Jɛŋ 1

Kiŋwaati ki

Jɛŋ

Kiŋwaati kɨhŋ bieŋ mi Jɛŋ, nduŋ ŋwuŋ nimi Chu, maa bə Baba Jisho Kleto. Mbīeŋ bə bichəŋ bi bəne bə Chu bi yuufi ə nchɔ bifwe bbɨŋ bi hlaama ə kitɨŋ kinhliŋ mə. Ncheela bəŋ.^ª

Bən'yii tɔŋ ə Chu mə maa bənduŋ bəne bəŋkələ bieŋ

2 Bəŋgwoŋ, yee bə jə̂ lə ə fieŋ finwaa bwɔɔ nnu bimɔŋnə chili chili bwò ə bəŋ go. 3 N'yɔ̄ɔ nəni yulahalə bə kələ lə ye bə kàh'lə ə bimɔŋnə mə bə yii tɔŋ ə kimbemi kieeŋ mə lə fə ə bə kələ ye duŋ ə yee bə kwāa tɔ́ŋ kinwaa. 4 Yee bə kwâa kwaa tɔŋ gəŋ kpee həŋgbɔŋ, fo bə lə yee bə dūŋ bəne bbəŋ bə́ koo wunə, kə jɨnə fieŋ kə.

5 Ə mbɛɛ ju ə bəŋ mə lə jɨnə bufe bbuŋ bu bwo ə Chu kwáŋ, i noŋ bə Chu, Chu lə nə wu. Chu bwò yee i nə̄ mbɛɛ mənhliŋ bə tɔŋ mwe, ŋkpənə hləŋ bə mbɛɛ. 6 Kwaalə, bwɔɔ nnu mbɛɛ bii, yee i bîi ə kimbemi mə bə Chu, i kə naamə kə. Yee bə kə̂lə lə mbɛɛ nnu i nàamə duŋ ye nɔ nnu fwee bwò ki nɛ̀hiŋ wu, i nɔ̀ɔŋkɔ bələ dɔhɔ kkɨŋ ki gə̀ŋ kie. 7 Mbini yo mbɛɛ kə yee i hlê lə ə mə lə noŋ fieŋ ə Baba nə wu. 8 Mbini yo mbɛɛ kə̀nə tɔŋ fwe, i fə̀ i yàka ə bieŋ mə binhliŋ.

Bəne bənjɨnənə bə bə kpo

9 Mbɛɛ kimbemi njɨnənə yee i wô njənjə lə Chu tuula wu buh, 10 mbɛɛ kpo yee i wô njənjə lə Chu hlila wu kwe, yulahalə i yá yi gəŋ she kpo wiih we ye binchɔŋ bwo lə bi tɔ̀ ə biyaa go bi bu dɨlə. 11 Ye kitaŋ bɛ̀ɛlə ki tɔ̀ŋ biyaa, biyaa bie kpe, binchɔŋ bi mu bie dɨlə, kinwaa ki bi ka, ə lə yəəŋ ye mbɛɛ kpo yá kah li i kaani i kòŋ kpo.

Bimɔŋnə bə bieŋ bbɨŋ bi tùulə bəne

12 Kintɨŋ kiŋkuntaŋ dùŋ ki mbɛɛ nnu i kwàa tɔŋ bwɔɔ nnu bimɔŋnə bwò ə wu go, yulahalə bwɔɔ nnu mə lə lemi ntakə, ə i yá kənə liwunə lifo ə duŋ kinduŋh ki kə kaa, kkɨŋ Chu mà kaachi mbɛɛ mənhliŋ nnu i lèki wu bə ki. 13 Mbɛɛ kə yɔɔlə lə bwɔɔ nnu fieŋ fidi mɔŋ wu lə i fə yiwaha, lə ə Chu nnu i mɔ̀ŋ wu kə, yulahalə duŋ ə fieŋ fidi mɔŋ Chu lə i fə fieŋ fiwaha kə. Wu kibɛɛ dəŋ mɔŋnə wu fiih mbɛɛ kə, ə fieŋ fiwaha go kə. 14 Bimɔŋnə bɨhŋ bwò ə mbɛɛ go nəni, ə duŋ yu yiwaha yyɨŋ i kə̀nə kidodo ə bi go, bwɔɔ nnu bi lɛɛnti bwo bə wu baha baha bi shaŋ kənə wu, 15 bwɔɔ nnu kidodo bwo fwàa te, ki bwèe yiwaha, bwɔɔ nnu yiwaha ye kò bwo wunə, yi bwò bə kpe.

16 Bəŋgwoŋ, bbəŋ bə́ dùŋ tɔŋ lɨŋŋ, bə kə yee bə fîhi go ŋieeŋ kə. 17 Bieŋ binhliŋ bbɨŋ bi dùŋ binwaa, bə nnə́ ŋənhliŋ ŋŋəŋ ŋə nwaa gəŋ kpee həŋgbɔŋ bwò buh ə Chu Tah ya nnu i nə̀ yo kinchaa. I gaanə lə ye nchinchii bwòlə i gàanə bidɔhɔ kə. 18 Ə wu nnu i mà shaa be, nə be die nni i dùŋ kichɛɛŋ, nə be kinduŋh kifwɔ, fo kkə lə yee kkə dūŋ fieŋ fi fwii ffɨŋ i mà shaa lə ə fiih ə bieŋ binhliŋ mə bbɨŋ i mà fəə.

Bəŋ'wo die Chu, fə ye i yɔ̀ɔlə

19 Bəŋgwoŋ bbəŋ bə́ dùŋ tɔŋ lɨŋŋ, yee bə kə̂lə lə mbɛɛ mənhliŋ yee i dûŋ chəkə bəŋ'wələ bieŋ, i kə duŋ nə chəkə bən'yɔɔ jə kə, yee i dûŋ wɛɛɛ bənfwoo lo, 20 yulahalə mbɛɛ nnu i fwòo lo duŋ ə i fə fieŋ fi kiyəyəŋ ffɨŋ Chu kìɛɛ kə. 21 Fi duŋ lə, bə she fwɔ́ ŋə nyɛninə ŋəntaabə maa fwɔ wiwaha, yee bə bwɔ̂kwe, bə tɨ̀ŋ jə die Chu nni bə́ dɔɔ ə tɔ́ŋ ŋieeŋ mə. Die ni duŋ ə i fwoo bəfiana bieeŋ.

22 Bə kə yee bə fîhi go ŋieeŋ lə yee bə wō kwaa die Chu bu wonə kə. Yee bə fə̂ ye i yɔ̀ɔ lə. 23 Mbɛɛ nnu i wò kwaa die Chu bu wonə i kə fəə ye i yɔ̀ɔ lə kə, i dùŋ ye mbɛɛ nnu i bwò i kèe bushi bwii ə miajɔ mə, 24 ye i keelə nəni, i fii kinhlaŋ kiih cha mi laamə nə ye bushi bwii hə duŋ lə. 25 Kwaalə, mbɛɛ nnu i kèe ə ŋkɨnə ntiiŋ mə, i fwòo bəne binhliŋ ə munfwa mə, i lèmi ə wu bəŋ bwɔɔ mənhliŋ, i kə laamə fieŋ ffɨŋ i wò ye i yɔ̀ɔ, i fə̀ ye i yɔ̀ɔ lə, i dùŋ nnu Chu yá lɛɛ kindunshiiŋ ə fieŋ finhliŋ bəŋ ffɨŋ i fə̀.

26 Ə mbɛɛ lə jə gbo wiih lə i dùŋ mbɛɛ nnu i bwɔ̀kwe, nakə lɛhiŋ liniini liih, ə yee fi dūŋ lə i fìhi ə duŋ gbo wiih, kəə i chee gbo wiih lə i bwɔ̀kwe bə Chu ə duŋ nya. 27 Kimbwɔkwe kkɨŋ Chu Tah ya ŋə̀ŋ lə ki wuna ki duŋ wɛɛŋ ə wu fwi, duŋ ki mbɛɛ nnu i fwòŋ bwɔni bə bəŋkwu maa bə bəkwɛɛ bə bəŋkwu ə bəŋgə bəbə mə. I lù dəŋ kwoo kiih ə bieŋ bi yaŋ mbiŋ nu mə lə bi kə yihi wu kə.