2 Teshalonika 3

Pwɔɔ noŋ lə bəne bə kimbemi yee bə́ chêe Chu bə bə́

Bəŋgəŋ kpee, bəŋgwoŋ biaa, yee bə chêe Chu bə be. Yee bə chêe Chu lə díe Baba yee i jāa i gə̀ŋ fwi chichii, bəne bèmi bə́ bwɔ̀kwe bə díe yé yəəŋ ye bə màa bə fə̄lə. 2 Yee bə chêe Chu dəŋ fo kkə lə fukwoo ə kwáŋ ŋə bəne bbəŋ bə́ dùŋ bə tɔ́ŋ ŋəwaha, bə́ fə̀ bieŋ biwaha, yulahalə ə bəne bənhliŋ bbəŋ bə́ kə̀nə kimbemi kə. 3 Kwaalə, Baba bwò i lèmi ə die yi bəŋ. Mə lə nə bəŋ muŋgeni, baa fwoŋ bəŋ lə bə kə lɛɛlə ə kwáŋ ŋə mbɛɛ bieŋ biwaha mə. 4 Baba fəə kkə yiila bufe bwaa ə bəŋ mə, lə bə bie bə fə̄ fieŋ ffɨŋ kkə yɔ̀ɔ, bə lə she yee bə fə̄ fi. 5 Nəni kkə noŋ lə Baba chi tɔ́ŋ ŋieeŋ yee ŋə duŋ ə kinleki ki Chu mə baa fə yee bə kwāa tɔŋ ŋieeŋ ye dɨŋ tɔŋ llɨŋ Kleto màa i kwāalə.

Mbɛɛ kənə bənɨŋ ə i hlə yee i dì

6 Bəŋgwoŋ biaa, kkə bie kkə yɔ̄ɔ ə n'yɔɔ mə bə bəŋ ə yii li Baba ya Jisho Kleto bəŋ lə, bə kə yee bə bûhuŋ go bə bəŋgwoŋ biaa bbəŋ bə́ dùŋ bie fieŋ kə fəə kə, bbəŋ bə dùŋ kə yee bə bə̄lə fwɔ wwuŋ kkə mà keeh we bəŋ mu. 7 N'yɔ̄ɔ nəŋ, yulahalə bəŋ kibɛɛ kələ ye duŋ ə yee bə bə̄lə wuh ŋiaa. Kkə mà kə yee kkə jɨ̂ɨŋkə ə njɨɨŋkə mə bwɔɔ nnu kkə mà duŋ yo bə bəŋ kə. 8 Kkə mà kə diee fieŋ fi mbɛɛ ju kə hluŋ nə kə. Kkə màa kkə nɨ̄ŋ kkə bwoŋ ə butuu bə bushi fo kkə lə nakə toolə mbɛɛ ju ntiɛ ndili kə. 9 Fi mà kə duŋ nə lə kkə lə bə muŋgeni bəmbii fieŋ bə bəŋ kə. Fi mà duŋ lə fo kkə lə nyii bələ fwɔ waa ə yee bə bə̄lə wuh ŋiaa. 10 Bə kələ lə, bwɔɔ nnu kkə màa kkə dūŋ bə bəŋ, kkə mà nəə ŋkɨnə nu bə bəŋ lə, “Ə mbɛɛ lə nɨhŋ lə mə nɨŋnə, i kə diee kə.” 11 N'yɔ̄ɔ nəni yulahalə kkə woo lə bəŋ bədi shì bə jɨ̀ŋkə nya fieŋ nfə hləŋ, bə́ jàa kwaa bə́ yìi biwu ə bieŋ bi bəne bədi mə. 12 Bəmbini bie bəne, kkə yɔ̀ɔ bə bə́ ə n'yɔɔ mə kkə nə bə́ keehnə ə yii li Baba Jisho Kleto bəŋ lə, bə́ shii həkwe bə́ nɨŋ bəŋkənə fieŋ ffɨŋ bə́ lə yee bə́ dī. 13 Bə bəŋ ye bə bəŋgwoŋ biaa, bə kə biaŋ nə bənfə fwɔ winwaa.

14 Ə mbɛɛ nɨhŋ bəŋ'wo fieŋ ffɨŋ kkə yɔ̀ɔ ə kiŋwaati kɨhŋ mə, bə dah chi mbini yo mbɛɛ. Bə kə baa lə kənə fieŋ bənfə bə mbini yo mbɛɛ kə, fo gbo lə yee wi bēe wu. 15 Kwaalə, bə kə jəə wu ye mbɛɛ nnu i dùŋ yo kə diee njənə bə bəne. Yee bə nûulə wu bituŋ ə nuulə mə ye mwaa weŋ lə.

Cheenə ki həŋgbɔŋ

16 Baba nnu i dùŋ yo bə tɔŋ lində, yee i nə̂ bəŋ tɔŋ lində bwɔɔ mənhliŋ ə jé yinhliŋ mə. Baba yee i dûŋ bə bəŋ bənhliŋ.

17 Ə mi Pwɔɔ nnu mbieŋ cheenə kɨhŋ bə kwaŋ wuŋŋ. Je nni mbieŋ ni mə ə li ye mbwo li nnyii kwaŋ ə biŋwaati bɨŋŋ mə binhliŋ. Ə li ye mba bəmbieŋ. 18 Yee kinleki ki Baba ya Jisho Kleto yee ki dûŋ bəŋ bənhliŋ tɔŋ.