Koloshi 3

Bəne bə Kleto kənə kinduŋh kifwɔ

Ye Chu mà fwoolə bəŋ bə Kleto ə kpe mə, bə yii tɔŋ ŋieeŋ ə duŋ ə bieŋ bi buh mə dɔhɔ kkɨŋ Kleto dùŋ, ə duŋ Chu chiee wu ə kwaŋ wiih wi diee mə. 2 Yee bə chî bufe bweeŋ ə bieŋ bi buh mə. Bə kə chiee ə bieŋ bi yaŋ kwe mə kə, 3 yulahalə bə kpee, kinduŋh kieeŋ kie fidiɛɛ ə duŋ kkɨŋ Chu nəla ki bə Kleto ə wu Chu mə. 4 Bwɔɔ nnu Kleto nnu i dùŋ yo kinduŋh kieeŋ yá gənə fu, ə bəŋ dəŋ yá gənə fu bə wu ə kiŋkuntaŋ kiih mə. 5 Fi hlə yee fi dūŋ lə, bə laa bieŋ ye bɨhŋ lə ə bəŋ go, bbɨŋ bi dùŋ bi yaŋ mbiŋ nte. Ye bəŋ'waali kiwaali bənhle bieŋ bi nyɛninə bi kiwaali, maa gbo wwuŋ wi fwì, maa bənhle bənfə bieŋ biwaha, maa bəŋkee díi ə bieŋ go. Mbɛɛ nnu i kə̀nə doo ki bieŋ bie, bieŋ bie choo chu bə wu. 6 Ə yu dɨŋ bɨhŋ bieŋ bbɨŋ Chu yá nyii tɔŋ liih llɨŋ li fwèe bə bəne bbəŋ bə́ fə̀ bi. 7 Ə mà duŋ bwɔɔ nnu fwii bə fə̀ dɨŋ bɨhŋ bieŋ bwɔɔ nnu bə màa bə kāani bə dùhŋ dɨŋ kinduŋh kimbini kie. 8 Kwaalə fidiɛɛ, bə kənə bənchee kwáŋ ə bi go binhliŋ. Bə tukwaŋ ə lo go bə biwɛɛ bbɨŋ bi fwèe maa tɔ́ŋ ŋəŋ'waha. Mbɛɛ kə yee i bîhi yii li mbɛɛ ju kə. Biyɔɔnə binshwaamə kə yee bi fû ə mbɛɛ jə kə. 9 Mbɛɛ kə yee i fîhi maani kə. Yee bə kə̂lə lə bə fwoola go ŋəŋko ŋie bə fwɔ ŋəŋə, 10 lee ə duŋ ŋənfwɔ ŋie. Wuhŋ nini duŋ Chu bwɛ̀ɛ wi bwɔɔ mənhliŋ wi gàanə wi chù ye wiih wu Chu Kinfə Bieŋ lə, fo bə lə yee bə kə̄lə wu kinwaa. 11 Fəŋ duŋ mbɛɛ baala duŋ chili bə ju kə. Mbɛɛ ju kə baa lə duŋ ŋwuŋ Bəjuu, ləkə lə ju duŋ ŋwuŋ Bəglik kə. Mbɛɛ ju kə baa lə duŋ nnu bə́ nyieŋ wu jo ləkə lə ju yo bə kpaa kintuulə kə. Mbɛɛ ju kə baa lə duŋ ŋwuŋ nnu nji kə. Mbɛɛ ju kə baa lə duŋ lə ə nyaŋ nni nji kə. Mbɛɛ ju kə baa lə duŋ nfwa, ju duŋ nnu i duŋ kə duŋ nə nfwa kə. Kleto duŋ fieŋ finhliŋ bə bə́, i dùŋ ə bə́ mə bənhliŋ. 12 Ye Chu shaala lə bəŋ bə chàa, i lèki bəŋ, yee bə kwô hlɨŋ bə go ŋieeŋ, bə fə̀ bifənə binwaa bə bəne, bə bwɔ̀kwe bə go ŋieeŋ, bə dùŋ wɛɛɛ, bə kwàa tɔ́ŋ. 13 Yee bə jə̂ mbɛɛ mənhliŋ ye i duŋ lə. Ə mbɛɛ lə fə laha ffɨŋ fi lò mbɛɛ hədɨŋ, mbɛɛ yo laamə nə wu. Ye Baba mà laamə lə nə dəŋ yíwaha yeeŋ, yee bə lâamə nə dəŋ yí bəne bədi. 14 Bwɔɔ nnu bə fə̀ bieŋ bɨhŋ binhliŋ, yee bə chî kinleki fwi. Kinleki lə fieŋ ffɨŋ fi bùhuŋ bieŋ binhliŋ bi hlə yee bi dūŋ ba fieŋ finwaa gəŋ kpee həŋgbɔŋ. 15 Bə cheekwaŋ kindunshiiŋ kkɨŋ ki bwò ə Kleto go yee ki dūŋ ə tɔ́ŋ ŋieeŋ mə ki nyìi bəŋ je. Kindunshiiŋ kɨhŋ duŋ kkɨŋ Chu mà dii bəŋ lə yee bə kə̄nə ye bə duŋ lə mbili mwi. Yee bə nə̂ dəŋ kimbaafɛɛ bə Chu. 16 Bə chì die Kleto yee i dūŋ ə tɔ́ŋ ŋieeŋ mə kinwaa, yee bə lâanə go ŋieeŋ bə bufe bunhliŋ bbuŋ bu bwò ə Chu kwáŋ. Yee bə shêeni bə nə̀ kimbaafɛɛ bə Chu ə tɔ́ŋ ŋieeŋ mə bə yíi ŋŋəŋ ŋə fù ə Kiŋwaati ki Ŋkohi mə, maa yíi ŋəndi ŋə kiŋkohi, maa ŋŋəŋ Fiana wi nə̀ bəne. 17 Bwɔɔ nnu bə fə̀ fieŋ finhliŋ ffɨŋ bə fə̀ ləkə ə n'yɔɔ mə ləkə ə nfə mə, yee bə fə̂ ə yii li Baba Jisho bəŋ, bə nə̀ kimbaafɛɛ bə Chu Tili kah ə wu mə.

Ye bəne bə Kleto duŋ lə yee bə́ dūŋh ə bə́ chə́ŋ

18 Bəkwɛɛ, yee bə nə̂ go ŋieeŋ bə bənəə bieeŋ. Ə fieŋ ffɨŋ fi wuna bə bəne bə Baba bənfə. 19 Bənəə, yee bə lêki bəkwɛɛ bieeŋ. Bə kə yee bə dûŋ ŋaŋaŋa bə bə́ kə. 20 Bwɔni, yee bə wô bəchwa bə bəmwa bieeŋ ə fieŋ finhliŋ mə. Ə bə fə nəni, ə yee fi nūaa Baba. 21 Bəche bwɔni, bə kə yee bə dûŋ nlokə nlokə bə bwɔni bieeŋ kə. Ə yee bə fə̄ nəni, ə tɔ́ŋ yee ŋə kpē bə́. 22 Bənfwa yee bə wô bə bəche bikuu bieeŋ bə yaŋ mbiŋ nu nte ə fieŋ finhliŋ mə. Bə kə yee bə nɨ̂ŋ bə bə́ kwaa bwɔɔ nnu díi ŋəbə duŋ ə bəŋ go, bənfə lə go yee ŋə nūaa bə́ bə bəŋ kə. Yee bə nɨ̂ŋ bə tɔŋ mwe, bə lɔ̀ ə duŋ Baba. 23 Fieŋ finhliŋ ffɨŋ mbɛɛ nɨ̀ŋ, yee i nɨ̂ŋ bə tɔŋ liih linhliŋ lə i nɨ̀ŋ yu Baba, ə kə duŋ nə yu mbɛɛ kə. 24 Yee bə kə̂lə lə mbɛɛ yá bwo kənə fieŋ ffɨŋ bə́ hə bwɛɛla chi fi ə duŋ bikoonə biih ə duŋ ə Baba kwáŋ. Ə Baba Kleto nnu bə nɨ̀ŋ bə wu. 25 Kwaalə, bə bəne bbəŋ bə́ fə̀ yiwaha, Chu lə koŋ bə́ yu yiwaha yyɨŋ bə́ fə̀. Chu nyìilə kichili bə bəne kə.