2 Teshalonika 2

Ki mbɛɛ nnu i bwùŋ ŋkɨnə Chu

Bəŋgwoŋ, ki mbwo Baba ya Jisho Kleto bə ye kkə yá bumələ lə kkə gəŋ yee kkə dūŋ bə wu, n'yee nnōŋ lə, 2 bə kə jaa lə yee bufe bweeŋ hlāamə kə, ləkə duŋ duŋ bu yɔɔ lə, bə hə woo biyɔɔnə bidi bbɨŋ bi fù ə Fiana Wɛɛŋ go, ləkə lə kkə yɔɔla, ləkə lə kkə bieŋna kiŋwaati lə butuu bu mbwo Baba bwoo ba. 3 Bə kə tookwaŋ lə mbɛɛ fihi bəŋ maa ə duŋ ə je yɛhɛŋ mə. Yee bə kə̂lə lə butuu bu mbwo Baba bwe yá bwoo wunə kə, kahiŋ lə bwɔɔ nnu bəne yá ja yee bə noo noonə bə Chu hə hlaala bwo. Kahiŋ dəŋ lə mbɛɛ nnu i bwùŋ yo ŋkɨnə hə hlaala nyiee, ə duŋ wu nnu bə́ yá laa ə nlaamə. 4 Ə wu nnu i yáa i bīhiŋ gbo wiih, i duŋ kə duŋ nə wɛɛ wi fieŋ finhliŋ ffɨŋ bə́ chee lə Chu ləkə ffɨŋ bə́ chèe Chu bə fi. Nəni, ə i hlə gəŋ lɛɛ shii ə chəŋ ntofi Chu mə hlə yee i chēe gbo wiih lə ə wu Chu. 5 Bə kə ŋoolə lə bwɔɔ nnu mmàa ndūŋ yo bə bəŋ, mmà ŋkə n'yɔɔlə ki bieŋ bɨhŋ bə bəŋ lə?

6 Bə kəla fidiɛɛ fieŋ ffɨŋ fi kə̀nə fie wu, fo i ya gənə fu ə duŋ ə bwɔɔ nnu bə́ yá chi yo yu wu. 7 I yu nɨ̄ŋ ba fidiɛɛ bə muŋga mwii ə nələ mə bənfə bəne yɔ̀ɔ bihi bəŋkɨnə bə Chu, fi duŋ kwaa lə mbɛɛ nnu i bàŋ yo wu yáa i bāŋ dəŋ wu nəni gəŋ bwii bwɔɔ nnu bə́ yá fwoo wu ə je. 8 Bə́ yá fwoo wu nəni, ə mbɛɛ nnu i bwùŋ yo ŋkɨnə Chu hlə nyiee, ə Baba Jisho hlə fɛɛ wu ə nfɛɛ mə bə fuu wi wu jə, gɔhɔ wu bə nlala nnu i yáa i bwō yo bə wu. 9 Mbɛɛ nnu i bwùŋ yo ŋkɨnə yáa i bwō ə muŋgeni mu Hlaata mə, i kə̀nə muŋga munhliŋ, i fə̀ bieŋ bbɨŋ bi nyìi muŋga mwii, bə bieŋ bi ŋɨŋ gəə, ə duŋ bi yo kaalənə binhliŋ. 10 I yáa i bwō dəŋ bə dɨŋ bieŋ biwaha binhliŋ bənfihi bəne bbəŋ bə́ dùŋ bie lə bə la. Bə́ laa yulahalə bə́ nɨhŋna bənleki kichɛɛŋ fo bə́ lə fukwoo. 11 Ye bə́ duŋ lə kə leki kichɛɛŋ, Chu hlə fə bə́ jɨ̀ɨŋkə ə njɨɨŋkə mə, fo bə́ lə yee bə́ bēmi kwaa ə duŋ fieŋ fi yo kaalənə. 12 Chu mà fə nəni fo bə́ bənhliŋ lə gbe nhlaa, bbəŋ bə́ dùŋ bie kə bemi kichɛɛŋ, bə́ wò njənjə bənfə bieŋ ə duŋ bbɨŋ bi dùŋ kə duŋ nə ntiiŋ.

Chu mà shaa bəŋ bənfu kwoo

13 Kwaalə bəŋgwoŋ biaa bbəŋ Baba leki gbaaŋ, kkə kənə lə yee kkə nə̄ kimbaafɛɛ bə Chu bwɔɔ mənhliŋ yu bəŋ, yulahalə Chu mà shaala bəŋ həmɛɛ bəmbwo chuu fwoo bəŋ bələ ye nimi li Fiana Wɛɛŋ fə̀ lə yee bə chāa, ye kimbemi kkɨŋ bə bemi bə kichɛɛŋ. 14 I mà cheela bəŋ nəni kah ə hlɨŋ nwaa nni kkə màa kkə dōntə, fo bə lə kənə ə kiŋkuntaŋ ki Baba ya Jisho Kleto go. 15 Nəni bəŋgwoŋ biaa, yee bə lêmi ntakə, bə kə̀nə kinlaanə kkɨŋ kkə mà nə kie bəŋ, ləkə ə duŋ kkɨŋ kkə mà laanə kie bəŋ bə kijə ə nlaanə mə, ləkə kkɨŋ kkə mà bieŋ kie ə bieŋ mə bə bəŋ. 16 Baba ya nnu i dùŋ yo Jisho Kleto kibɛɛ maa Tah Chu ya nnu i mà leki yo be yee i tāhi go ŋiaa bwɔɔ mənhliŋ kə kaa, i baa nə dəŋ be fieŋ finwaa ffɨŋ kkə lə yee kkə kēe fwi ə fi go yu tɔŋ linwaa. 17 I diɛɛ tɔ́ŋ ŋieeŋ, i fə ŋə ta ə nimi linwaa mə linhliŋ llɨŋ bə fə̀, bə fieŋ finhliŋ ffɨŋ bə yɔ̀ɔ.