2 Teshalonika 1

Kiŋwaati ki chá fie kkɨŋ Pwɔɔ mà bieŋ bə kimbumə ki

Teshalonika

Ə mi Pwɔɔ, kkə bie bee Shila bə Timɔti. Mbīeŋ kiŋwaati kɨhŋ bə kimbumə ki bəne bə kimbemi bə kibalaki ki Teshalonika kkɨŋ ki bumə duŋ bə Chu Tah ya bə Baba Jisho Kleto.

2 Chu Tah ya bə Baba Jisho Kleto nyii bəŋ tɔŋ linwaa, baa nə dəŋ bəŋ tɔ́ŋ ŋəndə.

Nhlaa nnu i ya duŋ bwɔɔ nnu Kleto yá fiimə bwo

3 Bəŋgwoŋ biaa, kkə duŋ lə yee kkə nə̄ kimbaafɛɛ bə Chu bwɔɔ mənhliŋ yu bəŋ. Fi duŋ yəəŋ nəni, yulahalə kimbemi kieeŋ kie ki kò ki gə̀ŋ fwi fwi, maa kinleki kkɨŋ mbɛɛ bə mbɛɛ kənə bə maani kie ki gə̄ŋ dəŋ fwi fwi. 4 Nəni, be kibɛɛ ba bəntuu kɔŋ ə bimbumə bi bəne bə kimbemi bi Chu bidi mə yu bəŋ. Kkə bà bəntuu kɔŋ ye bə lēmilə ntakə bə ye bəne hlɔ̄ɔlə wuh ə bəŋ dɨŋ bə kə̀nə kwaa kimbemi kieeŋ go, maa ki bəŋgə bbəŋ bə́ wò, bə kwàa kwaa ə duŋ tɔŋ. 5 Fɨhŋ fieŋ ffɨŋ fi nyìi lə Chu yá yi hlaa bəne ə jé yintiiŋ mə, fə ə bə wunə bəne bə muŋkɨŋ mu Chu, bbəŋ bə ŋə̀ŋ bəhŋ ə bəŋgə yu mwi. 6 Ye Chu duŋ lə mbɛɛ ntiiŋ, i yá yi chuu dəŋ ŋgə nnu bəne nə̀ yo bəŋ bə bə́, 7 ə i fə ə bə ŋɔɔni, bəŋ bbəŋ bə́ wò bie ŋgə maa bə be dəŋ. Fɨhŋ fieŋ ya duŋ bwɔɔ nnu Baba Jisho yá fu buh yee i bwō ə liniini li bwii wi ŋgɛɛki mə. I yáa i bwō nəni bə bənchinda biih bəntaabə. 8 I yá chuu fie bə bəne bbəŋ bə́ nɨ̀hŋ Chu, maa bbəŋ bə́ dùŋ kə fəə ye hlɨŋ nwaa ki Baba ya Jisho yɔɔlə. 9 Bə́ yá yi laa bə́, ə bə́ kənə ŋgə kə kaa, gahi bə́ ə Baba go, fo bə́ lə nakə bwoo ə wu fwi maa ə kiŋkuntaŋ kiih kintaabə go kə. 10 Fɨhŋ nini yá duŋ butuu bbuŋ i yáa i bwō, fo bəne bbəŋ bə́ dùŋ biih yá faŋ kindohi kiih, ə bəne bənhliŋ bbəŋ bə́ yìi tɔ́ŋ ə wu mə ə gəə ŋɨŋ bə́. Ə bəŋ dəŋ yáa bə dūŋ ə bə́ mə yulahalə bə mà bema hlɨŋ nih kkə mà yɔɔ ye bə bəŋ.

11 Fiee fieŋ ffɨŋ kkə chèe fie Chu bə bəŋ bwɔɔ mənhliŋ lə Chu ya fə lə bə wunə bəne bbəŋ i chee bie jə lə bə duŋ biih. Kkə chèe Chu dəŋ lə i chɨnə bəŋ bə muŋga mwii, fo bə lə yee bə fə̄ fieŋ finwaa finhliŋ ffɨŋ bə kiɛɛ, maa nimi linhliŋ llɨŋ bə nɨŋ yu tɔŋ llɨŋ bə yii le ə Kleto mə. 12 Kkə chee Chu dəŋ nəni fo yii li Baba ya Jisho lə yee li kə̄nə kiŋkohi ə bəŋ mə, ə bəŋ dəŋ yee bə kə̄nə kiŋkohi ə wu mə. Fɨhŋ nini duŋ yu tɔŋ linwaa llɨŋ Chu ya bə Baba Jisho Kleto kə̀nə ə bəŋ mə.