2 Timɔti 4

Pwɔɔ keeh Timɔti lə yee i fə̄ nimi liih kinwaakə

N'yɔ̄ɔ fɨhŋ bə wə ə Chu fwi bə Kleto Jisho nnu i hlàah yo bəne bbəŋ bə́ kaani bəŋkee maa bə bəŋkpi. N'yɔ̄ɔ yu nfu wi nnu i fù yo, bə yu muŋkɨŋ mwii yɔ̀ɔ lə, 2 yee wə dôntə die Chu. Wə dòntə kwaa wə gə̄ŋ fwi fwi, maa ə duŋ bwɔɔ yəəŋ ləkə ə kə duŋ nə bwɔɔ yəəŋ. Yee wə nyîi ki həkunə ki bəne, wə lɛ̀hiŋ bə́, wə tàhi go ŋəbə bə kindunshiiŋ maa kinlaanə ko. 3 Yee wə kə̂lə lə bwɔɔ yu bwō nnu bəne lə baalə lemi ə kinlaanə kintiiŋ bəŋ kə. Bituŋ bibə fwì bəŋ'wo ə duŋ fieŋ fidi chili. Ə bə́ kiɛɛ buhuŋ ə duŋ bəne bəlaanənə bə bbəŋ duŋ ə yee bə́ lāanə ə duŋ fieŋ ffɨŋ bə́ lèki bəŋ'wo. 4 Bə́ ya she ŋ'wo fieŋ fi kichɛɛŋ, fu yee bə́ jāaŋka ə duŋ ə chah yi biyɔɔndu mə. 5 Kwaalə, bə wə, yee wə chî kwoo ko ntiiŋ bwɔɔ mənhliŋ, wə kwàa biwɛɛ ə bəŋgə mə, wə nɨ̀ŋ nimi lo ye mbɛɛ nnu i jàa i yɔ̀ɔ die Chu. Yee wə nɨ̂ŋ nimi lo linhliŋ llɨŋ bə́ nəə bə wə.

6 Bə mi, n'yo fidiɛɛ ye mbihŋ lə, bwɔɔ wuna ba nnu bə́ jə mi fə bə mi ye bə́ shoolə mbihŋ. Bwɔɔ ŋgwəŋ kwələ nə wuna. 7 Njoo nyɨmə yinwaa yu fieŋ fi Chu, nləla kaa lili, ŋkəna ə kimbemi kɨhŋ go ba ə ki bəŋ. 8 Chɔɔ jə fidiɛɛ, duŋ bə́ bɛŋna kinfwili kɨŋŋ ki muŋkɨŋ kkɨŋ ki dùŋ ki fwɔ wintiiŋ. Kinfwili kɨhŋ duŋ kkɨŋ Baba nnu i dùŋ yo mbɛɛ nnu i hlàah bənhlaa bəntiiŋ ya bɛŋ mi fi ə butuu bu həŋgbɔŋ bwe mə. I bɛŋnə ə duŋ mi kwaa kə. Mə lə bɛŋ dəŋ ki bəne bənhliŋ bbəŋ bə́ kè bə ŋgɨŋ lə i fiimə bwo.

Pwɔɔ yɔɔ ye bieŋ duŋ wɛɛ wiih

9 Timɔti, ju ntakə bəmbwo ə mi go chəkə. 10 Kələ lə Dema leka mbiŋ nnu fidiɛɛ nu lɛɛ tələ mi gəŋ ə Teshalonika. Klesheŋ gəŋna ə Galeshia, Taytu gəŋna ə Delmatia. 11 Ə kwaa Lukaa wuu mbwoŋ nnu i yo bə mi. Bwɔɔ nnu wə bwo, wə jə Maak yee bə bwō bəə wu. Duŋ ə yee i chɨ̄nə mi gbaaŋ ə nimi mə. 12 Mmà nfaŋna Tikiku ə Ɛfɛshu. 13 Bwɔɔ nnu wə lə yee wə bwō, wə jə kindu kɨŋŋ kiŋkuntaŋ kkɨŋ mmà nshe kie ə Kapu chəŋ ə kibalaki ki Towa mə. Yee wə bwô dəŋ bə biŋwaati bɨŋŋ, gbɛntɛlɛ bbɨŋ bə́ fəə bie bə bwá ŋə nyáŋ.

14 Aleshanda nnu i bìh jo fəə ŋgə bə mi ə kə duŋ nə chɛɛ kə. Baba lə hluŋ wu yu fwɔ wiih. 15 Yee wə fwôŋ kwoo ko bə wu. I nòo hlɨŋ nni kkə dòntə ye gbaaŋ.

16 Butuu bu fwii bbuŋ mmà nshii nhlaa ŋgwəŋ, mbɛɛ mà kə lemi mi dɨŋ kə dududu. Bəne bənhliŋ mà lɔɔ mi. Chu kə kwoo bə́ yu fimbini fie kə. 17 Kwaalə, Baba mà lema ə mi dɨŋ, nə mi muŋga bən'yɔɔ hlɨŋ nwaa gbaaŋ fo bəne bənhliŋ bbəŋ bə́ dùŋ kə duŋ nə Bəjuu lə wo hlɨŋ ye. Nəni i fwoo mi ə tuntunu jə. 18 Baba lə yee i fwōo dəŋ mi ə kwáŋ ŋə fieŋ fiwaha mə finhliŋ, hlə ja yii mi ə muŋkɨŋ mwii mu buh mə ə kindunshiiŋ mə. Yee kkə fâŋ kindohi kiih bwɔɔ mənhliŋ kə kaa. Yee fi Dûŋ lə.

Cheenə

19 Chee nə mi Plishilia bə Akwila. Chee dəŋ chəŋ Ɔneshifolu. 20 Elashtu mà shee ə Kɔlɛŋ, Tolofimu duŋ nnu mmà nshe wu ə Miletu i gɔŋ. 21 Ju ba gbaaŋ bəmbwo bwɔɔ nnu fwee kintaabə kaani kə chɔɔ lə kə. Yubulu yu fāŋ wə cheenə. Pudeŋ bə Linu maa Klawdia bə bəŋgwoŋ bənhliŋ ə Kleto mə bie bə́ fāŋ dəŋ cheenə. 22 Nnòŋ lə Baba yee i dūŋ bə fiana wa. Kinleki ki Baba yee ki dûŋ bə bəŋ bənhliŋ.