Jɛŋ 2

Bə kə yee bə nyîi kichili ə bəne mə kə

Bəŋgwoŋ, ye bə yiilə tɔŋ ə Baba ya Jisho Kleto mə nnu i dùŋ yo Baba kiŋkuntaŋ, bə kə yee bə nyîi kichili kə. 2 N'yɔ̄ɔ nəni yulahalə duŋ ə bəne bəfwe ja bwo lɛɛ ə chəŋ yeŋ kimbumə mə, ju yo leela bindu binwaa, lee munfiaŋ mmuŋ bə́ mà fəə bə chwaa ki ge, ju yo mbɛɛ duŋ wu fiih mbɛɛ njɨnənə, i leela bindu binhlaki. 3 Ə bə ja yɔɔ bə mbɛɛ njɨnənə yo lə, “Lemi filii,” ləkə lə, “Bwo shii fəŋ həkwe ə shishɔ,” hlə yii bufe ə duŋ ə mbɛɛ nnu i kwaala yo gbo mə, yɔɔ bə wu lə, “Bwo shii fəŋ ŋwuŋ ŋkuntaŋ.” 4 Ə bə fə nəni, kəə bə kə choo bəne bbəŋ bə́ kaalə bənhlaa bə tɔ́ŋ ŋənyi lə? Ə fɨhŋ nini nakə duŋ nə lə bə bie bə nyīi kichili ə bəŋ mə lə?

5 Bəŋgwoŋ bəŋŋ bbəŋ bə́ dùŋ tɔŋ liŋŋ, bə wələ wo, ə kə duŋ nə bəne bənjɨnənə bə yaŋ kwe bbəŋ Chu bwaa bə́ lə yee bə́ dūŋ bəne bə kimbemi kiŋkuntaŋ kibə kə lə? Ə kə duŋ nə dəŋ bə́ bbəŋ Chu lə nə dɔhɔ ə muŋkɨŋ mwii mmuŋ i mà kaachi mbɛɛ mənhliŋ nnu i lèki wu lə? 6 Kwaalə, bə ja chuu ŋkwo weŋ yee bə nə̄ giaali bə mbɛɛ njɨnənə ə je ni mə, bə ŋə̀ŋ ə duŋ mbɛɛ kpo. Bəne bbəŋ bə́ biŋna shii ə bəŋ bəŋ bə́ kpà bə́ gə̀ŋ bə bəŋ ə chə́ŋ yí bənhlaa mə duŋ bə nyəhə lə? Ə bəne bə kpo bəhŋ kə lə? 7 Ə kə duŋ nə dəŋ bə́ bbəŋ bə́ yɔ̀ɔ náami ŋəŋ'waha ki yii li kimbwɔkwe llɨŋ bə́ dò le ə bəŋ go kə lə?

8 Yee bə chî ba ŋkɨnə muŋkɨŋ mu Chu nnu i duŋ yo ə Kiŋwaati kiih mə. Ŋkɨnə nu duŋ lə,

“Yee wə lêki mbɛɛ nnu i dùhŋ ə wə tɨŋ, ye wə lêki lə gbo wo.”

Ə yee bə fə̂ nəni, kəə bə bie bə fə̄ yəəŋ. 9 Kwaalə, ə yee bə nyîi kichili chili, kəə ə yiwaha yyɨŋ bə fə̀, bə bwuŋna ŋkɨnə nnu mə kwo bəŋ. 10 Yee bə kə̂lə lə, ə mbɛɛ yee i chī bəŋkɨnə bə Chu bənhliŋ, ə mə ya bwo bwuŋ mwi, kəə i bwuŋna bə́ bənhliŋ. 11 Yee fi dûŋ lə, yulahalə Chu nnu i mà yɔɔ yo lə,

“Nyimi kpɛ ləkə kpɛɛ mbɛɛ kə nɔŋnə kinɔŋ bə ju kə.”

Ə kwaa dəŋ wu nnu i mà yɔɔ lə,

“Mbɛɛ kə jii lə mbɛɛ kə.”

Ə duŋ lə mbɛɛ bələ lə kpɛɛ mbɛɛ ləkə nyimi mbɛɛ, kwaalə ə mə jii mbɛɛ, kəə mə bwuŋna dəŋ ŋkɨnə Chu. 12 Nəni, yee bə yɔ̂ɔ bə fə̀ dəŋ ə duŋ bieŋ ye bəne bbəŋ Chu yáa i hlāah bə́ bələ ŋkɨnə nnu i fwòo bəne ə munfwa mə. 13 Yee bə kə̂lə lə bwɔɔ nnu Chu yáa i hlāah, i yá kwoo hlɨŋ bə mbɛɛ nnu i mà duŋ kə kwoo hlɨŋ bə mbɛɛ ju kə. Kwaalə, mbɛɛ nnu i kwò hlɨŋ ə wu nnu i yá fukwoo ə nhlaa wi mə.

Fieŋ ffɨŋ fi nyìi lə mbɛɛ yiila tɔŋ ə Chu mə lə fwɔ wiih wintiiŋ

14 Bəŋgwoŋ, ə mbɛɛ lə ja yee i yɔ̄ɔ lə i yiila tɔŋ ə Chu mə, ə duŋ fwɔ wiih duŋ kə nyìi lə lə kə, ə fimbini fie chɨnə wu bə laha lə? Duŋ ə tɔŋ llɨŋ i yii le chɨnə wu lə? 15 Bə jə lə, ə mwaa nyo ləkə kpɛ lə jɨnə bindu bə bieŋ bidinə joo ŋənhliŋ, 16 ə mə bwo ə wə go, wə yɔɔ bə wu lə, “Chu chɨnə wə, wə kənə bindu bə bidinə.” Ə wə yɔɔ kwaa nəni, nakə nəə wu bieŋ bbɨŋ i kìɛɛ bie, ə fie chɨnə wu bə laha lə? 17 Bə kə ŋəŋ nə lə, ə mbɛɛ yee i yɔ̄ɔ lə i yiila tɔŋ ə Chu mə, fwɔ wiih duŋ kə nyiee lə lə kə, kəə tɔŋ llɨŋ i yii le ə Chu mə nakə yee i fə̄ nimi linwaa kə, kpee lə?

18 Mbɛɛ ju bwo i ja yɔɔ lə, “Wə yiila tɔŋ ə Chu mə, nduŋ bə nimi.” Nhlə n'yee n'yɔ̄ɔ kwo ŋkwəŋ lə, nyii mi tɔŋ llɨŋ wə yii le ə Chu mə nimi hləŋ, nnyii wə tɔŋ lɨŋŋ n'yiila le ə Chu mə ə duŋ ə nimi lɨŋŋ go. 19 Ə mbɛɛ lə bemi lə Chu duŋ mwi, kəə ə yəəŋ. Kwaalə, maa muŋkwini yii bèmi dəŋ nəni mu lɔ̀, mu nə̀nə. 20 Mbini yo mbɛɛ duŋ nfili. I kiɛɛ lə nnyii wu lə, ə mbɛɛ yii tɔŋ ə Chu mə fwɔ winwaa hləŋ, kəə ə nya lə? 21 Nhle lə fieŋ ffɨŋ fi mà fə Chu ŋəŋ lə tah ya Ablahaŋ mà wuna mbɛɛ wi mà duŋ yu nimi liih linwaa lə? I mà jəə ŋiaani Ayjik, nɔhiŋ ə taŋ li ntofi bəŋ bənnə ntofi mu bə Chu. 22 Bə kə ŋəŋ nə lə, tɔŋ llɨŋ i mà yii le ə Chu mə bə nimi liih linwaa màa li jāa gbu mwe kələ? Nimi liih mà nyiila lə biwɛɛ bbɨŋ i mà yii bie ə Chu mə mà duŋ baaa. 23 Fi hlə wunə yəəŋ ye bə́ mà bieŋ lə ə Kiŋwaati ki Chu mə lə,

“Ablahaŋ mà yiila tɔŋ ə Chu mə,

yu nəni, Chu ŋəŋ lə i duŋ mbɛɛ ntiiŋ.”

Bə́ hlə yee bə́ chēe wu lə dɔɔ Chu. 24 Bə ŋə̀ŋ nə dəŋ lə, fieŋ ffɨŋ fi bwò fi fə̀ Chu ŋə̀ŋ lə mbɛɛ wuna bənduŋ mbɛɛ wi, lə nimi liih lintiiŋ, ə kə duŋ nə kwaa tɔŋ llɨŋ i yiila le ə Chu mə kə lə?

25 Ə dəŋ yəəŋ ye fi Lahab mà duŋ, nnu i mà duŋ yo kpɛ kiwaali. Fieŋ ffɨŋ fi mà fə Chu ŋəŋ lə i wuna mbɛɛ wi mà duŋ nimi liih lintiiŋ. I mà tɨŋna jə bəne bəchiininə bə Ishlael ə wu chəŋ, hlə nyii bə́ je ji chili nni bə́ lə wɛɛnə kwələ ə yi mə. 26 Fi hlə yee fi dūŋ dəŋ lə, ye fiana bwòlə i she gbo wi chu fieŋ fiŋkpi, ə dəŋ yəəŋ ye mbɛɛ yiilə tɔŋ ə Chu mə nakə yee i fə̄ nimi linwaa, kəə tɔŋ llɨŋ i yii le lə liŋkpi.