəŋ go. Bəŋ bəne bəwaha, bə fwoo kwáŋ ə bieŋ biwaha mə, wii biwɛɛ bieeŋ, bəŋ bbəŋ bə lèmi bie tɔ́ŋ fwe bə Chu. 9 Yee bə dûŋ juu juu, bə dè ndəŋ mə shoo nəni wɔwɔwɔ. Bə tukwaŋ ə kishaa go, yee bə dê ə duŋ ndəŋ, bə tukwaŋ ə njənjə wonə go, yee bə chɨŋ bikuu bieeŋ kwe bu chɨŋnə. 10 Bə bwɔkwe ə Chu fwi, mə lə tuuli bəŋ hə buh.

Mbɛɛ kə yee i hlâah maani kə

11 Bəŋgwoŋ, mbɛɛ kə yee i yɔ̂ɔ díe yiwaha ki maani kə. Ə mbɛɛ lə yee i yɔ̂ɔ díe yiwaha ki maani ləkə hlaah maani, kəə i yɔ̀ɔ díe yiwaha ə duŋ ə ŋkɨnə Chu go, baa hlaah wu. Ə mbɛɛ hlaah ŋkɨnə Chu, kəə ə mbɛɛ nnu i baala chi ŋkɨnə yo kə. Mbini yo mbɛɛ chu duŋ mbɛɛ nnu i hlàah ŋkɨnə ə nhlaah mə.^ª 12 Mbɛɛ nnu i nə̀ ŋkɨnə baa kaalə dəŋ bənhlaa bə bəne duŋ kwaa mwi. Ə wu kwaa nnu i dùŋ ə i fwoo ləkə laa mbɛɛ. Ə wə nyəhə nnu wə hlàah mbɛɛ ju lə?

Bə kə yee bə nyîi gbo kə

13 Bə wələ wo, bəŋ bbəŋ bə bwò bie bə yɔ̀ɔ lə, “Daŋ ləkə mbwaa duŋ ə kkə gəŋ ə kibalaki kɨhŋ mə, ləkə ə kilii mə duŋ mə kigoŋ, di shi, bənə mbɨŋ.” 14 Bwɔɔ nnu bə yɔ̀ɔ nəni, bə yii kə̀lə fieŋ ffɨŋ fi ya fu duŋ mbwaa lə? Bə yii kə̀lə fieŋ ffɨŋ fi dùŋ kinduŋh kieeŋ lə? Kinduhŋ kieeŋ duŋ ye ŋgwii mməŋ bə́ ŋə̀ŋ ə mə go, bwɔɔ nnu mə ŋɔɔni chɛɛ mə ye la. 15 Fieŋ ffɨŋ bə duŋ lə yee bə yɔ̄ɔ duŋ lə, “Ə Baba lə bemi lə yee kkə dûhŋ, ə yee kkə fə̂ fɨhŋ ləkə filii.” 16 Kwaalə, bəŋ ŋkwo weŋ kaka ja yee bə hlə̄ə bu hləənə, bə tùu kɔŋ. Yee bə kə̂lə lə bəŋ'we nəni lə yiwaha. 17 Nəni, ə mbɛɛ lə kələ fieŋ finwaa ffɨŋ i kənə bənfə, nakə fəə fi, kəə i fəə yiwaha.