2 Timɔti 2

Ye Timɔti duŋ ə yee i jū ə fieŋ fi Chu bəŋ

Timɔti ŋiaa, bwɔɔ nnu fi bwo chu hə wə, yee wə lêmi ntakə bələ tɔŋ linwaa llɨŋ Kleto Jisho nyiila le bə bəne bbəŋ bə́ buma bə wu. 2 Yee wə jə̂ fieŋ ffɨŋ wə ba bəŋ'wo ye n'yɔ̀ɔlə ə bəne kiŋaaŋkə fwi, wə chi ə kwáŋ ŋə bəne bbəŋ bə́ dùŋ ntiiŋ bbəŋ bə́ dùŋ lə bə́ wuna bənlaanə dəŋ bəne bədi. 3 Yee wə jə̂ dəŋ ŋgə wa ye mbɛɛ ntɨmə ntiiŋ Kleto Jisho. 4 Bwɔɔ nnu mbɛɛ ntɨmə duŋ ə nimi liih mə duŋ ə i baa yii kwoo ə bieŋ bi bəne bə woo mə kə, yulahalə fieŋ ffɨŋ i làanə fie duŋ bənfə fieŋ ffɨŋ ŋwuŋ ŋkuntaŋ wi kìɛɛ. 5 Ə dəŋ yəəŋ ye mbɛɛ nnu i lə̀lə lili duŋ dəŋ ə i lələ di kə, kahiŋ lə i ləla bələ bəŋkɨnə bə lili le. 6 Mbɛɛ wɛɛh nnu i nɨ̀ŋ dəŋ gbaaŋ duŋ nnu i hlaa mɔŋ fieŋ ə bieŋ bbɨŋ i mà dɔ mə. 7 Yee wə hlê ki bieŋ bbɨŋ n'yɔ̄ɔ bɨhŋ, Baba lə fə ə wə kələ bi binhliŋ.

8 Yee wə hlê Jisho Kleto. I mà fwoo ə kpe mə. I mà fu ə kichəŋ ki Ŋkɨŋ Daafi mə. Ə fi ffɨŋ ndòntə ə hlɨŋ njəŋ nwaa mə. 9 Ə duŋ yu hlɨŋ nwaa ni, nni n'yu ŋ'wō ŋgə, ndùŋ ə fíaŋ mə ye mbɛɛ nnu i gbee ŋkɨnə. Kwaalə, ye nduŋ lə ə fíaŋ mə nəni, die Chu kə duŋ nə ə fíaŋ mə kə. 10 Ye fi duŋ lə nəni, nhlə n'yee ŋkwāa biwɛɛ bə fieŋ finhliŋ yu bəne bbəŋ Chu shaala, fo bə́ dəŋ lə kənə kinfukwoo ə Kleto Jisho go bə kiŋkuntaŋ ki kə kaa. 11 Biyɔɔnə bɨhŋ lə chɛɛŋ, bi duŋ lə:

Ə duŋ lə kkə bumə kpe bə wu, ə yee kkə dūŋh bə wu.

12 Ə kkə kwaa tɔ́ŋ,

ə yee kkə hlāah muŋkɨŋ bə wu.

Ə kkə nɨhŋ wu,

ə i nɨhŋ dəŋ be.

13 Ə yee kkə dûŋ kkə lèmi ntakə,

kəə mə ba kwaa yee i lēmi ntakə,

yulahalə duŋ ə i nɨhŋ gbo wiih kə.

Mbɛɛ nimi nnu Chu bema

14 Ŋoo bə́ ki bieŋ bɨhŋ, baa yɔɔ bə bə́ ə Chu fwi lə bə́ tukwaŋ ə kpənənə ki díe yiwaha go. Bi nchɨ̀nə lə mbɛɛ kə. Bi bìhi kwaa bəne bbəŋ bə́ wə̀lə bi. 15 Yee wə jû ntakə bənyii gbo wo ə Chu fwi ye mbɛɛ nnu Chu ŋə̀ŋ lə i dùŋ mbɛɛ yəəŋ. Yee wə dûŋ mbɛɛ nimi nnu i dùŋ kə kənə fieŋ ffɨŋ duŋ ə yee i kə̄nə giaali ə fi go kə, maa ffɨŋ fi kə̀nə kichɛɛŋ ki die Chu ə je nwaa mə. 16 Yee wə gɛ̂hiŋ biyɔɔnə bbɨŋ bi dùŋ kə kənə fieŋ bənfə bə Chu, yulahalə biyɔɔnə bie bwò bi fə̀ bəne yee bə́ dūŋh kinduŋh kkɨŋ Chu duŋ kə leki bə́ gə̀ŋ kwaa fwi fwi. 17 Bikeehnə bibə bie bwò bi dùŋ kwaa ye mumbuu mmuŋ mwi dì mwi bwɔ ə gbo wi mbɛɛ mə mwi dùhŋ mwi gə̀ŋ bə wi. Dɨŋ bəne bbəŋ bə́ keeh bikeehnə bimbini bie duŋ Hameneyu bə Filitu. 18 Bə́ too ba kwáŋ ə je kichɛɛŋ go, ye bə́ kpe lə ba lə nfu ə kpe mə jəə dɔhɔ. Bə́ fəə nəni, bihi kimbemi ki bəne bədi. 19 Kwaalə, kichili kkɨŋ Chu wɛɛla duŋ kintaabə, ki bà kwaa həmə. Kichili kɨhŋ duŋ kkɨŋ Chu bieŋ kinyii kiih ə ki go, ki duŋ lə “Baba kə̀lə bəne bbəŋ bə́ dùŋ biih,” maa lə, “Mbɛɛ mənhliŋ nnu i chèe yii li Baba, kənə bəntu kwaŋ ə fwɔ wiwaha go.”

20 Chəŋ ŋwuŋ ŋkuntaŋ bwo i kə duŋ nə kwaa bə bikwa bə bijee maa bikwooh, bbɨŋ bə́ fəə bə chwaa ki ge ki kpo ləkə ki wu kə. Bidi bwò bi duŋ dəŋ bbɨŋ bə́ fə̀ bə bite maa bbɨŋ bə́ mwèe bə shishɔ. Bieŋ bɨhŋ, bidi bwò bi dùŋ bbɨŋ bi kə̀nə nimi liŋkuntaŋ, bidi dùŋ bbɨŋ bi kə̀nə nimi linya. 21 Nəni, ə mbɛɛ lə fwoo kwáŋ ŋiih ə bieŋ bbɨŋ bi kə̀nə nimi linya mə, kəə i duŋ ye fieŋ fi chəŋ ffɨŋ duŋ ə bə́ jə fi yee bə́ fə̄ nimi liŋkuntaŋ mu. Mə lə yee i dūŋ ye mbɛɛ nnu Chu fəə lə i duŋ mbɛɛ wi. Mə lə yee i dūŋ mbɛɛ nnu i kè lə ŋwuŋ ŋkuntaŋ wi jə wu yee i fə̄ nimi linwaa lɛhɛŋ mu. 22 Nəni, yee wə lɔ̂ ŋkwo wa fwɔ wi nyɛni wi kiwaali wwuŋ hlɔ́ŋ bà ye bənleki. Yee wə jû bənduŋ kinduŋh kintiiŋ, wə kə̀nə kimbemi maa kinleki bə fwɔ wi kindunshiiŋ. Yee wə fə̂ nəni ye bəne bbəŋ bə́ chèe dəŋ yii li Baba bə tɔ́ŋ ŋəbə ŋənchaa fə̀. 23 Wə kə yee wə kə̂nə fieŋ bənfə bə bimantanə binfili bə binya kə, yulahalə bi bà bəmbwo kwaa ə duŋ bə bikpənini. 24 Mbɛɛ nimi Baba duŋnə lə yee i kpə̄nə bə bəne kə. I duŋ lə yee i kə̂nə ə duŋ tɔŋ linwaa bə mbɛɛ mənhliŋ, i dùŋ mbɛɛ nnu i kə̀lə bəŋkeeh bəne, i kə̀lə dəŋ bəŋkwaa biwɛɛ bə bəne. 25 I bà bənlɛhiŋ bieŋ ə kindunshiiŋ mə bə bəne bbəŋ bə́ nòo bə wu. I bà bənlɛhiŋ nəni bə kinhle lə duŋ ə Chu chɨnə bə́, ə bə́ fii tɔ́ŋ ŋəbə yee bə kə̄lə fieŋ fi kichɛɛŋ, 26 hlə dii chuu bufe bubə dɨŋ, lɔ fu ə choo ki fiŋkwini mə, kkɨŋ ki kwoo bə́, fo bə́ lə yee bə́ fə̄ ə duŋ fieŋ ffɨŋ i lèki.