2 Timɔti 3

Bieŋ biŋwi gbo yáa bi dūŋ butuu bu həŋgbɔŋ

Yee wə kə̂lə lə, bwɔɔ nnu ə yáa ə dūŋ butuu bu həŋgbɔŋ, ə bieŋ bintaabə yee bi kāh gbaaŋ. 2 Bəne yáa bə lēki kwaa ə duŋ go ŋəbə, bə́ lèki kpo, bə́ bìhiŋ gbo, bə́ nyìi gbo, bə́ yɔ̀ɔ die yiwaha ə bəne bədi go. Bə́ chu kə baa lə wo bə bəmahni bəbə maa bə bətili bəbə, kə chu baa nə̀ kimbaafɛɛ bə fieŋ, kə kə̀nə dəŋ fwɔ winchaa kə. 3 Bə́ kə kə̀nə hlɨŋ yi kwonə bə bəne kə. Bə́ kə làamə nə dəŋ yíwaha yí bəne kə. Bə́ bìhi yíi ŋə bəne, bə́ kə tɨ̀ŋ nə ŋkɛ bə go ŋəbə kə. Bə́ kə̀nə fwɔ́ ŋəŋwi gbo, kə lèki fieŋ finwaa kə. 4 Bə́ chùŋ nchuŋ ə bəne go, bə́ dùŋ woo woo, ə duŋ bə́ yiila bə kinyii gbo. Bə́ lèki kwaa ə duŋ bəndi go ŋəbə kah bənleki Chu. 5 Bə́ yáa bə́ nyīi lə bə́ lèmi ə fieŋ fi Chu bəŋ, kwaalə bə́ baa bə́ nɨ̀hŋ muŋga mu fieŋ fi Chu fie. Lɔ dɨŋ bəne bəmbini bie bu lɔnə. 6 Bəne bəhŋ, bədi jàa bə́ lɛ̀ɛ ə chə́ŋ yí bəne mə, bə́ kɨ̀ŋ bə́ jə̀ bəkwɛɛ bəmbiaŋ bbəŋ yíwaha kəəla bə́, bə́ jɨ̀ɨŋkə bə́ bə̀lə kwaa ə duŋ hlɔɔ bieŋ chili chili. 7 Bəhŋ bəkwɛɛ duŋ bə́ shì ba kwaa bə́ wə̀lə binlaanə bwɔɔ mənhliŋ, kwaalə bə́ kə woo fieŋ fi kichɛɛŋ kə. 8 Ye Jani bə Jamble mà noo lə Mushe, ə dəŋ yəəŋ ye bəne bəhŋ noo kichɛɛŋ ki Chu. Ə bəne bbəŋ bufe bubə mà nəŋna, tɔ́ŋ ŋəbə ŋŋəŋ bə́ yɔ̀ɔ ŋie lə bə́ yiila ə Kleto mə duŋ yo kaalənə. 9 Kwaalə bə́ fəə nəni gəŋ bwii je nyɛɛkə, yulahalə nfili bə́ yá fu dəŋ wɛɛŋ ə bəne bənhliŋ go ye nnu bə Jani bəə Jamble mà fu lə.

Pwɔɔ keeh Timɔti lə yee i lēmi ntakə ə fieŋ ffɨŋ bə́ kèeh wu bəŋ

10 Timɔti, wə dùŋ ŋkwo wa nnu wə kələ ki keehnə kɨŋŋ bə fwɔ wuŋŋ maa fieŋ ffɨŋ ŋkìɛɛ ə kinduŋh kɨŋŋ mə. Wə kə̀lə dəŋ ki tɔŋ llɨŋ n'yìi ə Chu mə bə biwɛɛ bbɨŋ ŋkwàa, maa kinleki kkɨŋ ŋkə̀nə bə bəne, bə ye mbà bənju bə fieŋ finhliŋ ŋgə̀ŋ fwi fwi. 11 Wə kə̀lə dəŋ wuh ŋŋəŋ bəne mà hlɔɔ ə mi dɨŋ maa bəŋgə bəŋŋ. Wə kə̀lə bieŋ bbɨŋ bi mà duŋna bə mi ə Antiyɔk bə Ikɔniyuŋ maa Lishta. Wə kə̀lə dɨŋ wuh ŋŋəŋ bəne mà hlɔɔla ə mi dɨŋ. Kwaalə ə bəŋgə bəŋŋ mə bənhliŋ Baba fwòo kwaa mi. 12 Fi duŋ ba chɛɛŋ lə mbɛɛ mənhliŋ nnu i lèki benduŋ kinduŋh kkɨŋ Chu kìɛɛ, ə mbɛɛ nnu i dùŋ ə kimbumə mə bə Kleto Jisho, ə yee bə́ hlɔ̄ɔ wuh ə wu dɨŋ. 13 Bəne bəmbee bieŋ bə bəne bə fihinə, fwɔ ŋəbə lə yee ŋə fwɔ̄ ŋə gə̀ŋ fwi fwi, ye bə́ fìhi lə bəne bədi, fihi dəŋ maa go ŋəbə. 14 Kwaalə, bə wə, yee wə lêmi kwaa ə duŋ ə fieŋ ffɨŋ bə́ keeh'la wə mu, wə bèmi bə tɔŋ lo linhliŋ. Wə lèmi ə fi bəŋ yulahalə wə kəla bəne bbəŋ bə́ làanə bie wə. 15 Wə mà chɔɔ bəŋkələ bieŋ bbɨŋ bə́ bieŋna ə Kiŋwaati ki Chu mə wə kaani fiŋiaa fiwɛ. Bieŋ bɨhŋ duŋ ə bi laanə wə, ə wə kənə kinfukwoo kkɨŋ ki bwò ə tɔŋ llɨŋ wə yiila le ə Kleto Jisho mə. 16 Fieŋ finhliŋ ffɨŋ bə́ bieŋna ə Kiŋwaati ki Chu mə, bufe bu mu fù ə Chu kwáŋ. Fi chɨ̀nə bənlaanə bəne, fi nyìi ki həkunə, fi lɛ̀hiŋ bəne, fi làanə bəne bə fwɔ́ ŋəntiiŋ, 17 fo mbɛɛ nnu i dùŋ mbɛɛ Chu, lə yee i dūŋ lə i wuna, i kə̀nə fieŋ finhliŋ fi fənə nimi linwaa linhliŋ mu.