Jɛŋ 5

Yee bəne bə kpo jə̂ bwɔɔ

Bəne bə kpo, bə wələ wo fieŋ ffɨŋ n'yu n'yɔ̄ɔ. Yee bə dê, bə wìli yu ŋgə nnu i yu bwō yo ə bəŋ bəŋ. 2 Kpo weeŋ fwɔɔ, jooni diee bindu bieeŋ. 3 Bieŋ bieeŋ bi kpo daa kaa. Nda nu yá nyii fwɔ weeŋ, ə wi di dəŋ go ŋieeŋ ye bwii lə. Ŋəhŋ lə joo ŋə həŋgbɔŋ ŋie ba, ə duŋ bə buhuŋ kwaa ə duŋ kpo. 4 Bə kee ŋəŋ, bə fiha bəne bbəŋ bə́ nɨ̀ŋ biwɛŋ bieeŋ. Bə́ buhaŋ kaa bieŋ bieeŋ, bə nɨ̀hŋ kə hluŋ nə bə́, yee bə́ dē. Bə́ dee Baba Chu nnu i kə̀nə yo Muŋgeni Munhliŋ woo ndəŋ məbə. 5 Bə duŋna yaŋ kwe di go ŋieeŋ ye bə lèki lə. Bə diee chiŋ nyɨŋ ye bənaŋ bətuunə bbəŋ bə́ kè butuu bbuŋ bə́ yá nyieŋ bə́. 6 Bə hlɔɔla wuh ə bəne dɨŋ, bə́ lɛ̀ɛ ə ŋgə mə. Bə jiila bəne bbəŋ bə́ kə duŋ nə bə gbenə kə, ə duŋ bəne bbəŋ duŋ ə bə nakə twaŋ nə wuh bə bəŋ kə.

Yee bəne bə Chu kwâa tɔ́ŋ

7 Bəŋgwoŋ, fi duŋ lə, yee bə kwâa tɔ́ŋ gəŋ bwii bwɔɔ nnu Baba yá fiimə bwo. Bə kee ŋəŋ ye bəne bbəŋ bə́ ba bənɨŋ biwɛŋ bwò bə́ kwaa tɔ́ŋ gəŋ bwii bwɔɔ nnu bə́ yá gba biləə binwaa ə biwɛŋ bibə mə. Bə́ bwò bə́ ke jaŋ chɔɔ, bə́ hlə dɔ bieŋ, hlə ke bi ta. 8 Yee bə kwâa kwaa tɔ́ŋ yəəŋ nəni. Yee bə lêmi ba ntakə, yulahalə bwɔɔ nnu Baba yáa i bwō yo chəkə chəkə.

9 Bəŋgwoŋ, mbɛɛ kə yee i ŋwûunə bə maani kə. Mbɛɛ nnu i ŋwùunə bə maani yá yi kənə nhlaa. Mbɛɛ nnu i yáa i kāalə bənhlaa i yo ə fwíih go. 10 Bəŋgwoŋ, bə jə kinyii ə bəne bə hlɨŋ Chu go, bbəŋ bə́ ba bən'yɔɔ bə bəne ə yii li Baba bəŋ. Bə́ màa bə́ wō ŋgə bə́ kwàa kwaa tɔ́ŋ. 11 Kkə ŋəŋna lə bəne binhliŋ bbəŋ bə́ mà kwaa tɔ́ŋ gəŋ kpee həŋgbɔŋ həŋgbɔŋ, Baba mà hləma bə́. Bə woo ki Job ye i mà kwaa tɔŋ gəŋ kpee həŋgbɔŋ həŋgbɔŋ, baa wo ye Baba mà fii ŋgə wi, i chu kinjənjə. Baba mà fə nəni yulahalə i kwò hlɨŋ bə bəne, i kə̀nə dəŋ tɔŋ lində bə bə́.

12 Bəŋgwoŋ, fieŋ ffɨŋ fi kàh bieŋ binhliŋ duŋ lə, ə mbɛɛ yɔɔ fieŋ i kə kaŋ nə kə. Ləkə i kàŋ kwili li Chu, ləkə shishɔ, ləkə ə fi laha. Ə mbɛɛ bemi lə, “Eee,” fi ba lə. Ə mə nɨhŋ lə, “Ye,” fi ba lə. Ə yee bə fə̄ nəni, ə bə nakə baa lə gbe nhlaa kə.

Chu cheenə bə kimbemi yii chɨ̀nə

13 Ə mbɛɛ ju ə bəŋ mə yee i wô ŋgə, yee i chêe Chu. Ə mbɛɛ yee i wō njənjə, yee i shêeni yii, i dòhi Chu. 14 Ə mbɛɛ ju ə bəŋ mə yee i gɔ̄ŋ, i dii bəche kimbumə ki bəne bə kimbemi, bə́ bwo chee Chu ə wu bəŋ, lɔɔ wu mɛŋ ə yii li Baba bəŋ, 15 ə Chu cheenə nnu bə́ chèe yo lə bə́ yiila tɔŋ ə Baba mə, ə i chɨnə wu ə i ŋwunə, ə Chu noo wu fa. Ə duŋ lə mbɛɛ yo fəə yíwaha, ə Chu laamə nə yíwaha yiih. 16 Nəni, fi yee fi dûŋ lə, ə mbɛɛ fə fieŋ fiwaha, i yɔɔ bə maani, yee mbɛɛ chêe Chu bə ju, fo Chu lə ŋwuhuŋ bəŋ. Chu cheenə mbɛɛ ntiiŋ kənə muŋga gbaaŋ, ki fə̀ bieŋ kiŋaaŋkə.

17 Bə jə kinyii ə Elaja go. I mà duŋ mbɛɛ ŋkee yəəŋ ye be. I bwo chee Chu ntakə lə jaŋ kə bwoo ə shishɔ bəŋ kə. Jaŋ ba buh nəni bigoŋ bitɔh bə kiŋkə. 18 I baa chee Chu, Chu shoo jaŋ, bieŋ fiimə chuu yee bi kō ə shishɔ bəŋ.

19 Bəŋgwoŋ, ə mbɛɛ ju ə bəŋ mə lə no she je kichɛɛŋ yee i jāaŋka, ə mbɛɛ ju jə chu bə wu dɨŋ, 20 mbɛɛ nnu i chu yo bə wu dɨŋ yee i kə̂lə lə, ə mbɛɛ lə fii chuu mbɛɛ nnu i fə̀ yiwaha, mə she jé yiih yinya, kəə i fwoola fiana mbɛɛ yo ə kwáŋ ŋə kpe mə, Chu dəŋ laama yíwaha yiih yyɨŋ yí chiŋna ə nchiŋ mə.