2 Timɔti 1

Kiŋwaati ki chá fie kkɨŋ Pwɔɔ mà bieŋ bə

Timɔti

Ə mi Pwɔɔ, nduŋ mbɛɛ faŋnə Kleto Jisho ə kinhle ki Chu mə. Fɨhŋ nini bələ ŋkaachi kinduŋh ki kə kaa kkɨŋ ki dùŋ ə Kleto Jisho mə.

2 Mbīeŋ kiŋwaati kɨhŋ bə wə Timɔti nnu wə duŋ ŋiaa. Wə duŋ tɔŋ lɨŋŋ.

Tah Chu bə Kleto Jisho Baba ya nə wə tɔŋ linwaa, kwo hlɨŋ bə wə, baa nə wə kindunshiiŋ.

Pwɔɔ nə kimbaafɛɛ bə Chu ki Timɔti baa tahi wu gbo

3 Bwɔɔ nnu nhlè wə bwɔɔ mənhliŋ ə butuu bə bushi ə Chu cheenə ŋgwəŋ mə, nnə̀ kwaa kimbaafɛɛ bə Chu nnu nnɨ̀ŋ yo bə wu, fieŋ fidi hlaalə mi ə biwɛɛ bɨŋŋ mə kə, ye bətah màa bə́ nɨ̄ŋ lə. 4 Bwɔɔ nnu nhlè dəŋ ndəŋ mməŋ wə mà dɨlə mie bwɔɔ nnu bee wə mà ga gbo, hlɔɔ kwùŋ mi lə nhə mbaa ŋŋəŋ ə wə go fo tɔŋ lɨŋŋ lə yii bə kinjənjə. 5 Mba bənhle dəŋ kimbemi ko ki kichɛɛŋ kkɨŋ wə kə̀nə kie. Kimbemi kɨhŋ ə mah mwa Loyi bə mwa Yuni bbəŋ bə́ mà hlaa duŋ bə ki, ŋkə̀lə kə naamə lə ə ki kkɨŋ wə kə̀nə fidiɛɛ. 6 Fiee fieŋ ffɨŋ ŋkiɛɛ fie bəŋoo wə lə, wə ŋənə ə nnə li Chu mə llɨŋ li dùŋ le ə wə mə, yee wə fî ə li mə ye bwii lə, nnə llɨŋ wə mà kənə le bwɔɔ nnu mmà nchi kwáŋ ŋəŋŋ ə wə bəŋ. 7 Kələ lə Chu mà kə nəə be fiana ə duŋ nnu i dùŋ lə yee i fə̄ kkə kə̀nə nɨŋ kə. I mà nəə be ə duŋ fiana muŋga bə kinleki, bə nnu i dùŋ lə yee kkə tɨ̄ŋ ŋkɛ bə bikuu biaa.

8 Nəni, gbo kə yee wi bêe wə bən'yɔɔ bə bəne bədi ki Baba ya ləkə mi nnu ndùŋ nu ə chəŋ munfwa mə yu wu kə. Kwaalə yee wə jə̂ dəŋ wa ŋgə ə hlɨŋ nwaa ni mə bə muŋga mmuŋ Chu nəə wə. 9 Ə Chu nnu i mà fwoo be, i dii be lə yee kkə dùhŋ kinduŋh ki bəne bbəŋ bə́ dùŋ biih. I mà kə fəə fɨhŋ ə duŋ yu nimi lidi llɨŋ kkə mà nɨŋ kə. Fi mà duŋ yu ŋkaachi wi nnu i mà kaachi bə be, bə tɔŋ linwaa llɨŋ i mà kənə bə be kah ə Jisho Kleto mə mbiŋ hlə bwo chɔɔ. 10 Fidiɛɛ Chu nyiila be tɔŋ liih linwaa ye Nchuu Fwoo ya Kleto Jisho bwoo lə. I bwuŋna muŋgeni mu kpe, mə nyii kinchaa wɛɛŋ, lə mbɛɛ baalə kpe kə. I fəə fi fu wɛɛŋ ə duŋ bə hlɨŋ nwaa. 11 Ə yu hlɨŋ nwaa ni, nni Chu mà bwa mi lə n'yee ndūŋ mbɛɛ keehnə bə mbɛɛ faŋnə Kleto maa mbɛɛ laanənə yo. 12 Ə yu fɨhŋ ffɨŋ ŋ'wò ŋgə nnu ŋ'wò nu nəni. Kwaalə gbo bèe lə mi kə, yulahalə ŋkə̀lə mbɛɛ nnu n'yìi yo tɔŋ ə wu mə. Ŋkə̀lə ba kə naamə lə duŋ ə yee i fwōŋ fieŋ ffɨŋ nnə ə kwáŋ ŋiih mə,^ª gəŋ bwii butuu bu həŋgbɔŋ. 13 Yee wə bə̂lə kwaa ə duŋ gbənə ki kinlaanə kkɨŋ ki dùŋ kie yəəŋ kkɨŋ nlaana kie wə mu. Ye wə bə̀lə lə nəni, yee wə yîi dəŋ tɔŋ ə duŋ ə Kleto mə, wə kə̀nə dəŋ kinleki bə bəne, yee fieŋ finhliŋ dûŋ ə je bəne bə Kleto Jisho mə. 14 Yee wə fwôŋ kinlaanə ki kichɛɛŋ kkɨŋ bə́ mà nə kie bə wə. Yee wə kə̂nə bə muŋgeni mu Fiana Wɛɛŋ nnu i yiila ə be mə.

15 Wə kələ lə, bəne bənhliŋ ə bidi bi Ɛshia mə mà lɛɛla tələ mi. Bədi ə kichəŋ kibə mə duŋ Faygelu bə Helmɔgɛne. 16 Ŋkɔ̄nɔ lə Baba kwo hlɨŋ bə chəŋ Ɔneshifolu. I màa i bā bənfə ə bwɔɔ bəŋ bwɔɔ bəŋ tɔŋ lɨŋŋ dè. Gbo màa wi dūŋ kə bee lə wu yu munfwa mmuŋ i mmàa i dūŋ mwe ə mwi mə kə. 17 Bwɔɔ nnu i mà bwii yaŋ Luŋ, i mà jəə bwɔɔ kiɛɛ mi hətiiŋ, ə bwo chu bwɔɔ nnu dɨŋ, i ŋəŋ ə mi go. 18 Nchèe Chu lə Baba fə lə yee ə dūŋ butuu bu həŋgbɔŋ, ə Baba kwo hlɨŋ bə wu. Wə kələ ba kinwaa nimi linhliŋ llɨŋ i màa i nɨ̄ŋ bə mi ə kibalaki ki Ɛfɛshu mə.