Jɛŋ 3

Mbɛɛ jə bwɔɔ bə liniini liih

Bəŋgwoŋ, bəŋ kiŋaaŋkə kə yee bə kîɛɛ lə yee bə dûŋ bəne bə laanənə kə, yu bə kələ lə bəne bə laanənə, bə́ yá jə bwɔɔ hlaah bə́ kah bədi bie. 2 Fi duŋ chɛɛŋ lə be bənhliŋ bwò kkə gbè ə jé mə kiŋaaŋkə. Kwaalə, ə mbɛɛ lə duŋ həmə nnu i dùŋ kə gbee ə biyɔɔnə mə, kəə ə mbɛɛ nnu i wuna gəŋ kpee həŋgbɔŋ, baa kələ dəŋ bənfwoŋ gbo wiih winhliŋ. 3 Kkə bwò kkə jə fíaŋ yii ə bikwuŋ jə́, bənfə lə yee bi wō be. Kkə fìi bi go ŋənhliŋ, bi gə̀ŋ dɔhɔ kkɨŋ kkə kìɛɛ kie. 4 Bə ŋəŋ dəŋ ye kikpɔŋkɔ ki njɔ duŋ lə. Ki duŋ kiŋkuntaŋ gbaaŋ, fwee kintaabə bwo ki yə̀ə ki. Kwaalə, fieŋ ffɨŋ mbɛɛ nnu i nua yo kikpɔŋkɔ ki njɔ kie mu lə yee ki gə̄ŋ dɔhɔ kkɨŋ i lèki duŋ kwaa finchiiŋ. 5 Ə li dəŋ yəəŋ ye liniini dùŋ. Li dùŋ kwaa fieŋ finchiiŋ ə mbɛɛ go. Kwaalə li bwò li yɔɔ bieŋ bi hləənə gbaaŋ.

Bə kə kələ lə fibwiinə finchiiŋ duŋ ə fi fii chi kɔbɔ kinhliŋ kwe kə lə? 6 Liniini duŋ dəŋ yəəŋ ye bwii lə. Liniini dùŋ kəllə ki mbɛɛ, ə bikəllə binhliŋ mə bbɨŋ bieŋ biwaha binhliŋ bi yaŋ mbiŋ nte buma ə li go bi hlàamə bi bìhi gbo wi mbɛɛ winhliŋ. Liniini ba bəŋgba bwii wi bìhi kinduŋh ki mbɛɛ kinhliŋ. Bwii wuhŋ duŋ wwuŋ liniini jə ə duŋ ə kibuku mə. 7 Bəne duŋ ə bə́ chii bichəŋ bi nyáŋ yinhliŋ ə yí wo bə́. Chii nyáŋ yí nji, bə munyini maa nyáŋ yyɨŋ yí kpà te kwe bə yí nɔ mə. 8 Kwaalə, mbɛɛ hləŋ nnu duŋ ə i fwoŋ liniini. Liniini ŋɔɔni lə bən'yɔɔ yiwaha, li yiila bə bieŋ biwaha, li duŋ ə li jii mbɛɛ ye cha lə. 9 Ə liniini lɨhŋ, llɨŋ kkə bwò kkə dòhi Baba Tah ya mu, ə duŋ dəŋ li llɨŋ kkə chɨ̀ŋ bəne mu, bəne bəhŋ duŋ nfə Chu, bə́ bù wu. 10 Kijə kɨhŋ mwe hlə yee ki fwōo kiŋkohi, ki fwòo dəŋ kida. Bəŋgwoŋ, fi kə kənə bənduŋ nəni kə. 11 Duŋ ə ŋgwiŋ mənchaa bə məmbiimə yee mə fū ə bwɔɔ mwe mə lə? 12 Bəŋgwoŋ, duŋ ə fimbi chɔŋ ə wumə go lə? Lii duŋ ə tɔ chɔŋ ə fimbi go lə? Ə duŋ dəŋ ə bwɔɔ ki ŋgwiŋ məŋ'waha nə ŋgwiŋ mənwaa kə.

Bufe bbuŋ bu fù ə buh

13 Ə nyəhə ə bəŋ mə nnu i duŋ bə bufe bbuŋ bu duŋ bu Chu i kələ bieŋ lə? Mbɛɛ yo nyii gbo wiih ə fwɔ wiih winwaa mə, bə nimi liih bi li yəəŋ llɨŋ i nɨ̀ŋ kə woo gbo kə, ye ŋwuŋ bufe bwò lə i dùŋ. 14 Kwaalə, ə mbɛɛ ŋkee luhuŋ mɛɛ, maa díi ŋə ŋge ə tɔŋ liih go, i kə yee i wê lə i dùŋ ŋwuŋ bufe, ə mə fə nəni, kəə i yu nɨ̄hŋ kichɛɛŋ. 15 Dɨŋ buhŋ bufe bwòlə ə buh kə. Ə bu yaŋ kwe, ə duŋ bu mbɛɛ ŋkee, ə duŋ dəŋ bu fiŋkwini. 16 Yee bə kə̂lə lə maa fəhəŋ nnu bəne kənə mɛɛ ki luhunə, maa díi ŋə ŋge ə tɔŋ go, bieŋ bwò bi hlàamə kwaa ə hlaamə mə, yee bə́ fə̂ dəŋ bieŋ chili chili biwaha binhliŋ. 17 Kwaalə, bufe bbuŋ bu bwò buh kənə bənhlaa duŋ wɛɛŋ, bu lèki kində go, bu dùŋ dəŋ shiiiŋ, bu nə̀ bituŋ bə mbɛɛ ju, bu dùŋ bə hlɨŋ yi kwonə maa fwɔ winwaa, bu kə nyii lə kichili kə, bu kə duŋ nə bə díe fie kə. 18 Nəni bəne bbəŋ bə́ chi kindunshiiŋ, bə́ dɔ̀ ŋgɔ nnu i dùŋ kindunshiiŋ, bə́ bùhuŋ ə duŋ biləə bbɨŋ bi dùŋ fwɔ wintiiŋ.